Read berom Yirmiya 10 Bible Online

Yirmiya 10 - berom bible

Yirmiya 10

¹À yin BeIsrayɛl, wok in ha de Dagwi Darwey a vɔk yaga yin,

²a ye ngan: “Yin raa begwông yere bemat jey behak wɛt, yin tɛ̀ bengyip na pyɛ́ dyuk de yin ê di e lagwi wɛt, mwa ano de yére bemat jey cak yê wok bengyip yɛ.

³Yaga negwɔn bemat o na sé yapyi zɔng. Yɛn e tara cɔgɔt e rehwot ko mwat fwom cɔ́gɔt e tsep yɛ na shùbuk mɛ.

⁴Yɛn e tɔrɔ yɛ na dyam pyɛng tanga dyam shinang, ko yɛn a manas yɛ na remos tanga bekpɛk, yaga na ye kwon shara hɛ wɛt.

⁵Pyɛ̂ sekwit yane ya sé sede pyɛ réne pyɛ e bwi bàbe, ko ye tɔk ha wɛt. Be kyě hashe yɛ zɔng, yaga ye tɔk kyè wɛt. Hwo wok bengyip yɛ wɛt, yê tɔk mǎ hwo wɛt, ko yê tɔk ra a hwo pyɛ cak ryat arɔng wɛt.”

⁶À Dagwi Darwey, vit a mwat hwak sede hwo. Hwà vɔk reto sizɔng, ko reza mo ra sé rerey.

⁷E wa de ê tik nà nɔng o nerey, à hwo gbɔng gwɔ̀m yére bemat jey ɛ? A sé tyɛng na be nɔng o nerey. Vit a hwak sede hwo, e ji ve netsitsɛng ve yére bemat jey, na e ji segwɔm mɛn mwa, vit à hwak sede hwo.

⁸Mwa hɛn ba sé betɔn sana netsitsɛng. Yɛn ê tɔk masa sɛ́ na cī de ba yong na cɔgɔt ɛ?

⁹Ba lolom yɛ na dyam pyɛng yi e Tarshish, na dyam shinang yi e Ufas. Mwa ya sé pyɛ̂ bemat sekwɛl, na yê vwɔ zu dyam shinang, ba tɔrɔ yɛ na gworugu gwoswinang, na gwozwey de bemat sekwɛl ba lɔk.

¹⁰Ko hwo, Dagwi Darwey, à Dagwi wo mwin. Hwà sé Dagwi wo neken, na gbɔng gwɔ̀m gbak-gbak. Jeng de hwó vo shom, ko jey mwa ye vow, yere bemat jey ye tɔk nàra na shom mo wɛt.

¹¹À yin bemat, ha in a yɛn, bê wey na bedagwi de ba tɔk yong jey na lagwi wɛt. Yɛn ê wey e jey na e nɛ̂n lagwi mwa.

¹²Dagwi Darwey a yong jey na reto mɛ, a yong jey na netsitsɛng mɛ, ko a shara lagwi mwa na tɔ́k mɛ.

¹³Nshi larwak ne lulum ras de a nɔng nɛ nu, e vɛ̀sɛ na bale yi e neyɛnɛ jey. E tɛ̀ gbara wo tē dɛbɛt e ji rwak, ko e tomsal na gul yi e gban mɛ.

¹⁴Sede bemat bé di ano, be bɛrɛng bato mɛn sede betɔn, sana netsitsɛng, bezu dyam shinang be vo rekyen pyɛ́ mɛn o, yaga pyɛ́ mo ya sé bɔs zɔng, vit a nesong e ji yɛ.

¹⁵Ya vɔk nerat nehak wɛt, ya sé pyɛ byɛs zɔng, bê wey na yɛ, jeng de Dagwi Darwey ê tabak yɛ.

¹⁶Dagwi Darwêy Yakɔp a sé sede yɛn wɛt. E yɛ wɛ de a yong kayɛ pyɛ, ko a ga kasa BeIsrayɛl na be sè bemat mɛ pyɛ mɛ. Reza mɛ à Dagwi Darwey, Da Jey Mwa.

¹⁷À yin bemat Yɛrusalɛm, tula hin pyɛ́ min, ba ga rɔnɔ hin na como.

¹⁸Dagwi Darwey a ye: “Mê lagam hin yin bemât vwel hemo e jeng yemo, ko mê vey na rezot e ra yɛn yaga na yɛn a wok nepep o.”

¹⁹Bemat Yɛrusalɛm ba ye, “Yaa kukuuk! Ba ga mǎ hot tyɔng wɛt! Baram mot bê vel wɛt! Mwin tabak mot à hemo, ko wot ê niri na hɛ.

²⁰Ba ga wey na bǔk mot, rǐk rɔgɔs o ba ga tuyu hɛn. Mwa nèy mot na ga kyè, ko hak ha tɛt ɛ wɛt. Vit à winde ê to tɛ̀ buk hom, na a to tɛ̀ berugû bang gwɛ.”

²¹Ma ye, “Bemat nuyel mot ba sé betɔn, yɛn e rangal Dagwi Darwey pyɛ wɛt, yaga ano yɛn a tɔk sɛ̀ pyɛ wɛt, ko bemat mot sede tyīmit ba ga shara hɛn.

²²Wet in betong! Lwɛ́lɛ gwo kyè vey, gbɔng sogo nehywɛ yi e vwel rwa bato, na be tɛ̀ bapomo Yuda hey gbingiring, kwɔn sangal nevu-hey.”

²³À Dagwi Darwey, ma tɔk begwong mwat ba sé e vwɔ mɛ wɛt, vit à mwat de a vɔk reto e ra neken mɛ pyɛ mɛ.

²⁴À Dagwi Darwey, yong buru bemat mo, tyɛng na gap mot, hwo tabak hot e ji shom wɛt, yaga hwô wey na wot hywiri.

²⁵Doyo shom mo e ra yére bemat jey de ye re a hwo fongol wɛt, na e ra vemo de ba kyɛ́ ɛn nà yila e ra reza mo. Yaga yɛn a ga wey na Yakɔp, yɛn a ga wey na yɛ pere wɔ̀ yɛnɛ hɛ, ko yɛn a ga wey na kwɔn sangal mɛ arɔng.