Read berom Yirmiya 2 Bible Online

Yirmiya 2 - berom bible

Yirmiya 2

¹Dagwi Darwey a yang me:

²Ci wɔ̀ shara ha hemo na kawɛ mwat e Yɛrusalɛm. “Dagwi Darwey a ye ngan: Ma bare na tsak o mo jeng de hwá rɔngɔl bwot, ma bare na tɛ̂ yey mo jeng de hwá rɔngɔl gwel. Hwá raa me vɔk e hey gbingiring, e tê hey de be tus ɛ pyɛ wɛt.

³À Israyɛl, ma kana tik o jaram yaga me nju hom, hwà sé nwang me sede bwâl mɛsɛng. Ma tomo na reyɔm tanga gawey e ra kawɛ mwat de a mǎ hwo. Me Dagwi Darwey ma ha ano.”

⁴Wet in betong na hâ Dagwi Darwey, à yin yerê Yakɔp, na mwa yin rùhup Israyɛl.

⁵Dagwi Darwey a ye, “Bedabeda min bá tɛ̀sɛ sekun hom e ra sɛ́ ɛ? E sɛ́ ya tɛ̀ yɛn a doyo yi na me ɛ? Yɛn a re a cī yê yapyi fongol, ko yɛn pyɛ mɛn ba tɛ́ ɛn yapyi arɔng.

⁶Yɛn a sang ye wɛt wɔgɔ, ‘Dagwi Darwey á wɛ, de á vey na wot yi e vwêl Misra, de á kyè na wot e hey, e vwel gbingiring, hê bavɔng, e vwel de ha hworok ko ha sé mwangalang, kwɔn de vit a mwat de e kwey ɛ, ko vit a mwat de e sangal ɛ arɔng.’

⁷Ma vey na yin e vwel de ha siri naka, na yin a re nèy cɔ́gɔt hɛ, na bwang pyɛ ryat de he nɔngɔs. Ko e jeng de yin a yel e hɛ, yin a tɛ̀ hɛ ligis, yin a tɛ̀ nap hom wo se pyɛ byɛm-byɛm.

⁸Bepiris min ba ka rangal wɛt, be ye, ‘Dagwi Darwey á wɛ ɛ?’ Vemo de ba tɔk badu hom ba tɔk me wɛt. Bemat nuyel mɛn ba sogo a me nehywɛ. Bezarap ba ha na rezâ Baal, ko yɛn a re a yapyi pyɛ̂ sekwit fongol.”

⁹Yaga ano, me Dagwi Darwey, ma to sé tɛ̀ sekûn bemat hom e nuyêl shɔt. Ma to sé tɛ̀ sekun nèy nèy min.

¹⁰Kyè in e rwa ta vɔk e rezik Kipirus, tomo hin mwat e rwa rak vɔk e sevwel Kedar, na yin a di, kɛ bá sang ra pyɛ cak yere yemo raane arɛt?

¹¹Yere bemat jey cak ya ga sang sege dagwî yɛ, mwa ano de pyɛ mo ya sé dagwi mwin wɛt a? Ko bemat hom ba ga sege wo gbɔng nerat mɛn, e tô ci de ye tɔk ra a yɛn pyɛ wɛt.

¹²Yaga ano, ma nɔ̂ng lagwi nu na wo digis na nevês pyɛ yemo, na a yang ɛn yɔɔt, na a sè a yɛn pyɛ langat. Me Dagwi Darwey ma ye ano.

¹³Bemat hom ba ga ra banɛn baba, yɛn a ga ye waa a me, me de ma sé lwel nshi neken. Ko yɛn a ga cing a to mɛn hès. Hes de ba ga taksal, ko bé tɔk vɔk nshi ko tyɔng wɛt.

¹⁴“Israyɛl a sé sam a? Ba tɔ ɛ e ji sesam a? Yaga sɛ́ de a ga tɛ́ ɛ pyɛ jugu ɛ?

¹⁵Yɛn e lulum e ra yɛ sede begukum; yɛn e lulum na gap. Yɛn a ga tɛ̀ vwel mɛ gbingiring, ko bapomo mɛ ba ga tɛ́ ɛn barin de ba ga hala vɛ mwa hal.

¹⁶Ey, bemat Mɛmfis na Tapanhes ba ga takla gwokup to mō.

¹⁷À Israyɛl, e hwo de hwà vey na pyɛ́ yemo e rato mo pyɛ mo! Hwà kyè hwo hala me, Dagwi Darwey, Dagwi mo, e jeng de ma sé kyè e nuyel mo e gwong.

¹⁸E sɛ́ de hwô sɛ̀ e wɔ́ mo e Misra, na hwo wɔ sɔ nshi Gwɔrɔt Nil a? Kɛ e sɛ de hwô sɛ e wɔ́ mo e Asirya, na hwo wɔ sɔ nshi Gwɔrɔt Ɛifaratɛs a?

¹⁹Bê tabak hwo yaga neves mo. Bê gang o na shɔt yaga hwà doyo a me ma. Ano de hwô di ko hwo tɔk a sé pyɛ vyes, de ya sé kpashak, na hwo gas o na me Dagwi Darwey, Dagwi mo. Hwà vɔk bengyip hom e yey mo wɛt. Me Darwey Dagwi Darwey, Wo Reto Mwa ma ha ano.”

²⁰Dagwi Darwey a ye, “À Israyɛl, yimo raane, hwà kyɛ́ o nà dyɛng to mo, hwá gas nesa mot sede ba kwɔrɔ swesêk vɔk berɔndɔng, ko hwá ye, ‘Mê ra a hwo fwom wɛt.’ E ra tɛ̂t kawɛ rahwol, na e nɛ̂n kayɛ cɔgɔt ryey ye berang pyak, hwó kwonot e de ragas nejwang.

²¹Ma kana tus o sede cɔgɔt anap ryat, yi e yere de ya dal mwa na nerat. Ko di de hwà ga tɛ́ o vwes, hwà ga tɛ́ o cɔgɔt anap ye hey.

²²Mwa ano de hwó kus o na netow; ko hwó ra fwom na fulukus pyak, mê sǎ e de bɛrɛng bavis neves mo. Me Darwey Dagwi Darwey ma ha ano.

²³Yi e rɛ̌ de hwô ye, ‘Ma ga pɔrɔk to hom wɛt, ma ga sang re a Baal fongol wɛt ɛ?’ Di gwong de hwá ra banɛn e ji nɛk; di pyɛ de hwà ga ra. Hwà sé sede maryat hey e jeng gwot de wo kyě tele kpɛɛ,

²⁴kɛ sede hwâ madung de wa ga tɔ́k ɛ na hey gbingiring, wo kyě wokos nesang rwas e gul! Wa ê kyɛm a dul gwôt wɛ ɛ? Vemo de be jama wɛ be bɔrɔk tó mɛn wɛt, yaga yɛn ê sɛ̀ wɛ e pwɛl o.

²⁵À Israyɛl, hwo yɔ́m bol mo, kɛ hwo tik fwɔ mo gwo hworok wɛt. Ko hwà ye, ‘Wey gyà! Mê tik wɛt, ma ga tɛ̀ yey na vê yére dyuk, ko mê raa vɛ zɔng.’ ”

²⁶Dagwi Darwey a ye, “Sede remo de be tɛ̀ a gbik rekyen jeng de be vo ɛ, ano arɔng bê tɛ̀ a BeIsrayɛl rekyen. Yɛn na begwɔ̀m mɛn, na bemat nuyel fwom mɛn, na bepiris mɛn, tanga bezarap mɛn arɔng.

²⁷Mwa na yin de yin e tâng retin cɔgɔt, ‘Hwà sé da hom.’ ko yin e tâng gwofwa, ‘Hwà tɔ me.’ Yaga yɛn a ga doyo a me ma, ko bayis mɛn wɛt. Ko e jeng reyɔm mɛn, yɛn e tē, ‘Vey sey ot.’

²⁸Pyɛ̂ sekwit á yɛ, de yin a ga yóng a bato min ɛ? Tik na ye vey sey in e jeng reyɔm, ka sede yê tɔk! Yaga yin a vɔk bedagwi pyak sede remo de yin a vɔk bapomo pyak, à yin BeYuda.

²⁹Yin e tɛ̀ sekun hom e ra sɛ́ ɛ? Yin a ga sogo nehywɛ e ra me wɛt a? Me Dagwi Darwey ma ha ano.

³⁰Ma tabak nèy min zɔng-reng, yɛn a sey yóng ɛn o wɛt. Yin a ga mɔbɔs bezarap Dagwi min, sede gukum de vyong ya ga hwo wɛ.

³¹À yin zamang hemo, wet in betong na hâ Dagwi Darwey. Ma ga tɛ́ me sede hey gbingiring na yin BeIsrayɛl, kɛ sede vwel de ha sé gyibilik ding-ding a? Yaga sɛ́ kwong de yin e tē, ‘Wot a sé washak, wot ê sang to vey na hwo wɛt ɛ?’

³²Hwong e tɔk ye bam a pyɛ̂ tɔrɔ mɛ, kɛ gwel a ye bam a yɔ̀m weneng mɛ bɛ? Ko mwa ano, bemat hom ba ga ye bam a me, nepɔlɔ kpɛɛ sana tɔk basa nɛ.

³³Ey, yin a tɔk raà beras yey min. Ko beha de ba dal mwa na neves, yin a ga masa a yɛn negwɔn neves min.

³⁴Berugu min ba vɔk bavis, nemî bepɛng vê renɛn rehak wɛt, mwa ano de yin a vos ɛn e de shigi wɛt. Ko mwa e ra pyɛ́ yemo zɔng,

³⁵yin a ye, ‘Ma ga ra pyɛ cak vyes wɛt, ko ma tɔk tsɛng-tsɛng Dagwi Darwey a to vɔk shom na me wɛt.’ Ko mê tabak hwo yaga hwó tē ‘Ma ga ra banɛn wɛt.’

³⁶Yaga sɛ́ de yin e sǎ e de rip in e de segsa begwong min ɛ! Misra wô nɔng in rekyen tyɛng sede remo de Asirya wa ra a yin.

³⁷Yin ê toyo yi e Misra na vɔ min e rato. Yaga me Dagwi Darwey ma ga kyɛ́ me zakzak vemo de yin a tɛ̀ gap min e ra yɛn, yin ê sɛ nedenerey nehak na yɛn wɛt.”