Read berom Yirmiya 11 Bible Online

Yirmiya 11 - berom bible

Yirmiya 11

¹Dagwi Darwey a yang Yirmiya,

²“Wet betong na batin hâ wuna-na-sira hemo. Ha a BeYuda na bemat Yɛrusalɛm,

³Me Dagwi Darwey, Dagwi Israyɛl, ma ga tɛ̀ gawey e ra kawɛ mwat de a tik nà gyeng batin hâ wuna-na-sira

⁴hemo de mà nɔng bedabeda min, jeng de mà kana pat ɛn yi e sevwel Misra, sevwel de sà kana sè a yɛn pep-pep sede kyâ fwam-ju. Mà yang ɛn, yɛn a gyeng ha hom, na yɛn a ra kayɛ pyɛ de ma nɔng ɛn nu e ra yɛ. Ano de yɛn ê sè bemat hom, ko me arɔng, mê sè Dagwi mɛn.

⁵Yi ano, mê gyeng sira de mà kana ra a bedabeda mɛn, na me nɔng ɛn vwel de ha vɔk pyɛ́ shɛrɛk ko ha siri naka, e hɛ a vwel de yin a vɔk a remo.” Ko ma ye, “Ey, a sé ano, à Dagwi Darwey.”

⁶Dagwi Darwey a yang me, “Ci vɔk e bapomo Yuda na e nehyok Yɛrusalɛm. Shara reha hom e hwomo, na hwo ha a bemat o be wet betong na batin ha wuna-na-sira mo, yaga na yɛn a gyeng vɛ.

⁷Jeng de mà pat bedabeda mɛn yi e Misra, mà tusa hɛn na sira na yɛn a gyeng ha hom, ko ma sé sǎ e de tusa hɛn ano pere vey e yunung.

⁸Ko yɛn a wet betong, kɛ yɛn a gyeng ha mo wɛt. Kawɛ e ji mɛn a re nuyel na negbarak tanga neves sede raane. Ma ga kana nɔng ɛn nu na be gyeng wuna-na-sira mo, ko yɛn a kyɛ́ ɛn. Yaga ano, ma tɛ̀ tabak de ba misang hɛ e ji wuna-na-sira mo he hwo e ra yɛn.”

⁹E bama mo, Dagwi Darwey a yang me; “BeYuda na bemat Yɛrusalɛm ba sé yong pyɛ́ vyes e ra me.

¹⁰Yɛn a ga to toyo e de raà banɛn bedabeda mɛn, yɛn vemo de bà kyɛ́ ɛn nà ra pyɛ de ma ha a yɛn. Yɛn e re a bedagwi behak detu fongol. BeIsrayɛl mwa na BeYuda ba ga kwɔrɔ wuna-na-sira de mà kana ra na bedabeda mɛn.

¹¹Yaga ano, me Dagwi Darwey, ma sé tusa hɛn, ma sé kyè wɔ̀ vey na gawey e ra yɛn, ko yɛn ê tɔk hywit ɛn wɛt. Ko jeng de yɛn a hwo tosho a me, na me sɛlɛ hɛn, ko mê wet betong na yɛn wɛt.

¹²Ano kwong, BeYuda na bemat Yɛrusalɛm ba rɔda wɔ na bedagwi de yɛn e nása a vɛ nɔrɔ yas, na yɛn a wɔ̀ tosho a vɛ, na be sɛlɛ hɛn. Ko bedagwi vane mo bê kyɛm be sey ɛn jeng de gawey hê hwo e ra yɛn wɛt.

¹³BeYuda ba vɔk bedagwi pyak sede nepyak bapomo mɛn. Ko bemat sangal e Yɛrusalɛm arɔng ba ga lɔkɔs a dagwi mɛn Baal de a sé shagarak tyɔng wɛt, begàgbang rangas yas pyak sede nepyak nehyok gbɔng repomo mo.

¹⁴“À Yirmiya, hwo ra a me won, kɛ hwo rosol mɛ yaga bemat vemo mo wɛt. Jeng de yɛn e sè e ji reyɔm ko yɛn e yila mɛ, na me sɛlɛ hɛn, ko di mê tɛ̀ tong na yɛn wɛt.”

¹⁵Dagwi Darwey a ye: “Womo de ma tɛ̀ yey na yɛ a sé ra pyɛ́ vyes. E wa de a nɔng ɛ reto na a sè e lɔ hom ɛ? Yɛn e bare, yɛn ê tɔk dul gawey nà hwo e ra yɛn yi na ragas sisa detidetu tanga yi na nása nenɔrɔ̂ yas a? E bama ra ano, yɛn ê vɔk yey pyɛng a?

¹⁶Raane ma kana yila hɛn à cɔgɔt pwat de ya vɔk berang naka, ko ya mara sizɔng. Ko a remo, mê tɛ̀ kya e berang o, na me kwɔrɔs nelang o arɔng, sede gbara de wa lumla e ra yɛ̄.

¹⁷“E me, Dagwi Darwey, Da Jey Mwa de ma tus Israyɛl na Yuda, ko a remo, ma sé shìsa hɛn na me wey na yɛn. Yɛn a ga vey na gawey hemo e ra bato mɛn, yaga yɛn a ga buru, yɛn a ga nɔng me shom yi na nása a Baal nɔrɔ̂ yas de be rangas.”

¹⁸Dagwi Darwey a ha a me, ko ma tɔk begwong beves de bemat repugu hom ba sé yong e ra me.

¹⁹Ma sé sede ketyimit kerat de ba sé jut wɔ̀ yɛrɛ, ko ma ka tɔk wɛt, yɛn a sé tang me, “Tik na wot a cɛgɛt cɔgɔt o ye sè rɔngɔl ryat naka, tik na wot a wey na yɛ e vwel o yaga na mwat hwak a to bare na yɛ wɛt.”

²⁰Ko ma hwo ra won ma ye, “À Dagwi Darwey, Da Jey Mwa, hwo wɛ hwó gas badu e tē, hwó masa barê yey na pyɛ́ de mwasi e ra. Ma ga tik ha hom e vɔ mo, yaga ano, tik na me bɛrɛng de hwô tala bemat vemo neves mɛn.

²¹“Bemat Anatot ba simo be mɔrɔ me, ko yɛn a ha a mɛ, yɛn ê mɔrɔ me ka sede ma sǎ e de sharâ ha Dagwi Darwey.”

²²Ko Dagwi Darwey, Da Jey Mwa a ye, “Mê tabak hɛn! Bê mɔbɔs bewen mɛn e como ko nèy mɛn bewen na behwong nê kushu na vyong.

²³Ma ga tɛ̀ jeng de mê vey na gawey e ra bemat Anatot, ka sede jeng o ya sila, ko vit à hwak e ji mɛn de ê dal.”