Read berom Yirmiya 16 Bible Online

Yirmiya 16 - berom bible

Yirmiya 16

¹Dagwi Darwey a to ha na me a ye,

²“Hwo kwon ra weneng, kɛ hwo tɔs nèy bewen na behwong e dem hemo wɛt.

³Yaga Dagwi Darwey a ye ngan e ra nèy bewen na behwong de bê tɔ e dem hemo, na e ra beneng na beda de ba tɔs nɛ e vwel o:

⁴Yɛn ê kushu na nerɔ neves sizɔng, ko vit à mwat de ê tosho nɛ, kɛ a lɛrɛ nɛ. Bavin mɛn bê dyɛngɛs sede bagwɔt yǔk e vwel. Bê mɔbɔs hɛn e como, kɛ be kushu na vyong, ko bavin mɛn bê tɛ́ ɛn pyɛ̂ re benon lagwi na ngyāma.”

⁵Dagwi Darwey a ye ngan, “Hwo kwon yel e lɔ̂ sesin, kɛ hwo tosho hɛn, kɛ hwo lashe yey e ra yɛn wɛt, yaga ma ga pat yey dyɛngɛ hom e bemat o, mwa na tɛ̂ yey na nemwishish hom e ra yɛn.

⁶Bedaberey na bepɛng bê kushu e vwel o, bê lɛsɛ hɛn wɛt, ko vit a mwat de ê tosho hɛn. Vit à mwat de ê gabsa e de sesin mɛn, kɛ a wula to na a dura mɛ lashe yey.

⁷Vit a mwat de ê vey re na a sɔ na hwak e ji mɛn na a wɔrɔk hɛ yaga mwât yey mɛ a ku. Vit à mwat de ê tosho reyɔm mɛn, bê ka tosho reyɔm mwat de da mɛ kɛ de mɛ a ku wɛt.

⁸“Hwo kwon yel e lɔ̂ nzem, na hwo sangal na yɛn, na hwo re, na hwo sɔ wɛt.

⁹Yaga Dagwi Darwey, Da Jey Mwa, Dagwi Israyɛl a ye, ‘E dem hemo, e bayis mo, e jeng mo, mê tɛ̀ rewɔng yey pyɛng mwa re ye yuu, yɛ̄ à lwɛlɛ, na seshɛgɛsh, na fwɔ̂ rwas gwel, tanga gwo gwel mɛ.’ ”

¹⁰Jeng de hwà ha a bemat o pyɛ́ yemo, ko yɛn a rangal hwo, ba ye, “Yaga sɛ́ de Dagwi Darwey a nɔng nu na gbɔng rezot remo re hwo e ra wot ɛ? E sɛ́ de wot a ra naka wɛt ɛ? E hɛ̌ nɛn de wot a ga ra a Dagwi Darwey, Dagwi mot ɛ?”

¹¹Ko hwô toyo a yɛn ngan, “A sé yaga bedabeda min bá ye waa a me, ko yɛn á raa bedagwi beduk, yɛn á ra a vɛ fwom ko yɛn á re a vɛ fongol. Yɛn á ye waa a me, ko yɛn á gyeng Badu hom wɛt.

¹²Ko di yin e bak o mwin, yin a ga ra pyɛ de ya dal ye bedabeda min na neves. Di, kawɛ e ji min e raa negbarak tó mɛ, na neves yey mɛ, sana wet betong na me.

¹³Yaga ano, mê ye zɛ́p a hin e vwel hemo vɔk e vwel de yin kɛ bedabeda min ba tɔk hɛ wɛt, ko e hwomo, yin ê ra a bedagwi beduk fwom nagwi na naturuk, yaga mê to dura a yin nerat hom wɛt.”

¹⁴Dagwi Darwey a ye, “Jeng ye kyè vey de bemat bê to be sira na me ‘Dagwi wo neken de a pat BeIsrayɛl yi e Misra wɛt.’

¹⁵Yɛn a rɔda sira na me ‘Dagwi wo neken de a pat BeIsrayɛl yi e sevwel sehak sê rwa bato, tanga yi e mwa bwang bavwel de ma ga kana shara hɛn vɔk ɛ.’ Ma rɔda toyo na yɛn vey e sevwel mɛn, e sevwel de ma kana nɔng bedabeda mɛn.”

¹⁶Dagwi Darwey a ye, “Ma sé yila bemat vos betɔk pyak, na yɛn a vey vos bemat vemo. E bama mo, mê yila begbam pyak, na be ra jàma mɛn e ra kawɛ raku na rahwol tanga e tara e ji beta.

¹⁷Me bɛrɛng kayɛ pyɛ de yɛn e ra. Pyɛ cak ya sé e lɛrɛ na me wɛt, banɛn mɛn arɔng ba sé e lɛrɛ na me wɛt.

¹⁸Mê tɛ̀ yɛn a tala pyɔlɔ banɛn mɛn na neves mɛn zang ba. Yaga yɛn a ga tɛ̀ benap hom gbiridik na pyɛ̂ sekwit de ya vɔk neken wɛt, sede bavin pyɛ́, ko yɛn a ga sila vɛ̄ na bedagwi mɛn de ba sé a me byɛm-byɛm.”

¹⁹À Dagwi Darwey, gap hom na kwɔn dál hom, kwɔ̂n lɛrɛ hom e jeng reyɔm. Yére bemat jey yê vey na hwo, yi e neyɛnɛ jey, ye tē: “Bedabeda mot bá re nedanelɔ pyɛ́ cak wɛt sɛ̌ bɔs zɔng, pyɛ̂ yapyi de vit à pyɔlɔ.

²⁰Bemasi bê tɔk yóng a bato mɛn bedagwi a? Pyɛ́ yane ya sé bedagwi wɛt!”

²¹Wet in betong a remo, mê tɛ̀ yɛn a tɔk, e jeng yemo mê tɛ̀ yɛn a tɔk vwɔ̂ gap hom na reto hom, yi ano, yɛn ê tɔk, Dagwi Darwey à reza hom!