Read berom Yirmiya 14 Bible Online

Yirmiya 14 - berom bible

Yirmiya 14

¹Ha de Dagwi Darwey a ha na Yirmiya e ra nehwogot a hemo,

²“Yuda a sé tosho, bapomo mɛ ba ga lashe hɛn. Bemât vɛ ba sé e dyɛngɛ e vwel e de lashe yey, ko Yɛrusalɛm wó tosho na gbɔng fwɔ, wó jama be sɛlɛ wɛ.

³Bedaberey be tomsal bemat fwom mɛn e de jama nshi, be kyese e hes, ko yɛn e sɛ̀ nshi wɛt, be tòros hɛn na betsung mɛn hal. A sé a yɛn gbɛrɛk, na kpɛɛ, ko yɛn e bangas bato mɛn.

⁴Vwel o ha ga taksal yaga vit a rwak e hɛ, a sé a bemât cap gbɛrɛk, na kpɛɛ, yɛn e bangas bato mɛn.

⁵Ròs e tê hey wa kyini hwey de wa mɛsɛ̂ng tɔ, yaga vit a sehwey.

⁶Bemadung ba wɔ̀ tumal e ra tɛ̂t berahwol besán o, be gapsing sana gul sede nevu-hey. Ba tɔk bɛrɛng yɛt wɛt, yaga ba ga re pyɛ wɛt.

⁷Mwa ano de banɛn mot be nɔng nuha e ra wot, ko à Dagwi Darwey, sɛlɛ hot, sede remo de hwà ga kana sira. Wot a ga doyo a hwo ma zang pyak wot a ga ra a hwo banɛn.

⁸E hwo zɔng de BeIsrayɛl ba sɛt ɛ yey, e hwo zɔng à wo sey ot e jeng reyɔm. Yaga sɛ́ de hwà sé sede kwɛnɛt e vwel mot, kɛ sede mwât kwɛngɛl de a pere pɔl hining zɔng ɛ?

⁹Yaga sɛ́ de hwà sé sede mwat de pyɛ langat cak ya pere sɛ̀ ɛ, kɛ sede mwât como, de a tɔk sey mwat hwak wɛt ɛ? A sé mwin, à Dagwi Darwey, hwà sé e tē mot, be yila hot na reza mo, Hwo kwon kyini hot wɛt!”

¹⁰Dagwi Darwey a ye ngan e ra bemat vemo, “Yɛn a kat simô tele yi na me, ko yɛn e tɔk gyeng bol mɛn wɛt. Yaga ano, ma vɔk yey pyɛng na yɛn wɛt. Mê bare na buru detidetu de yɛn a ga ragas, ko mê tabak hɛn yaga banɛn mɛn.”

¹¹Dagwi Darwey a yang me, “Hwo ra won na me sɛlɛ bemat vemo wɛt.

¹²Ka yɛn a ka tik rê pyɛ́ mwa, ko mê tɛ̀ tong na sesin mɛn, na me sɛlɛ hɛn wɛt. Ka yɛn a ka nása a me nɔrɔ yas de be rangas, mwa na he pyɛ̂ yéneng, ko yey hom yê pɛngɛ na yɛn wɛt. Mê mɔbɔs hɛn e como, na vyong tanga serɔ”.

¹³Ko ma ye, “À Darwey Dagwi Darwey, hwà tɔk, bezarap mo be tang bemat o wɔgɔ, como kɛ vyong yê hwo e ra yɛn wɛt. Yɛn a ye, Dagwi a sira, yɛn ê sangal tyang zɔng e vwel mɛn.”

¹⁴Ko Dagwi Darwey a toyo mɛ̀, a ye, “Bezarap hom ba sé vɛ́sɛ bɔs e ji reza hom; ma tomo hɛn wɛt, kɛ ma nɔng ɛn nu, kɛ ma hanat na yɛn wɛt. Pyɛ de yɛn a ye, yɛn a ga di na negwi-ywey ya sé bɔs, yɛn e bɛrɛng na tô zɔng-reng, yɛn e ra ano na kwɛlɛng bato mɛn zɔng.

¹⁵Me Dagwi Darwey ma sé ha a hwo pyɛ de mê ra na bemat de e me de ma tomo hɛn wɛt, ko mwa ano, yɛn a ha e ji reza hom. Yɛn a ye, como na vyong yê hwo e ra vwel hemo wɛt. Ko di, mê mɔbɔs hɛn na como tanga vyong arɔng.

¹⁶Bemat de be sey neha mɛn o, bê mɔbɔs hɛn e begwong vining o. Bê bomos bavin mɛn e nehyok Yɛrusalɛm, ko bê sɛ̀ mwat de ê lɛsɛ hɛn wɛt. Pyɛ́ yemo yê té na kawɛ e ji mɛn — mwa na beha mɛn, na nèy mɛn bewen na behwong. Mê tɛ̀ yɛn a tala pyɔ̌n neves mɛn.”

¹⁷Dagwi Darwey a nɔng mɛ nu na me ha a bemat o reha lashe yey hom, ngan, “Tik na bayis hom be sǎ e de tele nemwishil nagwi na naturuk. Tik na me sang tik nà tosho wɛt, yaga ba ga mǎ ding-ding bemat hom de ba sé mɛrɛk sede kehwong, ko yɛn e ririm na gbɔng rām.

¹⁸Jeng de ma nusu e hey, ko ma di bavin bemat como. Jeng de ma wɔ́ e ji bapomo, ko ma di rɔ̂ vyong. Bezarap hom, na bepiris hom ba sé re nuyel na tom dyām mɛn e vwel o, ko yɛn a ka tɔk báre hom wɛt.”

¹⁹À Dagwi Darwey, hwà ga kyɛ́ o Yuda mwa a? Yey mo ya ga nu ɛ vit e ra bemat Siyɔn a? Yaga sɛ́ de hwà ga mǎ hot ding-ding ano, de wot ê tɔk tɛ̀ tyang wɛt ɛ? Wot a jama sangal tyang, ko wot a sɛ̀ pyɛ cak ryat wɛt. Wot a jama be tɛ̀ ot tyang, ko wot a sɛ̀ pyɛ bengyip.

²⁰À Dagwi Darwey, wot a ga ra a hwo banɛn. Wot a sé kulu banɛn mot, tanga ve bedabeda mot.

²¹Bare na sira mo, ko hwo byɛnɛng hot wɛt. Hwo tɛ̀ gwofwa gbɔng nerat mo gwo sè pyɛ rekyen wɛt. Hwo kwɔrɔ wuna-na-sira de hwà kana ra na wot wɛt.

²²Vit a cī yére bemat jey cak de yê tɔk tomo na rwak. Lagwi pyɛ wɛ wô tɔk tɛ̀ rwak wo rop wɛt. À Dagwi Darwey, Dagwi mot, a sé e hwo wɛt a? Wot a ga sɛt yey mot e ra hwo, yaga e hwo de hwó ra pyɛ́ yemo mwa.