Read berom Yirmiya 21 Bible Online

Yirmiya 21 - berom bible

Yirmiya 21

¹Hâ Dagwi Darwey vɔk na Yirmiya à hemo jeng de Zɛdɛkiya gbɔng gwɔ̀m Yuda a tomo a yɛ Pash-hur Malkiya na Tsefanya Maaseya piris na yɛn a wɔ̀ rangal hɛ ngan:

²“Gabɔk wɛt, ha na Dagwi Darwey yaga wot, yaga Nɛbukadnɛzar gbɔng gwɔ̀m Babilɔn na bemat como mɛ ba sé rɔnɔ gbɔng repomo mot na como. Gyeng rɔ̌ Dagwi Darwey ê ra a wot pyɛ bes mɛ cak de yê tɛ̀ gbɔng gwɔ̀m o a toyo yi na wot.”

³Ano kwong, Yirmiya a yang ɛn,

⁴yɛn a yang Zɛdɛkiya ngan, “Dagwi Darwey, Dagwi Israyɛl, a ye, ‘À Zɛdɛkiya, ma sé kyè wɔ̀ re bemat como mo de ba sé tó como na gbɔng gwɔ̀m Babilɔn na bemat como mɛ. Mê tɛ̀ be tula regwɔt pyɛ̂ como bemat mo e tê gbɔng repomo.

⁵Mê tó como na hwo na gap hom mwa, na lashe yey hom mwa, na shom hom de ya sogo sizɔng.

⁶Mê wey na kawɛ mwat de a sangal e gbɔng repomo remo; ko bemat mwa na yas bê kushu na tumbang.

⁷Ko di hwo, na bemat fwom mo, na mwa vemo de ba hywit ɛn e como, na vyong, tanga tumbang — mê tik Gbɔng Gwɔ̀m Nɛbukadnɛzar a vos in, yɛ na ve repugu min de be simo be mɔbɔs hin. Nɛbukadnɛzar ê wey na yin. A rɔda tik hwak e ji min a hywit ɛ wɛt, ê tosho reyɔm, kɛ a wok nemwishish hwak e ji min wɛt. Me Dagwi Darwey ma ha ano!’ ”

⁸Ano de Dagwi Darwey a ha a me na me ha a bemat o, me ye, “Wet in betong! Me Dagwi Darwey ma sé nɔng in kasa e tê gwong de gwo kyè vɔk e neken, na gwomo de gwo kyè vɔk e reku.

⁹Kawɛ mwat de a sangal e gbɔng repomo mo, bê mɔrɔ hɛ na como, kɛ na vyong, kɛ na tumbang ow. Ko kawɛ mwat de a nusu e jey, na a nára a BeBabilɔn tó mɛ, yɛn vemo de ba sê como na gbɔng repomo mo, bê mɔrɔ hɛ wɛt; ko ê hywit ɛ na neken mɛ.

¹⁰Ma ga tɛ̀ e yey hom mê tik gbɔng repomo remo re nàra wɛt, ko mê wey na rɛ. Mê nára a gbɔng gwɔ̀m Babilɔn rɛ, ko ê tɛ̀ kya e rɛ hywiri. Me Dagwi Darwey ma ha ano.”

¹¹Dagwi Darwey a yang me me há a lɔ gwɔ̀m Yuda ha hemo ngan, “Wet in betong na ha de ma sé ha:

¹²À yerê Davit! Dagwi Darwey a ye ngan: “ ‘Gas in shɔt e tē kahɛ tuk, sey in mwat de ba sé mɔt ɛ, yi e vɔ womo de e tak a yɛ, ka ano wɛt ko shom hom yê sogo sede kya, hê re ko vit à mwat de ê tɔk rimi hɛ, yaga pyɛ́ vyes de yin e ragas.

¹³Di, ma sé ra nu na hwo, à hwo wo sangal e nɛk, sede gwofwa de gwa nusu garang e tyɛl, hwo de hwó tē: Wà ê tɔk vey hwo e ra me, kɛ wà ê kyɛm a yel e nekwɔn dál hom ɛ?

¹⁴Mê tabak hwo, tyɛng na neves tom mo, mê tɛ̀ kya e lɔ gwɔ̀m mo de be tang hɛ à rehwot, ko hê re kayɛ pyɛ de ya rɔnɔ hɛ buruk. Me Dagwi Darwey ma ha ano.’ ”