Read berom Bepiris 25 Bible Online

Bepiris 25 - berom bible

Bepiris 25

¹Dagwi Darwey a ha a Mose e ra tɛ̂t Raku Sinai, a ha a BeIsrayɛl neha nemo ngan: Jeng de yin a yel e sevwel de ma sé nɔng in, tík in cāp min ye ros e kahɛ shey hê netaama. Yi ano yin a rɔda nɔng me nerey.

³How in cāp min, kwɛrɛng hin nelang batîn anap, ko yin tula pyɛ́ mo neshey netyiimin,

⁴ko e shey hê netaama, tik in vwel o he ros. Shey o ha sé Tuk Shábat hê vwel, ba tik hɛ jaram yaga Dagwi Darwey. Yin how cāp min kɛ yin kwɛrɛng nelang batîn anap arɔng wɛt.

⁵Yin yɛt jirî cāp min o wɛt, yin vos basât anap de yin a kwɛrɛng arɔng wɛt. Ha sé shey de vwel min hê ros burang.

⁶Mwa ano de yin a ka how cāp min e shey o wɛt, ko yê nɔng pyɛ̂ re yaga yin, na besam min beras na beha, na bemât fwom min, na bemat beduk de ba sé sangal e ji min,

⁷na yas min mwa na ngyāma. Pyɛ̂ mwa de ya mara e ji cap o, yin ê tɔk re yɛ.

⁸Bara hin neshey netaama zang taama, nê wuna hɛn neshey kuru banaas na nɛ shanetat (49).

⁹Ko tuk hê kuru hê pwɛl gwô netaama ha sé Gbɔng Tûk Tala na Halâ-nɛn, yin tɛ̀ be dak bedurum e mwa neyɛnɛ̂ sevwel min.

¹⁰Gwong a gwomo de yin ê tik shey hê kuru batungun jaram, ko yin mok rehâ vibis bemât sevwel o mwa washak. E shêy vibis o, benap mwa de ba ga kana nɔng e lek, bē toyo a bedâ vɛ mɛ, kɛ yére mɛn. Ko kawɛ de ba kana row ɛ sam, ê toyo wɔ na cáng mɛ.

¹¹E shey o yin ê how pyɛ́ e cāp min, kɛ yin yɛt jiri mo, kɛ yin vos basât anap de yin a kwɛrɛng wɛt.

¹²Shey hê kuru batungun o hê sè jaram, ha sé nang, ko yin ê tɔk re jirî pyɛ̂ cāp zɔng.

¹³E Shêy Vibis o, mwa benap de ba kana nɔng e lek bê toyo a beda mo mɛ.

¹⁴Yaga ano, kɛ yin a nɔ̂ng gwà min WoIsrayɛl nap e lek kɛ yin a sey wɛ e vwɔ mɛ, yin ngyitra bemin wɛt.

¹⁵Bē yɛrɛ nû dyām o tyɛng na nepyak neshey de na tɛt ɛ gyam silâ Shêy Vibis.

¹⁶Ka sede bwang neshey na rɔngɔl ɛ pyak, ko dyām o yê tut, ko ka sede na rɔngɔl ɛ tyɔng, ko dyām o yê sè lɛgɛm. Yaga pyɛ de a sé row o ya sé nepyak bwal de be sɛsɛm e cap o.

¹⁷Yin ngyitra gwà min WoIsrayɛl wɛt, ko sap in me, yaga e me wɛ à Dagwi Darwey, Dagwi min.

¹⁸Gyeng in badu hom na neha de ma ga basa a yin e ra vɛ, ano de yin ê sangal tyang e sevwel o, vit a vê repugu de bê hwo e ra yin.

¹⁹Vwel o hê nɔngɔs pyɛ́, ko yin ê sɛ̀ kayɛ pyɛ de yin ê re, yin siris, ko yin ê sangal tyang e vwel o vit a vê repugu.

²⁰Ka yin a rangal wɔgɔ, e sɛ́ de wot ê re e shey hê netaama mo de vit a hôw cāp, vit a tulâ pyɛ́ arɛt?

²¹Tɔk in, Dagwi Darwey ê tɛ̀ nerat e ra cāp o e shey hê netyiimin, na ye bin nɔng pyɛ́ de yê wul a yin neshey netat.

²²Jeng de yin ê how cāp min e shey hê rwit, yin ê se rɔ̌ re pyɛ́ de yin á yɛt bwal o e shey hê netyiimin o, ko yin ê vɔk pyɛ́ de yê vey a yin re, sɛ̌ jeng de yin a yɛt bwâl pyɛ́ de yin a how e shey hê rwit o.

²³Yin row nap vit a toyo mɛ wɛt, yaga vwel ha sé min wɛt, ha sé nang, me Dagwi, ko yin, yin a sé sede bemat beduk de ba sé sangal ɛ, yin e ka vɛ́sɛ hɛ zɔng.

²⁴Yaga ano, e mwa vwel de ma nɔng in ɛ benap, gbing-gbing yin tɛ̀ redu de rê simo a mwat, na a tɔk viri nap de a kana nɔng e lek.

²⁵Ka sede hwak e ji min BeIsrayɛl a tɛ́ ɛ pwɛng, ko a tɛ́ ɛ a yɛ gbing-gbing na a nɔng nap mɛ e lek, ko tik na cang mɛ ye bagat ye ba viri wɛ.

²⁶Ko ka sede vit a cang de yê tɔk viri nap o, gyeng vɔk e nuyel ê sɛ̀ pyɛ de ya vey na a viri mɛ nap mɛ mo.

²⁷Ka sede ano, yɛ a bara neshey de na tɛt ɛ vɔk e Shêy Vibis de he kyè vey, ê tala dyām tyɛng na bwang neshey o, ko ê toyo na nap mɛ.

²⁸Ko ka sede a vɔk dyām de ya vey na a viri mɛ nap o wɛt, ko wô sangal e vwɔ̂ mwat de a sey wɛ e lek sɛ̌ Shêy Vibis de he kyè vey. E shey o, bê toyo a da mo mɛ.

²⁹Ka mwat a nɔng lɔ̂ sangal mɛ e lek e ji repomo de ba gwɔrɔ na jwâ-pomo, a vɔk reto de ê to viri hɛ vɔk e talâ shey tyɛng jeng de a kana nɔng hɛ e lek o.

³⁰Ka sede a viri lɔ mo gyam shey hining o he tala hɛ wɛt, ko lɔ mo ha ga nusu hɛ e vwɔ mɛ, ha ga tɛ́ ɛ hê mwat de a sey hɛ e lek na yére mɛ gbak-gbak, vit a hâ virî hɛ e jeng silâ Shêy Vibis.

³¹Ko nelɔ bapomo de ba gwɔrɔ na jwa wɛt, be ra na nɛ tyɛng sede be ra na benap, beda mo be tɔk viri nelɔ mɛn e silâ Shêy Vibis.

³²Ko yerê BeLevi yê tɔk viri nelɔ mɛn de na sé e bapomo mɛn e kayɛ jeng.

³³Ko ka sede hwak e ji yerê BeLevi mo ê kyɛm a viri lɔ mɛ wɛt, ko bē toyo a yɛ na lɔ mo e Shêy Vibis, yaga nelɔ de yɛn a sangal ɛ e bapomo mɛn na sé numo mɛn e ji BeIsrayɛl.

³⁴Ko bê nɔng cwɛl mɛn e lek ko tyɔng wɛt, a sé numo mɛn hê nedanelɔ gbak-gbak.

³⁵Ka sede gwa mo WoIsrayɛl a tɛ́ ɛ pwɛng, a vɔk redu mō, ko hwo jut nedirik mɛ, sede yɛ a sé mwat duk de a sé sangal na hwo. Hwo rangal ndi e ra redu mo wɛt, ko tele hwo Dagwi mō, tik ɛ na a sangal na hwo.

³⁶

³⁷Ka hwà hwop ɛ dyām, hwo sey ndi yi na yɛ wɛt, ko ka hwà row a yɛ pyɛ̂ re, hwo bare hwô sey ɛ ndi arɔng wɛt.

³⁸Me wɛ à Dagwi Darwey, Dagwi min. Ma ga nusu na yin yi e sevwêl Misra, na me bin nɔng in sevwêl Kanaan, na me sè Dagwi min.

³⁹Ka sede gwa mo WoIsrayɛl a tɛ́ ɛ pwɛng, ko a nɔng to mɛ na a tɛ́ ɛ mwât selek mō, hwo ra na yɛ sede sam wɛt.

⁴⁰Yɛ ê sangal e vwɔ mō sede mwât selek, ko ê ra a hwo fwom sɛ̌ Shêy Vibis de he kyè vey zɔng.

⁴¹Ko yɛ na nèy mɛ bê toyo vɔk na cáng mɛn, ê to vɔk nap mɛ.

⁴²Yin zǒt hɛn wɛt, ko tele hin me, Dagwi min. BeIsrayɛl ba sé benang de ma nusu na yɛn yi e sevwêl Misra, yaga ano, de be row ɛn e sesam wɛt.

⁴³

⁴⁴Ka sede yin e simo besam, beras kɛ beha ow, ko yin ê tɔk sey vɛ yi na yére dyuk de ya gwɔrɔ hin.

⁴⁵Yin ê tɔk sey besam yi e ji bemat beduk de ba sé sangal e ji min, kɛ yi na yere mɛn de ba tɔs e sevwel min. Bê tɛ́ ɛn pyɛ nedanelɔ min.

⁴⁶Ko yin ê tɔk tik a nèy min hɛn sede pyɛ̂ nedanelɔ, na be nàra e de ra a yɛn fwom vɔk e yɛnɛ̂ neken mɛn. Ko gwa mō WoIsrayɛl, yin zǒt hɛ wɛt.

⁴⁷Ka sede mwat duk a sé sangal tanga yin, a tɛ́ ɛ darwey, ko gwa mō WoIsrayɛl a tɛ́ ɛ pɛ́ng-pɛng, a wɔ̀ row tó mɛ na yɛ, kɛ na hwak e ji belɔ mɛ ayi,

⁴⁸ko a vɔk reto de bê tɔk to viri hɛ, mwa ano de a ga kana nɔng tó mɛ. Hwak e ji begwa mɛ ê tɔk viri hɛ:

⁴⁹kɛ gwa da mɛ, kɛ hwêy gwa da mɛ, kɛ hwak e ji cang mɛ ye bagat. Ko yɛ mwat o ê tɔk viri hɛ pyɛ mɛ, ka sede a sɛ̀ gwong de ê viri hɛ mɛ.

⁵⁰Yɛ WoIsrayɛl de a kana row tó mɛ ê man na mwat de a sey ɛ, na be bara neshey yi e jeng de a row tó mɛ vɔk e Shêy Vibis de he kyè vey. Bê yong ɛ byɛ̂ pyɛ de bê tala tyɛng e gwong de be tala mwat de ba jut ɛ e fwom.

⁵¹WoIsrayɛl de a row tó mɛ ê tala bak dyâm sey o yê bwang nepyak neshey de na rɔngɔl ɛ.

⁵²

⁵³Mwa jeng de a sé na dalɔ mɛ, ko be ra na yɛ sede mwat de ba jut ɛ e fwôm tala gwô shey-shey. A zǒt hɛ wɛt.

⁵⁴Ka sede ba tɔk viri hɛ e begwong vemo wɛt, ko yɛ tanga nèy mɛ, gbing-gbing be ba hala hɛn washak e silâ Shêy Vibis de he kyè vey.

⁵⁵Yaga e me wɛ de BeIsrayɛl ba sé benang. Ba sé bemat hom, yaga ma nusu na yɛn yi e sevwêl Misra. Me wɛ à Dagwi Darwey, Dagwi mɛn.