Read berom Yirmiya 17 Bible Online

Yirmiya 17 - berom bible

Yirmiya 17

¹Dagwi Darwey a ye, “Ba ga jɛk banɛn BeYuda na kwet-jɛk dyam, na nû kwet o he dyengerê dɛmɔn e neyey mɛn, na e ra badúk begagbang rangas yas mɛn,

²ko nèy mɛn ne bare na begagbang rangas yas mɛn, na sesêk Ashera, ci hwā mo, e necam kayɛ cɔgɔt ryey, na e ra tɛt berahwol,

³tanga e ra tɛt kawɛ raku e hey. Mê tɛ̀ bemat repugu min be hashe pyɛ̂ nedanerey min mwa na yas min, yaga mwa banɛn de yin a ga ragas e yɛnɛ sevwel min.

⁴A rɔda sè a yin gbing-gbing yin hala vwel de ma nɔng in, ko mê tɛ̀ yin ra a bemat repugu min fwom e vwel de yin a tɔk pyɛ cak e ra hɛ wɛt, yaga shom hom ya sé sede kya, ko hê re gbak-gbak.”

⁵Dagwi Darwey a ye, “Gawey e ra vemo de ba ye yɛndɛng e ra bemasi, yɛn e dak kaa na gap mwasi, ko neyey mɛn na ga doyo yi na Dagwi Darwey.

⁶Yɛn ê sè sede reburuk e hey gbingiring, yɛn ê tɔk jeng de nerat nê pom wɛt. Yɛn ê sangal e nedem nehwogot ne hey gbingiring e vwel nevwashe de vit à mwat.

⁷Vê yey pyɛng a vemo de ba tɛ̀ gap mɛn e ra Dagwi Darwey, mwa vemo de ba ye yɛndɛng e ra yɛ.

⁸Yɛn ê sè sede cɔgɔt de ba tus e vwa rɔt, ye nása berinis yɛ vɔk e rɔt o. Ye wok bengyip jêy fes wɛt, ko berang o be nàra gwim-gwim, e shey nehwogot pyɛ cak ye bɔrɔk yɛ wɛt, ko ye nàra nà mara wɛt.

⁹Yey mwasi ya dal kayɛ pyɛ na sekwɛ́lɛng, ya vɔk rɔ ves sedesi. E wà de ê kyɛm a tɔk tô yɛ ɛ?

¹⁰Me Dagwi Darwey me ngyɛgɛt bare yey, me masa yɛ arɔng, na me tala kawɛ mwat tyɛng na pyɛ de a ra, tyɛng na yere tomong mɛ arɔng.

¹¹Mwat de e sɛsɛm yas mɛ e begwông tsak o wɛt, a sé sede gwonon de gwó dyɛng e bagyi de gwa tɛ̀sɛ vɛ wɛt. Yas o yê tala hɛ, yɛ e newen mɛ, ko e yɛnɛ mo, ê sè tɔn zɔng.

¹²Gwofwa negwɔm gbɔng nerat, gwo nerey yi e susu mo, gwɛ̀ a Gbɔng Duk Re Fongol mot!

¹³À Dagwi Darwey, BeIsrayɛl ba sɛt yey e ra hwo! Mwa vemo de ba ye waa a hwo bê vo rekyen. Vemo de ba doyo a hwo ma, bê jɛ́k ɛn e kwɔn bevuvwel, yaga yɛn a ga ye waa à hwo, hwo Dagwi Darwey, lwel nshi neken.”

¹⁴“À Dagwi Darwey, tɛ̀ me tyang, ko mê sè tyang gyat, sey me, ko mê sè yɔ́kyɔk, yaga e hwo de me somo!

¹⁵Di de bemat o be tang me: ‘Neha Dagwi Darwey ma nɛ? Tik na a ha nɛ a remo!’

¹⁶Ma ga sang shonong hwo vey na rezot e ra yɛn, kɛ jeng reyɔm o ye vey wɛt. Hwà tɔk hâ nu hom ha sé e lɛrɛ na hwo wɛt, ha sé kyɛrɛng e bayis mo.

¹⁷Hwo sè a me pyɛ bengyip wɛt, e hwo wɛ à kwɔn dál hom e jeng rezot.

¹⁸Tik na a sè a vemo de be tak a me kpɔrɔk, hwo tik me vo bengyip wɛt, tik na a sè a yɛn kpɛɛ, ko hwo tik a sè a me kpɛɛ wɛt. Vey na jeng rezot e ra yɛn, wey na yɛn, wey na yɛn zang ba!”

¹⁹Dagwi Darwey a yang me, “À Yirmiya, ci wɔ̀ shara ha hom e Ruhup Bemat de begwɔ̀m Yuda be yeles ɛ e gbɔng repomo, ko be to nunus ɛ. E bama mo, hwo kyè vɔk e bwang rùhup Yɛrusalɛm o.

²⁰Ha a begwɔ̀m, mwa na BeYuda tanga kawɛ mwat de a sangal e Yɛrusalɛm, yɛn vemo de be kweres e rùhup vemo, na yɛn a wet betong na pyɛ de mê ha.

²¹Ha a yɛn, ka sede yɛn a tɛ̀ yey na neken mɛn, ko yɛn a kwon tos pyɛ́ cak Tuk Shábat wɛt. Yɛn a kwon tos pyɛ́ cak na be yel mɛ e rùhup Yɛrusalɛm wɛt,

²²kɛ be tos pyɛ́ cak na be nusu mɛ e nelɔ mɛn Tuk Shábat wɛt. Yɛn a kwon ra fwom Tuk Shábat wɛt. Yɛn a rɔda gyeng hɛ sede tuk Dagwi, tyɛng sede remo de mà kana nɔng bedabeda mɛn nu.

²³Bedabeda mɛn bà wet betong na ha hom wɛt, kɛ bà gyeng hɛ wɛt. Ko yɛn à tɛ́ ɛn gbàrak, yɛn à kyɛ́ ɛn nà gyeng ha hom, ko yɛn à sey tabak wɛt.

²⁴“Ha a bemat o, a sé gbing-gbing na yɛn a gyeng mwa nu de ma nɔng ɛn. Yɛn a sang tos pyɛ cak be kwey mɛ e rùhup gbɔng repomo remo Tuk Shábat wɛt. A sé gbing-gbing na yɛn a tik Tuk Shábat jaram, ko yɛn a sang ra fwom hwak ko tyɔng wɛt.

²⁵Yi ano, begwɔ̀m mɛn na nèy lɔ gwɔ̀m mɛn bê yeles e rùhup Yɛrusalɛm, ko yɛn ê vɔk retô rê negwɔm yerê remo de Davit á vɔk. Yɛn na BeYuda na bemat Yɛrusalɛm, bê lagsa bekyɛkyɛ bedwa, na bedwa mo arɔng, ko gbɔng repomo mo ra rɔda sila na bemat kayɛ jeng.

²⁶Bemat bê vey yi e bapomo Yuda na yi e nebapomo de na gwɔrɔ Yɛrusalɛm yɛn a rɔda yi e yɛnɛ sevwel Bɛnyamin, yi e tɔ berahwol, yi e beraku, na yi e rwa batin wo sevwel Yuda. Yɛn ê vey nɔng e Gbɔng Duk Re Fongol nenɔrɔ yas de be rangas burang, na nenɔrɔ detidetu, na nenɔrɔ pyɛ̂ yéneng, na ne pyɛ̂ nesang hyɔɔlɔl mwa na nenɔrɔ feng e Gbɔng Duk Re Fongol wo Dagwi Darwey.

²⁷Ko tik na yɛn a raa ha hom, na yɛn a tik Tuk Shábat jaram. Yɛn a kwon tos pyɛ́ cak, be kwey mɛ e rùhup Yɛrusalɛm tuk o wɛt, yaga ka sede yɛn a ra ano, ko ma rɔda tɛ̀ kya he re rùhup Yɛrusalɛm. Kya mo hê re nelɔ negwɔm Yɛrusalɛm, ko vit a mwat de ê tɔk rimi hɛ.”