Read berom Yirmiya 13 Bible Online

Yirmiya 13 - berom bible

Yirmiya 13

¹Dagwi Darwey a yang me, “Ci wɔ̀ sey bak rugû linen na hwo rɔgɔs e rawit mo, ko hwo tɛ̀ wɛ e ji nshi wɛt.”

²Ko ma wɔ̀ sey wɛ, ma tɛ̀ e rawit.

³Ano arɔng, a to ha na me, a ye,

⁴“Ci e Gwɔrɔt Ɛifaratɛs na hwo wɔ̀ lɛrɛ rugu mo e sarâng beta.”

⁵Ko ma kyè, ma wɔ̀ lɛrɛ wɛ bagat na gwɔrɔt o sede remo de a ha a me.

⁶E bama jeng, Dagwi Darwey a yang me, “Ci e Gwɔrɔt Ɛifaratɛs o na hwo wɔ̀ jut bak rugu de ma tɛ̀ hwo lɛrɛ e hwomo.

⁷Ko ma wɔ́. Jeng de ma sɛ̀ kwɔn de ma kana lɛrɛ ɛ wɛ, ma di wa ga lashe hɛ, bê tɔk to ra pyɛ cak na wɛ wɛt.”

⁸Dagwi Darwey a to ha na me, a ye,

⁹“A sé ano de mê wey na dak kaà Yuda tanga gbɔng dak kaà Yɛrusalɛm.

¹⁰Yɛn bemat beves vemo ba ga kyɛ́ ɛn nà gyeng ha hom. Yɛn a ga nàra e de kyɛ́ ɛn gbarak e de ragas neves. Yɛn a sé re nuyel e de re a bedagwi beduk fongol na yɛn a ra a yɛn fwom. Yi ano, yɛn ê sè sede bak rugu wane de bê tɔk to ra pyɛ cak na wɛ wɛt.

¹¹Sede remo de bak rugu mo wa kaba hwo naka gak e rawit, a sé ano de ma kana bare, mwa BeIsrayɛl na BeYuda bê kaba me naka gak arɔng. Ma ra ano yaga na yɛn a bin sè bemat hom de ba rɔda tɛ̀ be somo me, na be nɔ̂ng reza hom nerey, na be sè pyɛ kaa hom. Ko mwa ano, yɛn a tɛ̀ tong na me wɛt.”

¹²Dagwi Darwey, Dagwi Israyɛl a yang me ngan, “À Yirmiya, ha a BeIsrayɛl be sila kagwɛ gwofus na nshi anap. Yɛn ê toyo a hwo wɔgɔ, yɛn a tɔk bê sila kagwɛ gwofus na nshi anap.

¹³Ano arɔng, hwo yang ɛn, me Dagwi Darwey, mê sila bemat sevwel semo na nshi anap sɛ̌ na vo ɛn: yɛn begwɔ̀m de ba sé vê yerê Davit, na bepiris na bezarap hom tanga mwa bemat Yɛrusalɛm.

¹⁴Ko mê mɔbɔs hɛn sede be mɔbɔs bètus e ra bemɛn, bemakuk na nèy mwa rining o. Mê tik báre rat, kɛ nemwishish, kɛ tosho reyɔm he dul mɛ nà mɔbɔs hɛn wɛt.”

¹⁵Dagwi Darwey a yang BeIsrayɛl, Wet in betong, dyɛng in bato min!

¹⁶Nɔng in Dagwi Darwey, Dagwi min gbɔng nerey, gyam na a tɛ̀ jey ye ye mwangalang, gyam na yin tiris bol min e beraku nawiri, jeng de yin e jama negbey, e doyo nɛ ne tɛ́ ɛn hywi, e tɛ̀ nɛ ne tɛ́ ɛn lwil mwangalang.

¹⁷Ka sede yin ê wet betong wɛt, ko mê tosho e lɛrɛ yaga kaa min, mê tosho sizɔng, ko nemwishil hom nê dɔng, yaga ba ga hashe bemat Dagwi Darwey sede tyīmit vɔk e de sesam.

¹⁸Ha in a gwɔ̀m na neng mɛ, “Sangal hin e dem sɛl o, yaga bekpîn negwɔm min vê gbɔng nerat ba ga gabsa yi e bato min.”

¹⁹Ba ga bang bapomo Nɛgɛf na como, vit à mwat de ê wuma vɛ, ba ga hashe BeYuda mwa vɔk e de sesam, ba ga kyè na yɛn mwa hywiri.

²⁰Yang in bato cik na yin a di, vemo de ba vey yi e rwa bato. Bemat sede kwara de ba tik e vɔ mō, kwara rwat o ma gwɛ ɛ?

²¹Hwô ye ala jeng de ba vey tabak hwo, hwo de hwà kana basa a yɛn ɛ? Yɛn de bá sè besa mo bê tā o e yel, ko rezot rê vo o, sede rê hwâ tɔ wɛt a?

²²Ko ka sede hwà ye e yey mo, “Yaga sɛ́ de pyɛ́ yemo ya hwo e ra me ano ɛ?” A sé yaga gbɔng neves min, de ba ga hama berugu min, na be ra pyɛ́ vyes na yin.

²³Mwat swi ê tɔk sege rehwô bek mɛ, kɛ cwey ye paa nebwat-bwat rehwô yɛ a? Ko yin, yin ê tɔk ra nerat a remo de yin a ga tɔ́k in na neves a?

²⁴Mê waram hin sede byɛmɛ, de gul hey gbingiring gwo gangas yɛ.

²⁵Nu mó min à hemo, bak o de ma ga masa a yin yaga yin a ga ye bam a me, ko yin a tɛ̀ gap min e ra nebɔs. Me Dagwi Darwey ma ha ano.

²⁶Me pyɛ hom mê gang rugu min de gwa bang bayis min, na yin a vo rekyên nekpimit min.

²⁷Ma ga di pyɛ̂ byɛm-byɛm min, nejwang min, na rús min e de nɛ̀ na gwot de yin e ragas kpɛɛ sana rekyen, e berahwol na e tê dyɛng. À yin bemât Yɛrusalɛm, gawey e ra yin! Yin ê sǎ ano vɔk e yɛ̌ jeng, na yin de ba tɛ́ in haalal ɛ?