Read berom Yirmiya 19 Bible Online

Yirmiya 19 - berom bible

Yirmiya 19

¹Dagwi Darwey a yang me: “Ci wɔ̀ sey tsung secwem. Jut behak e ji bemakuk na bekinat behak e ji bepiris arɔng,

²na hwo kwey na yɛn e Ruhup Gwokywa vɔk e Nɛk Hinɔm. E hwomo hwô shara ha de mê ha a hwo.

³Hwô ye: ‘À yin begwɔ̀m Yuda na yin bemat Yɛrusalɛm, wet in betong na pyɛ de me, Dagwi Darwey, Da Jey Mwa, Dagwi Israyɛl ma rɔda ha. Mê vey na gbɔng rezot rehak e kwɔn hemo, yere hemo de kawɛ mwat de a wok reha hɛ, ê yang ɛ yɔɔt.

⁴Ma sé kyè wɔ̀ ra ano, yaga bemat o ba ga ye waa a me, yɛn a ga tɛ̀ kwɔn o ligis na nása a bedagwi beduk nezap nenɔrɔ detidetu. Ko bedagwi vane mo ba sé vemo de yɛn pyɛ mɛn, kɛ bedabeda mɛn, kɛ begwɔ̀m Yuda ba tɔk pyɛ cak e ra vɛ wɛt. Yɛn a ga sila kwɔn hemo na nemi nèy de na tɔk pyɛ wɛt.

⁵Yɛn a ga lɔk a Baal nekwɔn nása nenɔrɔ yaga na yɛn a rangas nèy mɛn e ra kya mo sede pyɛ̂ nɔrɔ vɔk na yɛ. Ma sang nɔng ɛn nu na be ra ano wɛt. Barê pyɛ yere yane ha ga ka vey e yey hom wɛt,

⁶yaga ano, jeng ye kyè vey de bê to ba yila kwɔn hemo na reza Tɔfɛt kɛ Nɛk Hinɔm wɛt, bê tâng hɛ a Nɛk Mɔbɔs Bemat.

⁷A sé e kwɔn a hemo de mê lashe begwong de BeYuda na bemat Yɛrusalɛm ba yong. Mê tɛ̀ bemat repugu mɛn be di wɛng e ra yɛn, ko be mɔbɔs hɛn e como. Mê nɔng benon lagwi na ngyāma bavin mɛn na be sè pyɛ̂ re mɛn.

⁸Mê vey na gawey ves o tyɔng wɛt e ra gbɔng repomo remo, ko kawɛ mwat de a sé kwey e ji rɛ ê sè a yɛ kpɔrɔk, ko ê langat hɛ sedesi.

⁹Bemat repugu bê rɔnɔ gbɔng repomo mo, ko yɛn ê jama be mɔbɔs bemat rɛ arɔng. Rɔ́nɔ gbɔng repomo mo hê sè ves sizɔng, ko bemat de ba sé e ji rɛ bê re bemɛn, mwa na nèy mɛn pyɛ mɛn.’ ”

¹⁰E bama mo, Dagwi Darwey a yang me, me mɔrɔ tsung o e nuyel bemat de ba sé tanga me,

¹¹na me ha a yɛn wɔgɔ, Dagwi Darwey, Da Jey Mwa a ye: “Mê mɔrɔ bemat vemo na gbɔng repomo remo, ko yɛn ê sè sede tsung de wa ga mɔrɔ hɛ cɛk o cɛk o de bê tɔk to wuna wɛ wɛt. Bemat bê lɛsɛ bavin bemat mɛn e Tɔfɛt mwa, yaga vit a kwɔn hak de bê lɛsɛ ɛ vɛ.

¹²Ma sira, mê tɛ̀ gbɔng repomo remo na bemat rɛ be sè sede Tɔfɛt.

¹³Nelɔ Yɛrusalɛm, na nelɔ begwɔ̀m Yuda, na mwa nelɔ arɔng de ba ga rangas a netangacɛn nɔrɔ pyɛ̂ nesang hyɔɔlɔl e beraduk mɛn, mwa na nekwɔn de ba ga shusha ɛ nshi anap sede pyɛ̂ nɔrɔ vɔk na bedagwi beduk. Mwa nekwɔn o nê sè ligis sede Tɔfɛt.”

¹⁴E bama pyɛ́ yane, ma hala Tɔfɛt, kwɔn de Dagwi Darwey a ga tomo me na me wɔ̀ shara ɛ reha mɛ. Ma wɔ́, ko ma wɔ̀ tumal e lalâ Gbɔng Duk Re Fongol, ko ma ha a bemat o mwa wɔgɔ,

¹⁵Dagwi Darwey, Da Jey Mwa, Dagwi Israyɛl a ye: “Mê vey a gbɔng repomo remo, na karɛ repomo de ra sé bagat, na mwa tabak de ma ga ye mê vey mɛ, yaga yin a sé gbàrak, ko yin e wet betong na pyɛ de me ha wɛt.”