Read berom Bepiris 26 Bible Online

Bepiris 26 - berom bible

Bepiris 26

¹Dagwi Darwey a ye, “Yin yong a bato min pyɛ cak ye sekwit kɛ rezinâ pyɛ cak, kɛ yin tɛ̀ gwofwa gacik kɛ gwofwa de ba yong mɛ rezinâ pyɛ cak, na yin a re a yɛ fongol wɛt. E me wɛ à Dagwi Darwey, Dagwi min.

²Yin gyeng nepɔngɔ̂ Tuk Shábat, ko nɔng in kwɔ̂n re a me fongol nerey. E me wɛ à Dagwi Darwey.

³“Ka yin a raa Badu hom, na yin a ra pyɛ́ de ma nɔng in nu e ra yɛ,

⁴ko mê tomo a yin na rwak tyɛng e jeng, yaga na vwel he nɔng pyɛ́, na cɔ́gɔt ye mara nèy naka arɔng.

⁵Pyɛ́ min yê sɛ̀ pyak, yin ê rɔ̌ e de bwal e jeng vôs nèy anap, ko yin ê rɔ̌ e de vôs nèy anap o e jeng berê yére. Yin ê sɛ̀ kayɛ pyɛ de yin ê re, yin sirik, ko yin ê sangal tyang e sevwel min, vit a vê repugu de bê hwo e ra yin.

⁶“Mê tɛ̀ netyang e sevwel min, ko yin ê kyese nevwa bɛs. Mê ro ngyāma vyes yi e sevwel o, ko bê to hwo in na como wɛt.

⁷Yin ê di wɛng e ra vê repugu min.

⁸Bemat betungun e ji min zɔng ba vey na be ro bemat repugu min naga (100), ko bemat min naga bê ra ano na yɛn gu kuru (10,000) arɔng, ba rɔda wey na yɛn mwa vit.

⁹“Mê tɛ̀ a yin nerat, ko mê nɔng in nèy na yin karak hin. Mê sila sira hom tanga yin.

¹⁰Bwâl pyɛ́ min gwô sè purak, ko pyɛ́ mo yê wul shêy vey, yin ê paa pyɛ́ ryoso e begban min, na yin sɛ̀ kwɔ̂n shusha pyas o.

¹¹Mê sangal e ji min e buk hom, mê gas me na yin ko tyɔng wɛt.

¹²Mê sè tanga yin, mê sè Dagwi min, ko yin ê sè bemat hom.

¹³E me wɛ à Dagwi Darwey, Dagwi min, de a nusu na yin yi e sevwêl Misra, yaga na e ngamo e nuyel, yin kwon to sè besam mɛn wɛt. Ma ga pat in yi e yé màk mɛn, ma ga hala hin na yin kyè na bato min e gwi.”

¹⁴Dagwi Darwey a ye, “Ka sede yin ê ra pyɛ́ de ma nɔng in nu e ra yɛ wɛt, ko mê tabak hin.

¹⁵Ka yin a kyɛ́ in nà raa Badu hom tanga pyɛ́ de ma nɔng in nu e ra yɛ, na yin a gyili sira de ma ga wuna tanga yin,

¹⁶ko gbɔng reyɔm de mê vey a yin mɛ a ret ngan: gèy-cwey tanga fes de hê lashe bayis min, ko neken min ne tɛ́ ɛ a yin yapyi. Yin ê yɔ́m in e hôw pyɛ́, ko yin ê jut ɛ pyɛ wɛt, yaga e bemât repugu min de bê re pyɛ́ mo.

¹⁷Mê sogo cik e ra yin, yi ano bemât repugu min bê di wɛng, ko vemo de be bɛɛ hin ves bê re negwɔm e ra yin. Yin ê tɛ̀ bengyip, yin ê tele, mwa ano de vit a mwat de a sé ro in.

¹⁸“Ka sede e bamâ pyɛ́ yemo mwa, ko yin a rɔɔ re nuyel na kyɛ́ in nà wok ha hom, ko mê gwɛ̌ tabak hin zang taama.

¹⁹Mê wey na negbarak na tôs to min, mê tɛ̀ be rop rwak wɛt, vwel hê hworok hê tɛ́ ɛ kashalang sede gbondong.

²⁰Ko ka yin a ka ra fwom sede sɛ́ ayi, yin ê sɛ̀ pyɛ wɛt; yaga vwel o hê nɔng pyɛ́ wɛt, ko cɔ́gɔt yê mara nèy arɔng wɛt.

²¹“Ka yin a re nuyel na sogo a me nehywɛ, yin a kyɛ́ in nà wok me, ko mê to me gwɛ̌ tabak hin zang taama e ra here.

²²Mê tomo na ngyāma vyes e ji min, ko yê mɔbɔs nèy min, ye wey na yas min, ko yê tɛt in ɛ tyɔng zɔng, ano de nehyok min nê wey ɛ nà bemat.

²³“Ka sede e bamâ mwa netabak nane yin a wok me wɛt, yin a re nuyel na sogo a me nehywɛ,

²⁴ko mê sogo e ra yin, mê tabak hin yɔkyɔk he dal zang taama here.

²⁵Mê tɛ̀ be vey tó como, na be tabak hin mɛ yaga gyili wuna-na-sira hom. Ko ka yin a jama kwɔ̂n dal e ji bapomo de ba gwɔrɔ vɛ na jwa ko mê tomo na tumbang e ji min de vit a hwal, ko yin ê gaba e vɔ bemât repugu min.

²⁶Mê tɛt nepyak pyɛ̂ re min sɛ̌ beha kuru be wuna pyɛ́ be kyé e repik rining, ko bê masa pyɛ̂ re de bê nɔngɔs hin, yin ê re ko yin ê siris wɛt.

²⁷“Ko ka sede e yɛnɛ̂ mwa pyɛ́ yane yin a wet betong na me wɛt, yin a re nuyel na sogo a me nehywɛ,

²⁸ko shom hom yê sogo puu e ra yin, ko mê to me gwɛ̌ tabak min he dal na neves zang taama e ra nere.

²⁹Vyong yê kat, ko yin ê re banamâ nèy min.

³⁰Mê wey na nekwɔn rê fongol min de na sé e ra berahwol, mê rùnus nekwɔn rangâs pyɛ̂ nesang hyɔɔlɔl min, ko mê basak bavin min e ra pyɛ̂ sekwit min yemo de vit a yɛ na neken. Mê ra repugu na yin.

³¹Mê to sey nenɔrɔ min wɛt, ko mê tɛ̀ bapomo min na nekwɔn rê fongol min be tɛ́ ɛn barin.

³²Mê wey na vwel min hywiri, ko ê yâng bemât repugu min de bê vey sangal e ji hɛ kpɔrɔk na pyɛ de ya tē.

³³Mê tɛ̀ be vey to como na yin, bē shara hin e bavwel baduk. Vwel min hê tɛ́ ɛ gbingiring, ko bapomo min bê tɛ́ ɛn barin arɔng.

³⁴Ko mwa neshey de yin ê sè e ji sesam e vwêl vê repugu min, vwel min de yin a hàla hɛ he ros e tô neshey pɔngɔ de yin a kana nɔ̂ng hɛ wɛt jeng de yin á sè sangal e ji hɛ.

³⁶“Ko bwang min de ba hashe vɔk e sevwêl bemât repugu min, mê tɛ̀ bengyip e neyey min, wûs berang de gul gwo pɛsɛl zɔng hê tɛ̀ in yin tele. Yin ê tiris bol, yin e raa yin gabsa e ra bemin na yin hywit a wal, mwa ano de ba sé ro in wɛt. Ko yin ê kyɛm yin ra como na hwak e ji bemât repugu min wɛt,

³⁸yin ê wey ɛ e ji yére dyuk, vwêl bemât repugu min hê ye mɔ̌t à hin.

³⁹Ko bwang min de ba tɛt ɛ e ji bavwêl bemât repugu min yin ê sɔ in yaga banɛn min na vê bedabeda min.

⁴⁰“Ko yére min yê kulu banɛn mɛn na vê beda mɛn, yɛn ê tē tɔgɔ de ba ga buru, de ba sogo a me nehywɛ,

⁴¹ko bê tɔk, ma ga sogo e ra yɛn, ma vɔk na yɛn e sevwêl bemât repugu mɛn. Ko e bama de yere min o ya dyɛng bato mɛn, ya ga tala pyɔlɔ̂ banɛn mɛn,

⁴²ko mê bare na sira hom de ma kana wuna na Yakɔp, na Yishak tanga Abraham, ko mê to yong sira hom na me nɔ̂ng bemat hom sevwel o.

⁴³Ko gyam na me ra ano, gbing-gbing sɛ̌ ba tanga ro bemât sangal e vwel o, na he wok nerât pɔngɔ jeng de ha sé e ros, sɛ̌ bemat hom ba tala pyɔlɔ̂ banɛn mɛn, yaga gyili badu, na pyɛ́ de ma nɔng ɛn nu e ra yɛ.

⁴⁴Ko mwa ano, jeng de yɛn ê rɔngɔl e sevwêl bemât repugu mɛn, mê ye waa a hɛn, kɛ me wey na yɛn hywiri na me tik nà sila sira hom na yɛn wɛt. E me wɛ à Dagwi Darwey, Dagwi mɛn.

⁴⁵Mê to yong sira hom de ma kana wuna na beda mɛn, jeng de ma dura a mwa yére dyuk reto hom yi na nusu na bemat hom yi e sevwêl Misra. Ma ra ano, na me sè Dagwi mɛn. E me wɛ à Dagwi Darwey.”

⁴⁶Vemo vɛ a badu na pyɛ́ de Dagwi Darwey a nɔ̂ng Mose nu e ra yɛ e Raku Sinai yaga BeIsrayɛl.