Read berom Bepiris 4 Bible Online

Bepiris 4 - berom bible

Bepiris 4

¹Dagwi Darwey a ha a Mose a yang ɛ,

²a ha a BeIsrayɛl ngan: Ka sede mwat hwak a ra renɛn, a ra pyɛ de Dagwi Darwey a yâng yɛ kyiri, mwa ano de a tɔk, a ra renɛn wɛt, ko a rɔda gyeng badu vemo ngan:

³Ka sede a sé e darwêy bepiris de a ra renɛn, ko renɛn o ra sé rê bemat o arɔng, tik na a vey na bwôt mus de wa vɔk rām kɛ pyɛ cak vyes wɛt, na a nára wɛ nɔrɔ̂ fûng banɛn.

⁴Tik na a vey na mus o e rwi bûk sangâl Dagwi. A rɔda tɛ̀ vɔ mɛ e ra tô wɛ, na a yɛrɛ wɛ e hwomo e nuyêl Dagwi Darwey.

⁵Yɛ darwêy bepiris o a rɔda vɛ nemi mo na a yel mɛ e buk o.

⁶A rɔda gyira kwɛn vwɔ mɛ e ji nɛ, na a zagat nɛ zang taama e vwel e nuyêl gworugu dûl Kwɔn Jɛrɛ Hê Jɛrɛ.

⁷A rɔda tɛ̀ nemi mo nehak e ra pyɛ́ de ya sé sede badûk gàgbang rangâs pyɛ̂ nesang hyɔɔlɔl de wa sé e ji buk o. Ko bwâng nemi mo kwong a rɔda losho nɛ e retîs gàgbang rangâs yas de wa sé e rwi buk o.

⁸E bama mo, a rɔda paa mwa sebwêp banama mo, sɛ à mwa sebwêp pyɛ̂ jim o,

⁹na pyík o na mwa bwêp yɛ̄, tanga cûng bwêp yey o de a rɔda paa na pyík o,

¹⁰tyɛng sede remo de e paa yerê pyɛ́ yane yi e ji mus de be rangas yaga nɔrɔ̂ wunâ nesa, ko a rɔda rangas yɛ e ra gàgbang rangâs yas.

¹¹Ko a rɔda jut rehwô mus o tanga mwa banama mo, na to mo, na bol o, mwa na balagey na beving o,

¹²wɔgɔ, mwa bwâng pyɛ́ de ya tɛt ɛ e ji mus o, na a jut wɔ e bamâ jêy kwɔ̂n ye ngyɔk, e kwɔn de ha sé haalal, kwɔn de be lusha ɛ nefongôl kya ne gàgbang rangâs yas, na be rangas ɛ yɛ̄ e ra kyâ cɔ́gɔt.

¹³Ka sede a sé e regyɛng BeIsrayɛl mwa de ba ra pyɛ de Dagwi Darwey a yâng yɛ kyiri, mwa ano de yɛn a tɔk, e renɛn wɛt, ko ba ga ra renɛn à rane.

¹⁴E bama de bemat o ba ga di renɛn de ba ga ra, tik na be vey na bwôt mus, yaga nɔrɔ̂ fûng banɛn, ko bê vey mɛ e nuyêl bûk sangâl Dagwi.

¹⁵Bemakûk regyɛng BeIsrayɛl ba rɔda tɛ̀ vɔ mɛn e ra tô mus o, ko yɛn a rɔda yɛrɛ wɛ e nuyel mɛ.

¹⁶Gbɔng piris a rɔda vɛ nemi mo na a yel mɛ e buk o.

¹⁷A rɔda gyira kwɛn vwɔ mɛ e ji nɛ, na a zagat nɛ zang taama e vwel e nuyêl gworugu dûl Kwɔn Jɛrɛ Hê Jɛrɛ.

¹⁸A rɔda tɛ̀ nemi mo nehak e ra pyɛ́ de ya sé sede badûk gàgbang rangâs pyɛ̂ nesang hyɔɔlɔl de ha sé e ji buk o. Ko bwâng nemi mo kwong, a rɔda losho nɛ e retîs gàgbang rangâs yas de wa sé e rwi buk o.

¹⁹E bama mo, a rɔda paa mwa sebwêp banama mo, ko a rangas sɛ e ra gàgbang rangâs yas.

²⁰A rɔda ra na mus o tyɛng sede remo de á kana ra na mus de bá nára wɛ yaga halâ banɛn. Ko e bama de a ra pyɛ de ya dura talâ-nɛn yaga BeIsrayɛl o, Dagwi a rɔda hala a yɛn banɛn mɛn.

²¹Ano arɔng, a rɔda jut mus o wɔ e bamâ kwɔ̂n ye ngyɔk, na a rangas wɛ, sede remo de á rangas mus de a nára yaga to mɛ. Hemo hɛ à nɔrɔ de ba ra yaga halâ banɛ̂n regyɛng BeIsrayɛl.

²²Ka sede a sé hwak e ji bemât nuyêl yére BeIsrayɛl de a ra pyɛ de Dagwi Darwey, Dagwi mɛ a yâng yɛ kyiri, mwa ano de a tɔk, e renɛn wɛt, ko a ga ra renɛn à rane.

²³E bama de a ga di renɛn de a ga ra, ko tik na a vey na gam de wa vɔk ram kɛ pyɛ cak vyes wɛt, yaga narâ nɔrɔ mɛ.

²⁴A rɔda tɛ̀ vɔ mɛ e ra tô wɛ, ko a yɛrɛ wɛ e nuyêl bûk sangâl Dagwi e kwɔn de be yɛt ɛ̀ yas de be rangas burang vɔk na Dagwi. Hemo ha sé nɔrɔ̂ fûng banɛn.

²⁵Ko piris a rɔda gyira kwɛn vwɔ mɛ e ji nemi mo, na a tɛ̀ nɛ e ra pyɛ́ de ya sé sede badûk gàgbang rangâs yas. Ko bwang nemi mo a rɔda losho nɛ e retîs kwɔn o.

²⁶Ano, a rɔda rangas mwa sebwêp gam o e ra gàgbang rangas o, sede remo de á rangas sebwêp yas de bá nára yaga nɔrɔ̂ wunâ nesa. Ko e bama de a ra pyɛ de ya dura talâ-nɛn yaga mwât nuyel o, Dagwi a rɔda hala a yɛ renɛn mɛ.

²⁷Ka sede a sé mwat hwak e ji regyɛng BeIsrayɛl de a ra pyɛ de Dagwi Darwey a yâng yɛ kyiri, mwa ano de a tɔk, e renɛn wɛt, ko a ga ra renɛn à rane.

²⁸E bama de a ga di renɛn de a ga ra, ko tik na a vey na shep vyel de ya vɔk ram kɛ pyɛ cak vyes wɛt yaga nára nɔrɔ mɛ.

²⁹A rɔda tɛ̀ vɔ mɛ e ra tô vyel o, ko a yɛrɛ yɛ e kwɔn de be yɛt ɛ yas de be rangas burang vɔk na Dagwi.

³⁰Ko piris a rɔda gyira kwɛn vwɔ mɛ e ji nemi mo, na a tɛ̀ nɛ e ra pyɛ́ de ya sé sede badûk gàgbang rangâs yas. Ko bwang nemi mo a rɔda losho nɛ e retîs kwɔn o.

³¹E bama mo, a rɔda paa mwa sebwêp shep vyel o, tyɛng sede remo de be paa sebwêp banama de be nása yaga nɔrɔ̂ wunâ nesa, ko a rɔda rangas sɛ e ra gàgbang rangâs yas, yaga na nesang nɔrɔ mo ne pɛngɛ a Dagwi Darwey yey. Ko e bama de a ra pyɛ de ya dura talâ-nɛn yaga mwat o, Dagwi a rɔda hala a yɛ renɛn mɛ.

³²Ko ka sede mwat o a vey na shep vyel pyɛng e tô vyel shi yaga renɛn mɛ, ko tik na a vey na shep o de ya vɔk ram kɛ pyɛ cak vyes wɛt.

³³A rɔda tɛ̀ vɔ mɛ e ra tô yɛ, ko a yɛrɛ yɛ e kwɔn de be yɛt ɛ yas de be rangas burang vɔk na Dagwi.

³⁴Ko piris a rɔda gyira kwɛn vwɔ mɛ e ji nemi mo, na a tɛ̀ nɛ e ra pyɛ́ de ya sé sede badûk gàgbang rangâs yas. Ko bwang nemi mo, a rɔda losho nɛ e retîs kwɔn o.

³⁵Ano arɔng, a rɔda paa mwa sebwep o, tyɛng sede remo de be paa sebwêp banama vyel de be nása yaga nɔrɔ̂ wunâ nesa, ko a rɔda rangas sɛ e ra gàgbang rangâs yas tanga bwang nenɔrɔ̂ pyɛ̂ re de be nása vɔk na Dagwi Darwey. Ko e bama de a ra pyɛ de ya dura talâ-nɛn yaga mwat o, Dagwi a rɔda hala a yɛ renɛn mɛ.