Read berom Yirmiya 18 Bible Online

Yirmiya 18 - berom bible

Yirmiya 18

¹Dagwi Darwey a yang me,

²“Sogo, kyè wɔ̀ gyirik vɔk e lɔ mwat lɔk nerwey, ko mê ha na hwo e hwomo.”

³Yaga ano, ma kyè vɔk e hwomo, ko ma wɔ̀ di mwat lɔk nerwey a sè ra fwom mɛ na pyɛ̂ fwom mɛ.

⁴Kayɛ jeng de mwat o a di rwey de a sé lɔk ha lashe hɛ, e mɔrɔ hɛ, a jut secwem o, ko a yong mɛ pyɛ cak de a di ya jam a yɛ.

⁵Ano arɔng, Dagwi Darwey a yang me,

⁶“Ma vɔk reto na me ra na yin BeIsrayɛl pyɛ de mwat lɔk nerwey a ga ra na secwem mɛ wɛt a? À yin BeIsrayɛl, yin a sé e vɔ hom sede secwem e vɔ mwat lɔk nerwey.

⁷Ka sede e jeng cak ma ye mê lut, kɛ mê gang, kɛ mê wey na yere bemat jey cak, kɛ segwɔm sehak,

⁸ko e bama mo yere bemat jey yane mo ya doyo yi e neves de ya sé ra, ko mê ra pyɛ de ma kana ye mê ra wɛt.

⁹Ano arɔng, ka sede ma ye, mê lɔk, kɛ mê tus yere bemat jey cak, kɛ segwɔm sehak,

¹⁰ko e bama mo, yere mo ya kyɛ́ ɛ nà gyeng ha hom, ko ya ra neves, ko mê ra pyɛ de ma ga ye mê ra wɛt.

¹¹Ko di a remo, ha a BeYuda na bemat Yɛrusalɛm, ma sé yong begwong beves e ra yɛn, ko ma sé yóng me na me tabak hɛn. Ha a yɛn, yɛn a doyo yi e begwong beves, yɛn a sege begwong mɛn, na pyɛ́ de yɛn a sé ra.

¹²Yɛn ê toyo a me, bê ye, ‘Wěy, yaga sɛ́ de wot ê sege ɛ? Wot mwa wot ê re nuyel na negbarak mot, na ragas neves de wot e simo.’ ”

¹³Yaga ano, Dagwi Darwey a ye, “Rangal e ji kayɛ yere bemat jey, kɛ mwat hwak a ga sang wok yere pyɛ yemo bɛ? BeIsrayɛl ba ga ra pyɛ vyes sizɔng!

¹⁴Beraku Lɛbanɔn de ba vɔk beta belis o bà ga sang sè sana fwala a? Nerɔt beraku mɛn de ba sumal ne sang ye jɔng a?

¹⁵Mwa ano, bemat hom ba ga ye bam à me; yɛn e rangas a pyɛ̂ sekwit pyɛ̂ nesang hyɔɔlɔl. Yɛn a ga tiris bol e begwong de yɛn e kweres ɛ, yɛn e to raa begwong raane wɛt. Yɛn e kyě kyè e negwong hey, be kyɛ́ ɛn gbɔng gwong.

¹⁶Yɛn a ga tɛ̀ vwel o hē tɛ́ ɛ pyɛ byɛm-byɛm, de bê byɛs hɛ nesheneshey. Mwa bemat de be kweres e ji hɛ e yang ɛn yɔɔt, be rugum bato mɛn na neves o.

¹⁷Mê shara bemat hom o e nuyel ve repugu mɛn, sede búm de gul rak gwo pɛsɛl gwɛ. Mê doyo a yɛn ma, ko bayis wɛt, jeng de rezot o rê hwo.”

¹⁸E bama mo, bemat o ba ye, “Tik na wot a ra a Yirmiya womo pyɛ cak! Ba rɔda vɔk bepiris kayɛ jeng de bê basa a wot, na bemat de ba vɔk netsitsɛng de bê vos a wot badu, tanga bezarap Dagwi na be shara a wot hâ Dagwi. Tik na wot jama pyɛ de wot ê tɛ̀ kun mɛ na yɛ. Wot wet betong na neha mɛ wɛt.”

¹⁹Yaga ano, ma ra won, ma ye: “À Dagwi Darwey, wok pyɛ de ma sé ha, na hwo wet betong na hâ ve repugu hom!

²⁰Bé tala neves na nerat a? Ko mwa ano, yɛn a ga cing revɔng na me gaba ɛ. Bare na jeng de ma vey e nuyel mo, na me ha ha rat e ra yɛn, na hwo hala shom mo na yɛn.

²¹Ko di, tik nèy mɛn ne kushu na vyong, gangas nɛ na ne kushu e como, tik beha mɛn be sè sana nèy, na be sè bekuma, tik na beras o be kushu na serɔ, na be mɔbɔs bebot mɛn e de como arɔng.

²²Tik na be wok sesin e nelɔ mɛn jeng de hwà vey na vê jugu gobok e ra yɛn! Yaga yɛn a ga cing revɔng na me gaba ɛ, yɛn a ga tɛ̀ bagun na be vo me mɛ.

²³Mwa ano, à Dagwi Darwey, hwà tɔk, mwa begwong de ba yong na be mɔrɔ me. Hwo hala banɛn mɛn wɛt, hwo fugut banɛn mɛn e bayis mo wɛt. Tɛ̀ be bomos hɛn e nuyel mo, teshe na yɛn e jeng shom mo.”