Read berom Yirmiya 15 Bible Online

Yirmiya 15 - berom bible

Yirmiya 15

¹E bama mo Dagwi Darwey a yang me, “Ká Mose na Samwɛl ba ka sé e tumal e ngamo, ba sé ra won na me, ko mê ka tosho reyɔm bemat vemo wɛt. Yang ɛn be kyè e jey; tɛ̀ ɛn be kyè yi e bayis hom!

²Ka sede yɛn a rangal hwo kwɔn de yɛn ê kyè vɔk ɛ, ko yang ɛn, ma ga ye ngan, ‘Vê serɔ, bê kyè e serɔ! Vê como, bê kyè e como! Vê vyong, bê kyè e vyong! Vê sesam, bê kyè e sesam!’

³“Me Dagwi Darwey ma ga tɛ̀ pyɛ́ nyaas yê wey na yɛn, yɛ a como na ye mɔbɔs hɛn, bevu na be hama hɛn, benon tanga ngyāma na ye re bwang pyɛ de ya pɔl.

⁴Mê tɛ̀ mwa yére bemat jey ye kyɛ́ ɛn hɛn, yaga pyɛ de Manase Hɛzɛkiya á ra e Yɛrusalɛm jeng de á sè gbɔng gwɔ̀m Yuda.”

⁵Dagwi Darwey a ye, “E wa de ê wok nemwishish min, yin bemat Yɛrusalɛm, ko e wa de ê lashe yey e ra yin ɛ? E wa de ê tɛ̀ nehywɛ na yin na a rangal reha netyang min ɛ?

⁶Yin a ga kyɛ́ in me, yin a ga doyo a me ma. Yaga ano, mê kaba hin na me wey na yin, ma ga ruru na tik in ano.

⁷Mê bɛ́m ɛn na bworo, e rùhup bapomo sevwel o. Mê tɛ̀ nèy mɛn ne kushu, mê wey na bemat hom, yaga yɛn a ga tik râ tomong ves mɛn wɛt.

⁸Mê tɛ̀ bekuma mɛn, be dal bazɛk gworep na nepyak. Mê vey a beneng bebot bemat na womo de ê wey na yɛn e tê-gwi, Mê vey na sap tanga gwazɛrɛk de bê hwo e ra yɛn hák.

⁹Neng nèy netaama de nà wey a sé kushu, a sé gapsing sana nesong. Gwi mɛ gwa ga gaba, ko jey ye sè rɔngɔl gbey, ba nɔng ɛ rekyen, ko ba byɛs ɛ. Mê tɛ̀ bwang mɛn be wey e como, e nuyel ve repugu mɛn. Me Dagwi Darwey ma ha ano.”

¹⁰Kɛ̀ɛ ɛ́, à neng hom! Yaga sɛ́ de hwà vey na me e jey ɛ? Me sǎ e de râ lwɛ́lɛ na cuna na kawɛ mwat e vwel hemo. Ma ga hwɔ́p a mwat hwak dyām, kɛ ma hwɔp yɛ̄ arɔng wɛt, ko mwa ano kawɛ mwat e dùsa me.

¹¹À Dagwi Darwey, tik na sedusa mɛn sē hwo e ra me, ka sede ma ga ra won na hwo na hwo sɛlɛ bemat repugu hom wɛt, jeng de yɛn a sé e ji reyɔm kɛ rezot ayi.

¹²Wa ê tɔk kwɔrɔ gap dyam kɛ dyam pama de ye kyè vey hwo e ra wot yi e rwa bato ɛ?

¹³Dagwi Darwey a yang me, “Mê tomo ve repugu na yɛn a vey hashe pyɛ̂ nedanerey na yas bemat hom, yaga na me tabak hɛn mɛ, yaga banɛn de yɛn a ga ra e yɛnɛ vwel o mwa.

¹⁴Mê tɛ̀ yɛn a ra a ve repugu mɛn fwom e vwel de yɛn a tɔk pyɛ cak e ra hɛ wɛt, yaga shom hom ya sé sede kya, ko hê lolo gbak-gbak.”

¹⁵Ko ma hwo ye, “À Dagwi Darwey, hwà tɔk pyɛ̂ mwa, bare na me, na hwo sɛlɛ me, tik na hwo toyo a vemo de ba tak a me, na neves mɛn. E ji niri mo, hwo tik be wey na me wɛt, tɔk wɔgɔ, a sé yaga hwo de be haras a me.

¹⁶Ma ga sey reha mo, ko ma ga re rɛ, ko ra pɛngɛ a me yey, yaga be yila me na reza mo, à Dagwi Darwey, Dagwi Da Jey Mwa.

¹⁷Ma sangal na bemat beves e de seshɛgɛsh, kɛ na me vɔk yey pyɛng na yɛn wɛt, ma sangal nju hom e vɔ mo, yaga hwà ga sila yey hom na shom na pyɛ́ de hwà ga ra.

¹⁸Yaga sɛ́ de me sǎ e de tak reyɔm, ko ba tɔk tɛ̀ baram hom tyang wɛt, ba kyɛ́ ɛn nà vel ɛ? Mwin, hwà sé a me sede jɔt-nshi ye bɔs, sede nshi de ne tē jɔng.”

¹⁹Ko Dagwi Darwey a toyo a me ngan, “Ka sede hwà toyo, ko mê to sey o, ko hwô to sè mwat fwom hom. Ka sede hwà ha neha nerat, ko nè yapyi wɛt, ko hwô to sè mwat nuha hom. A sé e bemat o de bê doyo vey na hwo, ko e hwo de hwô jama hɛn wɛt.

²⁰Mê tɛ̀ hwo sè a bemat o sede vwara duk dyam pama gwô gap. Yɛn ê ra yol na hwo, ko yɛn ê di wɛng wɛt, yaga ma sé tanga hwo, na me sey ɛ̀ hwo, na me sey o arɔng.

²¹Mê sey o e vɔ bemat beves, na me viri hwo e vɔ vê yol. Me Dagwi Darwey ma ha ano.”