Read berom Yirmiya 20 Bible Online

Yirmiya 20 - berom bible

Yirmiya 20

¹Jeng de Pash-hur Imer, piris, de á sè mwat nuyel bemat fwom Gbɔng Duk Re Fongol, a wok Yirmiya a sè shara neha nemo,

²ko a hwo tɛ̀ be dak ɛ, be tɛ̀ bol me e tê sesek e lɔ ngyang bagat na Ruhup Bɛnyamin gwo rak o gwo Gbɔng Duk Re Fongol.

³Nusu hwol, bama de Pash-hur a ga tɛ̀ be viri a yɛ ngyang o, ko a hwo yang ɛ, “A sé e Dagwi Darwey de á vo a hwo reza Pash-hur wɛt. Reza de á vo a hwo à ‘Tɛ̀ Bengyip e Kawɛ Bak.’ ”

⁴Dagwi Darwey pyɛ mɛ a ye: “Mê tɛ̀ hwo sè pyɛ bengyip ye tó mo, na ye besa mo, ko hwô di de ve repugu bê mɔbɔs hɛn mwa hywiri e como. Mê tɛ̀ BeYuda mwa be sè e nɛn reto gbɔng gwɔ̀m Babilɔn. A rɔda hashe behak mɛn a kyè mɛ, na be wɔ̀ tɛ́ ɛn bemat ngyang e sevwel mɛ, ko a rɔda mɔbɔs behak mɛn e como arɔng.

⁵Mê tik bemat repugu mɛn be hashe pyɛ̂ nedanerey gbɔng repomo remo e jugu, na yɛn a seres ɛ mwa nedok nekyɔrɔk na pyɛ̂ mwa de yɛn a vɔk, mwa na pyɛ̂ nedanerey begwɔ̀m Yuda, ko yɛn a rɔda hashe yɛ pyɛt vɔk e Babilɔn.

⁶Ko di hwo, à Pash-hur kē, hwo na belɔ mo mwa, bê vos in e jugu, ko be kyè na yin vɔk e Babilɔn arɔng. Hwô ku e hwomo, ko be lɛrɛ hwo ɛ, mwa yin na besa mo de hwà sangal e de vɛ́sɛ a yɛn nebɔs hyiw!”

⁷“À Dagwi Darwey, hwà ga kwɛlɛng me, ko ma ga ye rɛng. Hwà dal me na gap, ko hwà ga dal gap hom. Kawɛ mwat e haras a me, be shɛgɛsh me mwa wosho.

⁸Kayɛ jeng de me hanat, ko sɛ̌ ma ye ngyat, me gbɔ me tē, ‘Yol na Gawey!’ Yaga hâ Dagwi Darwey ha ga tɛ́ ɛ a me, pyɛ neves na ye sedusa kahɛ tuk.

⁹Ko jeng de me ye, ‘Mê to ha ha mɛ wɛt, kɛ mê to ha e ji reza mɛ wɛt’, ko ha mo ha sé sede kya de he re e hwomo e yey hom, ba bang hɛ e bekup hom. E sè a me gbɛrɛk e de bang hɛ ko me kyɛm me ra ano wɛt.

¹⁰Me wok kawɛ mwat e ha show-show wɔgɔ: ‘Tɛ̀ a bemat bengyip e kagwa! Tono reza mɛ! Tik wot tono na yɛ!’ Mwa besa hom vê bagat be gyeng na be di gaba hom. Yɛn e tē, ‘Gyeng wot ê tɔk kwɛlɛng hɛ, na wot a de vo ɛ, na wot a tala hɛ pyɛ de a ga ra a wot.’

¹¹Ko Dagwi Darwey a sé e hagat hom sede suga, ko vemo de be tak a me bê ye bugurɛk, ê sè a yɛn yɔɔt de ba di wɛng wɛt. Bê vo rekyen sizɔng, yaga yɛn a di wɛng wɛt. Bê tɔk ye bam a rekyen de bê nɔng ɛn wɛt.

¹²Ko hwo, à Dagwi Darwey, Da Jey Mwa, hwó masa vê cik, hwó bɛrɛng neyey na báre mɛn, tik na me di de hwô tala ve repugu hom, yaga ma ga tik ha hom e vɔ mo.

¹³Ra in a Dagwi Darwey lwɛ̄lɛ, somo hin Dagwi Darwey! Yaga a ga sey neken bepɛng, yi e vɔ bemat beves.

¹⁴Gawey e ra tuk de bà tɔ me! Ye bam à tuk de neng-gwɔ hom à tɔ me!

¹⁵Gawey e ra mwat de a wɔ̀ há a da hom, ‘Ba ga tɔ a hwo hwey wen’. Ha mo ha nɔng ɛ yey pyɛng sizɔng.

¹⁶Tik na a sè sede bagbɔng bapomo de Dagwi Darwey a wey mɛ sana wok nemwishish vɛ. Tik na a wok sesin pyɛ de ye royo nagasi, na durum como e tê-gwi,

¹⁷yaga a tik nà mɔrɔ me e jim, ka jim neng hom ya yang sè sak hom, ka a yang vɔk jim o nesheneshey.

¹⁸Yaga sɛ́ de ma nusu yi e jim o, na me di tâk reyɔm na lashe yey, na nepɔlɔ hom ne yɛnɛ hɛn na rekyen ɛ?”