Read berom Bepiris 27 Bible Online

Bepiris 27 - berom bible

Bepiris 27

¹Dagwi Darwey a yang Mose, a ha a BeIsrayɛl neha nemo ngan: Ka sede mwat hwak a sira a Dagwi yaga e simo pyɛ cak yi na yɛ, a sira hɛ, ê nɔng ɛ mwasi, ko ê tɔk tala dyām na a viri mɛ mwasi mo.

³A rɔda tala na shɛkɛl dyam pyɛng tyɛng na masâ dyām ye kwɔ̂n rê fongol: Beras, yi e neshey kuru baba vɔk e kuru batyiimin, shɛkɛl kuru batungun, Beha vê neshey nane mo arɔng, shɛkɛl kuru batat, Bewen, yi e neshey netungun vɔk e kuru baba, shɛkɛl kuru baba, Behwong vê neshey nane mo arɔng, shɛkɛl kuru rining, Nèy bewen, yi e pwɛl gwining vɔk e neshey netungun, shɛkɛl betungun, Nèy behwong ne neshey nane mo arɔng, shɛkɛl betat. Mwakuk de a dal neshey kuru batyiimin, shɛkɛl kuru na vɛ betungun, Gwahwā, shɛkɛl kuru rining.

⁸Ka sede mwat de a sira hɛ mo a sé pɛ́ng-pɛng, a tɔk tala pyɛ de ba tɛ̀ mo wɛt, ko ê vey a piris hom na mwat de a nɔng e sira mo, yɛ piris o ê tɛ̀ dyām o lɛgɛm, tyɛng na pyɛ de mwat o ê kyɛm a tala.

⁹Ka sira mo ha sé hê yas de be nása vɔk na Dagwi Darwey, ko tik na ye sè yemo de be sey yɛ e nɔrɔ̂ rangas. Ano, yas o yê tɛ́ ɛ jaram yaga Dagwi Darwey.

¹⁰Ko mwat de a sira mo ê to tɔk sege na yas o cak wɛt. Ka a ra ano, ko mwa yas bya mo ya rɔda sè ye Dagwi Darwey.

¹¹Ka sira mo ha sé hê yas de ya sé kyiri, de ya jam yaga nára mɛ nɔrɔ wɛt, ko bē wɔ́ mɛ na piris hom.

¹²Yɛ ê tɛ̀ dyam o tyɛng na nerât yɛ, ko bē tala tyɛng ano, vit a sege.

¹³Ka sede da mo a simo a viri yas mɛ mo, ko a gwɛ̌ dyām o zang hining e ji zang tungun.

¹⁴Ka sede mwat a tik lɔ mɛ jaram yaga Dagwi Darwey, ko piris ê tɛ̀ dyām o tyɛng e ra nerât hɛ, bē tala tyɛng ano, vit a sege.

¹⁵Ka sede mwat de a tik lɔ mɛ jaram o, e to simo sey hɛ, ko a gwɛ̌ dyām o zang hining e ji zang tungun.

¹⁶Ka sede mwat a tik bak nap mɛ jaram yaga Dagwi Darwey, ko bê tɛ̀ dyām o tyɛng na nepyak yére de cap o ye re, e nû shɛkɛl dyam pyɛng kuru batungun e ra shīt tyat yê baale.

¹⁷Ka sede a tik nap o jaram mwas silâ Shêy Vibis, ko bê tɛt dyām o wɛt.

¹⁸Ka sede a tik yɛ jaram e bamâ jeng cak, ko piris hom ê tɛt dyām o tyɛng na nepyak neshey de na tɛt ɛ vɔk e Shêy Vibis de he kyè vey.

¹⁹Ka sede mwat de a tik yɛ jaram o e simo a to toyo na nap o, ko a gwɛ̌ dyām o zang hining e ji zang tungun.

²⁰Ka sede a nɔ̂ng mwat hwak nap o e lek, yɛ a sè rɔngɔl nà viri wɛ yi e vwɔ̂ Dagwi Darwey, ko ê to vɔk gwông virî wɛ ko tyɔng wɛt.

²¹Jeng de Shêy Vibis ha to vey, ko nap o wô tɛ́ ɛ wo Dagwi Darwey nesheneshey, ko wô tɛ́ ɛ nap wo bepiris.

²²Ka sede mwat a tik cap de a ga kana sey jaram yaga Dagwi Darwey,

²³ko piris ê bara dyām o tyɛng na nepyak neshey de na tɛt ɛ vɔk e Shêy Vibîs de he kyè vey. Dyām o yê sè yê Dagwi Darwey, ko mwat o ê tala yɛ tuk o e kwɔ̂n rê fongol.

²⁴E silâ Shêy Vibis, ba rɔda toyo a da mo, kɛ yére mɛ na cap o de bá kana sey bá tik jaram yaga Dagwi.

²⁵Nû dyām mwa de bê tɛ̀, ye sè tyɛng na masâ dyām de be ra mɛ fwom e kwɔ̂n re a Dagwi ɛ fongol.

²⁶Kahɛ hwêy yas hê susu mo ha sé hê Dagwi Darwey. Yaga ano, vit a mwat de ê tik hɛ jaram sede nɔrɔ̂ yey pyɛng, kɛ ha sé hwêy rɔndɔng, kɛ vyel pyɛng kɛ vyel shi ayi, yaga ha kana sé hê Dagwi Darwey.

²⁷Ko tɔ̂ susu he yas de ya sé kyiri, da mo ê tɔk to sey yɛ tyɛng e nû dyām de ba yɛrɛ na gwɛ̂ zang hining e ji zang tungun. Ko ka sede a sey yɛ wɛt, bepiris bē row a mwat hwak tyɛng e nû dyām o.

²⁸Ka sede mwat a tik mwasi, kɛ yas, kɛ nap jaram yaga Dagwi Darwey e gwong de bê tɔk toyo mɛ wɛt, ko vit a mwat de ê to viri kɛ a row pyɛ mo. Ya sé jaram yaga Dagwi Darwey nesheneshey, ya sé pyɛ de ya dal mwa na nejɛrɛ.

²⁹Ka a ka sé mwasi de ba ga kana tik ɛ jaram e gwong de bê tɔk toyo mɛ wɛt, ko bê kyɛm be to viri hɛ wɛt, ko bē mɔrɔ hɛ.

³⁰Pyɛ jining e ji yɛ̄ kuru ye pyɛ̂ vwel kɛ ye nèy cɔ́gɔt ya sé ye Dagwi Darwey.

³¹Kawɛ de e simo a viri yɛ, ko a tala nû dyām o tyɛng, na a gwɛ̌ ɛ zang hining e ji zang tungun.

³²E jeng barâ yas, kayɛ ye kuru de yê kwey e nɛ̂n gwelê lwek o, ye sè ye Dagwi Darwey.

³³Da mo ê kasa vyes o yi e ryát o wɛt, ko ê tɔk sege yɛ arɔng wɛt. Ka ba ka sege, ko mwa yas bya mo yê se ye Dagwi Darwey, bê tɔk viri yɛ wɛt.

³⁴Badu ma vemo de Dagwi Darwey a kana nɔ̂ng Mose e Raku Sinai yaga BeIsrayɛl.