Read berom Yirmiya 1 Bible Online

Yirmiya 1 - berom bible

Yirmiya 1

¹Neha Yirmiya Hilkiya a nemo, yɛ á sè hwak e ji bepiris e repomo Anatot e yɛnɛ sevwel Bɛnyamin.

²Dagwi Darwey a ha na yɛ e shey he kuru na hɛ tat de Yɔsiya Amɔn a se gbɔng gwɔ̀m Yuda,

³ko a to ha na yɛ e jeng de Yɛhɔyakim Yɔsiya á sè gbɔng gwɔ̀m. E bama mo, Dagwi Darwey a to ha na yɛ, pere vɔk e shey he kuru na hɛ hining he negwɔm Zɛdɛkiya Yɔsiya. A sé e ji pwɛl gwo netungun gwo shey hane mo de ba hashe bemat Yɛrusalɛm vɔk e de sesam.

⁴Dagwi a ha na Yirmiya, a ye,

⁵“Ma tɔ̀k o gyam na hwo se kwen e jim neng mo, ma tik o jaram gyam na be tɔ o, Ma tɛ̀ hwo se zarap hom vɔk na yére bemat jey.”

⁶Ma toyo a yɛ, ma ye, “Áaa, à Dagwi Darwey! Ma tɔk há wɛt. Ma sé hwey zɔng.”

⁷Ko Dagwi Darwey a yang me, “Hwo ye hwà sé hwey zɔng wɛt. Ko ci na bemat de ma tomo hwo na yɛn, na hwo ha a yɛn kayɛ pyɛ de ma nɔng o nu e ra yɛ.

⁸Hwo wok bengyip mɛn wɛt, yaga mê sè na hwo, na me gyep o. Me Dagwi Darwey ma ha ano!”

⁹Ano kwong, Dagwi Darwey a nára vwɔ mɛ, a ra mɛ bebɛrɛk nu hom, ko a yang me, “Di, ma ga tɛ̀ ha hom e nu mo.

¹⁰Di, yunung ma nɔng o reto e ra yere bemat jey na e ra segwɔm detidetu, yaga na hwo luyu, hwo gangas, hwo wey mɛ, hwo bugut, hwo to lɔk, hwo to tus arɔng.”

¹¹Dagwi Darwey a rangal me, a ye, “À Yirmiya, e sɛ de hwà di ɛ?” Ma toyo a yɛ, ma ye, “Ma di lâng cɔgɔt almɔn.”

¹²Ko Dagwi Darwey a ye, “Ey, hwà di yɛt, yaga ma sé bɛrɛng naka na me di de neha hom nê sila mwin.”

¹³Ano arɔng, Dagwi Darwey a to ha na me, a ye, “E sɛ́ de hwà di arɔng ɛ?” Ma toyo a yɛ, ma ye, “Ma di rwey de he tē puu e rwa bato, ko ha sé sede hê ye gyèbet vey e rwa batin.”

¹⁴Ko a yang me, “Gawey ha rɔda ye puu, e rwa bato ko he lusha hɛ e ra mwa bemat de ba sangal e sevwel semo,

¹⁵yaga ma sé yila mwa yére bemat jey yê rwa bato na be vey. Begbɔng begwɔ̀m mɛn ba rɔda ba tɛ̀ beta negwɔm e rùhup Yɛrusalɛm, na be gwɔrɔ mɛ jwâ-pomo mo, tanga mwa bapomô Yuda.

¹⁶Mê tabak bemat hom yaga yɛn a ga ra banɛn; yɛn a ga kyini me, ba ga nása a bedagwi beduk nenɔrɔ pyɛ̂ rangas, yɛn a ga yong cī na vɔ mɛn ko yɛn a re a yɛ fongol.

¹⁷À Yirmiya, yong o, ci wɔ ha a yɛn kayɛ pyɛ de ma nɔng o nu na hwo ha a yɛn. Hwo wok bengyip mɛn a remo wɛt, ka hwà ra ano ko mê tɛ̀ hwo gwɛ̌ vo bengyip jeng de hwà sé na yɛn.

¹⁸À Yirmiya, di, ma ga tɛ̀ hwo sè sede repomo de ba gwɔrɔ na jwa, na sede swesek dyam, na sede jwa-pomo wo dyam pama, na hwo tumal e ra mwa vwel o e ra begwɔ̀m Yuda, na nèy lɔ gwɔ̀m, na bepiris mɛn, tanga mwa bemât vwel o.

¹⁹Yɛn ê se sede bemat tô como na hwo, ko yɛn ê di wɛng e ra hwo wɛt, yaga ma sé tanga hwo, me Dagwi Darwey ma ha ano, yaga na me gyep o.”