Read berom Bepiris 7 Bible Online

Bepiris 7 - berom bible

Bepiris 7

¹Vemo vɛ a badu e ra begwong nása nɔrɔ̂ talâ banɛn de ha sé pyɛ de ya dal mwa na nejɛrɛ.

²Ba rɔda yɛrɛ yas o e vwɔ yege gwô gàgbang rangâs yas e kwɔn hining o de be yɛt ɛ̀ yas yaga nɔrɔ̂ yas burang, ko nemi mo bê waram nɛ e mwa bebak gàgbang rangâs yas o.

³Ba rɔda paa mwa sebwep o, na rum o, na sebwêp pyɛ̂ jim o,

⁴na pyík o na mwa sebwêp yɛ, tanga cûng bwêp yey o de ba rɔda paa mwa na pyík o.

⁵Piris a rɔda rangas mwa e ra gàgbang rangas o, ha sé nɔrɔ̂ pyɛ̂ re de ba rangas vɔk na Dagwi Darwey. A sé nɔrɔ yaga talâ banɛn.

⁶A sé e beras zɔng e ji belɔ̂ piris de bê tɔk re banama mo, ko a sé gbing-gbing be re vɛ e kwɔn de ha sé jɛrɛ. A sé pyɛ de ya dal mwa na nejɛrɛ.

⁷Redu narâ nɔrɔ̂ fûng banɛn ra sé tyɛng na rê talâ-nɛn. Banama mo ba sé yaga piris de a nára nenɔrɔ mo.

⁸Ko ka sede mwat hwak a vey na nɔrɔ̂ yas burang, a sé e piris de e nára nɔrɔ mo, de ê vɔk rehwô yas o.

⁹Ko mwa nɔrɔ̂ nemuk de ba yong e kwɔ̂n kyê kpam-tuk kɛ e ra rwêy dyam dɛdɛrɛng, kɛ ba halang e rwêy dyam, ha sé hê piris de a nára hɛ.

¹⁰Ko mwa nɔrɔ̂ nemuk de ba kyé nɛ wɛt, kɛ ba suk nɛ na něy, kɛ ba yong nɛ nehwogot, na sé ne bepiris mwa, na yɛn a gas nɛ tyɛng e bato mɛn.

¹¹Vemo vɛ a badu e ra begwông nása nenɔrɔ̂ wunâ nesa vɔk na Dagwi Darwey:

¹²Ka sede mwat hwak a simo nára nɔrɔ na a dura mɛ feng mɛ, ko tik na a wuna nɔrɔ̂ yas mɛ mo na hê kpam-tuk rɔkrɔk de ba suk na něy sana géy-sing, na kpam-tuk bagasak sana géy-sing de ba mɔmɔ na něy, tanga nekpam-tuk rɔkrɔk ne nemuk nerat de ba suk na něy.

¹³Ko ê to gwɛ̌ kpam-tuk de ba yong na géy-sing e ra nɔrɔ̂ wunâ nesa mo.

¹⁴A rɔda vey na pyɛ́ mo, ko a vɛ́sɛ yɛ jijining yaga Dagwi Darwey. E bama mo, pyɛ́ mo ya rɔda sè yê piris de a waram nemî yas e gàgbang rangâs yas.

¹⁵Ba rɔda re banamâ yas o e tuk de ba nára nɔrɔ mo. Be kwon tɛt ɛ bwang hɛ vɔk e nagasi wɛt.

¹⁶Ko ka sede mwat hwak a simo nára nɔrɔ̂ wunâ nesa yaga a ga kana sira e ra pyɛ cak, kɛ yaga simo mɛ zɔng ayi, ko ba rɔda re banama mo tuk o, ka sede bwang o gwa pɔl, ko be ba re vɛ nusû hwol arɔng.

¹⁷Ka sede bwang banama mo ba to tɛt ɛ e tuk hê netat, ko bê rangas vɛ hywiri.

¹⁸Ko ka sede ba re bwang banama de gwa tɛt ɛ e tuk hê netat o, ko Dagwi ê sey nɔrɔ̂ mwat wane mo wɛt, mwat o ê sɛ̀ pyɔlɔ ryat arɔng wɛt, yaga ba ga tɛ́ ɛ ligis, ko kawɛ mwat de a re vɛ, ba rɔda kaba hɛ na gyili redu mo.

¹⁹Banama de pyɛ cak ye ligis ya ga ra, ko be kwon re vɛ wɛt, be rangas vɛ vit. Kawɛ mwat de a sé haalal ê tɔk re banamâ nɔrɔ mo.

²⁰Ka sede mwat de a sé ligis a re rehak e ji banamâ nɔrɔ̂ wunâ nesa de ba ga nára a Dagwi Darwey, a ga row neken mɛ, ko bê ró ɛ yi e ji bemat mɛ.

²¹Ka sede mwat hwak de a ra pyɛ de ya sé ligis — kɛ ye mwasi, kɛ ye ngyama ayi, kɛ kayɛ pyɛ cak de ya sé ligis, ko a re banamâ nɔrɔ hemo, a ga row neken mɛ, ko bê ró ɛ yi e ji bemat mɛ.

²²Dagwi Darwey a to ha a Mose, a yang ɛ,

²³a nɔ̂ng BeIsrayɛl badu vemo ngan: Mwat hwak a kwon re sebwêp ngyī, kɛ vyēl pyɛng kɛ shi wɛt.

²⁴Ko be kwon re sebwêp yas de ba sɛ̀ ya ga ku, kɛ yane de ngyama ya mɔrɔ arɔng wɛt, ko bê tɔk ra mɛ kagwɛ fwom hwak na hɛ.

²⁵Kawɛ mwat de a rɔda re sebwêp yas de ba rɔda nára a Dagwi Darwey yɛ nɔrɔ̂ pyɛ̂ re, a ga row neken mɛ, ko bê ró ɛ yi e ji bemat mɛ.

²⁶Ano arɔng, kagwa de BeIsrayɛl ba sé sangal ɛ, be kwon re nemi ko tyɔng wɛt, kɛ ne benon, kɛ ne yas ayi.

²⁷Ka sede mwat hwak a re nemi, a ga row neken mɛ, ko bê ró ɛ yi e ji bemat mɛ.

²⁸Dagwi Darwey a to ha a Mose, a yang ɛ,

²⁹a nɔ̂ng BeIsrayɛl badu vemo ngan: Kawɛ mwat de ê vey nára nɔrɔ̂ wunâ nesa, tik na a nɔ̂ng Dagwi Darwey bak o winde wa sé mwɛ.

³⁰Ko yɛ mwat o pyɛ mɛ ê wɔ na bebak o, vɛ a sebwep o mwa na cɔ̌ mo, ko a ra mɛ, sede ba sé nára a Dagwi Darwey nɔrɔ̂ yɛ.

³¹Piris a rɔda rangas sebwep o e ra gagbang rangas yas, ko cɔ̌ mo yê sè ye bepiris.

³²Ko fwa mo gwô yege gwô sè gwô piris de ê nára nemi tanga sebwêp nɔrɔ̂ wunâ nesa mo, gwô tɛ́ ɛ numo mɛ.

³⁴Yi e ji yas de BeIsrayɛl bê nára nɔrɔ̂ wunâ nesa, Dagwi Darwey a ga pat ɛ cɔ̌ mo tanga fwâ yege mo, a nɔ̂ng bepiris mɛ, na ye sè numo mɛn. Yemo ya sé pyɛ de BeIsrayɛl bê nɔngɔ̂s bepiris nesheneshey.

³⁵Pyɛ́ yane ya sé numo hê Aharon tanga nèy mɛ yi e ji nɔrɔ̂ pyɛ̂ re de ba nára a Dagwi Darwey yi e tuk de ba tɛ̀ ɛn, be ra fwôm bepiris.

³⁶E tuk o de ba shushu hɛn na něy, Dagwi Darwey a tɛ̀ redu wɔgɔ, BeIsrayɛl be nɔngɔs hɛn nû pyɛ́ yane mo. Hemo ha sé redu yaga bezamang mɛn mwa vɔk e nuyel.

³⁷Vemo vɛ a badu e ra begwong nása nenɔrɔ̂ yas burang, na nenɔrɔ̂ nemuk, na nenɔrɔ̂ fûng banɛn, na nenɔrɔ̂ talâ banɛn, na nenɔrɔ̂ wunâ nesa tanga nenɔrɔ̂ tɛ́ ɛn bepiris.

³⁸Dagwi Darwey á kana nɔ̂ng Mose badu vemo e Raku Sinai e hey, tuk de á ha a BeIsrayɛl be vey a yɛ na nenɔrɔ mɛn.