Read berom Yirmiya 12 Bible Online

Yirmiya 12 - berom bible

Yirmiya 12

¹“À Dagwi Darwey, hwó ra pyɛ́ tyɛng jojot, jeng de ma vey na sekun hom e ra hwo. Mwa ano, mê ha na hwo remo de hwó gas badu e tē. Yaga sɛ́ de bemat beves ba vɔk pyɛ̂ nedanerey pyak ɛ? Yaga sɛ́ de bemat bɔs be re nuyel naka ɛ?

²Hwà ga tus ɛn, ko yɛn a ga tɛ̀ berinis naka, yɛn e ras, ko yɛn e mara naka arɔng. Yɛn e ha ha rat e ra hwo e nenu mɛn, ko yɛn e kyɛ́ ɛn hwo e neyey mɛn.

³Ko, à Dagwi Darwey, hwà tɔk me, hwó bɛrɛng pyɛ́ de me ra, na yerê tɛ̂ yey hom vey na hwo. Hwɔlɔ bemat beves vemo yi na hwo, sede tyīmit de be kyè wɔ yɛt. Gyep ɛn naka, sɛ̌ jeng yɛt mɛn ya vey.

⁴Vɔk e yɛ̌ jeng de vwel mot hê nàra hwogot, ko sɔ̂ng kayɛ cap gwa ga hworok ɛ? Ngyāma na benon ya sé kushu yaga neves bemat mot vemo de be tē, ‘Dagwi e bɛrɛng pyɛ́ de wot a sé ra wɛt.’ ”

⁵Dagwi Darwey a ye: “À Yirmiya, ka sede hwà ga ruru e de setele na bemat, ko yi e rɛ̌ de hwô ra setele na bedwa ɛ? Ka sede hwó tiris bol e vwel de ha sé tyɛl, yi e rɛ̌ de hwô kyɛm hwo kyè cik e rehwôt bahagât Rɔt Yɔrdan ɛ?

⁶Ko di begwa mo, na bemat lɔ mo, ba ga row o, yɛn a ga wuna hɛn na bemat beduk e de yol na hwo. Hwo kwon tɛ̀ gap mo e ra yɛn wɛt, mwa ano de be ha ha rat e ra hwo.”

⁷Dagwi Darwey a ye: “Ma ga kyini Israyɛl ma ga kyɛ́ mɛ bemat de ma ga kana kasa. Ma ga nɔng bemat de ma kana tɛ̀ yey na yɛn e vɔ vê repugu mɛn.

⁸Bemat de ma kana kasa ba ga tɛ́ ɛn a me sede gukum e rehwot. Yɛn e lulum e ra me, yaga ano, ma kyɛ́ me hɛn arɔng.

⁹Bemat o ba sé sede nenon jɛ̌tjɛ̌t de bekwɛ́ng be vos e kawɛ bak! Ci wɔ̀ tula ngyāma, na ye vey re pyɛ̂ nzem o!

¹⁰Begwɔ̀m bavwel baduk pyak ba ga wey na bwi anap hom. Yɛn a ga pigis cāp hom na bol mɛn. Yɛn a ga tɛ̀ vwel hom de ha sé rat sedesi hɛ tɛ́ ɛ hêy gbingiring.

¹¹Yɛn a ga tɛ̀ hɛ he tɛ́ ɛ hal, he ra sesin, he tosho e nuyel hom. Vwel o mwa ha ga tɛ́ ɛ gbingiring, ko pyɛ mó ya ka bɔrɔk a hwak mɛn yey wɛt.

¹²Bemat ba ga vey jugu, e ra kavɛ berahwol de ba sé gbingiring. Bemat como Dagwi Darwey ba ga wey na hɛ, yi e bak vwel o womo vɔk e woro, vit à wo sangal e hɛ na yey dyɛngɛ.

¹³Bemat hom ba how alkama ko ba yɛt bwal serɔgɔ, yɛn a ra fwom na gap mɛn mwa, ko ba ka sɛ̀ pyɛ cak wɛt. Yɛn ê vo rekyɛ̂n bwal de yɛn a sɛ̀ yaga shôm Dagwi Darwey de ye beseng hɛn.”

¹⁴Dagwi Darwey a ye: “Ma vɔk pyɛ cak de mê ha e ra bemat vwara Israyɛl de ba ga wey na vwel de ma nɔ̂ng bemat hom BeIsrayɛl na he se benap mɛn. Mê hashe bemat beves vane mo yi e bavwel mɛn sede pyɛ̂ hwiri de ba luyu, ko mê sey ɛ̀ Yuda yi e vɔ mɛn.

¹⁵E bama de ma ga jut ɛn vɔk e jey, ko mê tosho reyɔm mɛn. Mê toyo na kayɛ yere bemat jey e vwel mɛn, benap mɛn.

¹⁶Ko ka sede yɛn a sey begwong raa vê bemat hom na yey mɛn mwa, ko yɛn a sira na reza Dagwi Darwey zɔng, sede remo de bá kana basa a bemat hom na be sira na rezâ Baal, yɛn ê sè e ji bemat hom arɔng, ko yɛn ê sɛ̀ pyɛ̂ nedanerey.

¹⁷Ko ka sede yere bemat jey cak ya kyɛ́ ɛ nà gyeng ha hom, ko ma rɔda lut yɛ hywiri na me wey na yɛ. Me Dagwi Darwey ma ha ano.”