Read berom Yirmiya 22 Bible Online

Yirmiya 22 - berom bible

Yirmiya 22

¹Dagwi Darwey a yang me: “Ci e lɔ gwɔ̀m Yuda, na hwo ha ha hemo:

²‘Wet betong na hâ Dagwi Darwey, à hwo gbɔng gwɔ̀m Yuda, de hwà sé sangal e ra gwofwa negwɔm Davit, hwo na bemat fwom mo tanga bemat mo de be yeles e rùhup vemo.

³Me Dagwi Darwey ma nɔng o nu, hwo ra pyɛ́ na necik na hwo gas badu e tē arɔng. Gyep mwat de ba sé mɔt ɛ yi e mwat de a sé shigi a yɛ mo. Hwo ra pyɛ vyes cak kɛ hwo ra yol na bemât yére dyuk, kɛ bekuma, kɛ hwo mɔt ɛn wɛt, kɛ hwo mɔbɔs bemat de ba ra pyɛ wɛt e kwɔn hemo.

⁴Ka sede hwà ra pyɛ de ma nɔng nu e ra yɛ mwin, ko yere Davit yê re nuyel na re negwɔm. Ko yɛn, mwa na bemat fwom mɛn na bemat mɛn, bê re nuyel na kweres e rùhup lɔ gwɔ̀m hemo e ra bekyɛkyɛ bedwa tanga e ra bedwa mɛn arɔng.’

⁵Ko ka sede hwà gyeng nu hom wɛt, ko ma sira me, lɔ gwɔ̀m hemo hê gaba, hê tɛ́ ɛ barin. Me Dagwi Darwey ma ha ano.”

⁶Ey, pyɛ de Dagwi Darwey a ha e ra lɔ gwɔ̀m Yuda à yemo: “Hwà sé a me sede Gileyat, sede rà rak Raku Lɛbanɔn. Ko ma sira mê tɛ̀ hwo sè gbingiring, gbɔng pomo de vit à mwat.

⁷Mê yong bemât wey na hwo, mwa na pyɛ̂ como mo. Yɛn ê yɛt cɔ́gɔt sida mō de ya dal na nerat, na yɛn a bomos yɛ e kya.

⁸“E bama mo, bemat yére dyuk pyak bê kweres ko be rangsâl bemɛn pyɛ de ya tɛ̀ me, Dagwi Darwey ma ra a gbɔng repomo remo pyɛ yere yemo.

⁹Ko yɛn ê toyo mɛ̀, be ye, a sé yaga yin a ga ye waa a wuna-na-sira min na me, Dagwi Darwey, Dagwi min, ko yin a ga re a pyɛ̂ sekwit fongol, yin a ga ra a yɛ fwom arɔng.”

¹⁰“À yin BeYuda, yin kwon tosho Gbɔng Gwɔ̀m Yɔsiya de a ga ku wɛt, yin ra sesîn reku mɛ wɛt. Tosho hin Gbɔng Gwɔ̀m Yɛhɔwahas Yɔsiya yaga ba ga kyè na yɛ, ko ê to toyo wɛt, ê sang to di vwêl tɔ́ mɛ wɛt.”

¹¹Dagwi Darwey a ha ano e ra Yɛhɔwahas Yɔsiya, yɛ de a re negwɔm da mɛ ne gwɔ̀m Yuda, a ye, “A ga kyè yi e ngamo, ko ê sang to toyo wɛt.

¹²A rɔda ku e vwel de ba jut ɛ vɔk ɛ, ko ê sang to di vwel hemo wɛt.”

¹³“Gawey e ra mwat de e lɔk lɔ mɛ e ra gwong de gwa sé cik wɛt, ko beduk rak o e ra gwô tsak o wɛt, yɛ de e tɛ̀sɛ bemat vwara mɛ be ragas a yɛ fwom e nɔrɔ, ko e talsa hɛn byɛ mɛn wɛt.

¹⁴Gawey e ra womo de e tē, ‘Mê lɔk a tó hom gbɔng lɔ, na beduk rak o betes.’ Ano a tɛ̀ bapɔk bates e lɔ mo, a tɔrɔ vara mo na cɔ́gɔt sida, ko a mɔmɔ hɛ na būm swinang.

¹⁵Hwó bare hwô sè gwɔ̀m rwat ka sede hwà lɔk nelɔ na cɔ́gɔt sida a? Da mo á vɔk pyɛ̂ re na nshî sɔ, nshî sɔ shɛrɛk ko á gas badu e tē na a ra necik wɛt a? Yaga ano, pyɛ̂ mwa ya sè á yɛ naka.

¹⁶Á ragas a bepɛng na vê nevit pyɛ́ shɔt tsak o, yi ano, kayɛ pyɛ ya kyè a yɛ gyat. Pyɛ ma yane de be tâng yɛ wɔgɔ, mwat o a tɔk me. Me Dagwi Darwey ma ha ano.

¹⁷Ko di hwà sɛt bayis mo na yey mo e ra jama pyɔlɔ̂ bɔs, na e ra shushu nemi bemat berat, tanga e ra mɔt bemat, na yol.

¹⁸Yaga ano, pyɛ de Dagwi Darwey a ha e ra Yɛhɔyakim Yɔsiya, gbɔng gwɔ̀m Yuda a yemo: Bê tosho hɛ wɛt, be tē: Yaa kukuuk, à gwa hom wen! Yaa kukuuk, à gwa hom hwong! Bê tosho hɛ wɛt, be tē: Yaa kukuuk, à darwey! Yaa kukuuk, à gbɔng gwɔ̀m!

¹⁹Bê lɛrɛ hɛ sede madung — bê hwɔlɔ hɛ, be wɔ bomo e bama ri Yɛrusalɛm.”

²⁰“À bemat Yɛrusalɛm, nusu hin vɔk e beraku Lɛbanɔn na yin wɔ̀ dak sekun, kyè in vɔk e beraku Bashan, na yin wɔ̀ tosho; yila hin yi e beraku Mowap, yaga ba ga re besâ como min mwa.

²¹Ma tusa hin jeng de kayɛ pyɛ ya sé a yin gyat, ko yin a ye, ‘Wot ê wet betong wɛt!’ Begwong min ba sé ano yimo newen min, yin a ga gyeng ha hom wɛt.

²²Gul gwô gangas bemat nuyel min e jey sede belek na yas mɛn, ko besâ como min bê kyè vɔk e de sesam. Ano yin ê vo rekyen, yin ê tɛ́ in pyɛ byɛs, yaga mwa neves de yin a ragas.

²³Yin de yin a sangal e Lɛbanɔn, yin a lɛsɛ hin e nelɔ de ba tɔrɔ na cɔ́gɔt sida, yin ê ba gwɔrɔng jeng de nepêp royo na hwo in, nepep yere ne hwā de e kyè wɔ tɔ.”

²⁴Dagwi Darwey a yang Gbɔng Gwɔ̀m Yɛhɔyakin Yɛhɔyakim wo Yuda, “Ma sira na neken hom, ka hwà ka sé yɔbɔ̂ tô gwɔ̀m ye kwɛn vwɔ yege hom, mê pat o na gap,

²⁵ko mê nɔng o na bemat de hwó tele hwo hɛn, yɛn de be simo be mɔrɔ hwo. Mê nára hwo e vwɔ Gbɔng Gwɔ̀m Nɛbukadnɛzar wo Babilɔn, na BeBabilɔn na bemat como mɛ.

²⁶Mê tɛ̀ o, na neng-gwɔ mo e ji sesam na retek. Yin ê kyè vɔk e vwel de ba tɔ hwak e ji min e ji hɛ wɛt, ko mwa hin yin ê kushu e hwomo.

²⁷A rɔda to sè a yin cwey di vwel hemo, ko yin ê sang to toyo ɛ wɛt.”

²⁸Ma ye: “Sɛ̌ mwat womo, Gbɔng Gwɔ̀m Yɛhɔyakin a ga tɛ́ ɛ pyɛ byɛs sede gwɛt tsung, rwey de vit a mwat de e to simo a? Yaga sɛ́ de ba kyɛ́ ɛn hɛ na nèy mɛ be wɔ bomos hɛn e vwel de yɛn a tɔk hɛ wɛt ɛ?

²⁹Káa à vwel, à vwel, à vwel! Wet betong na hâ Dagwi Darwey!”

³⁰Dagwi Darwey a ye ngan: “Jɛk mwat womo sede mwat nà hwey, mwat de ê vɔk nerat wɛt mwa nepɔlɔ mɛ e jey. Yaga vit a hwak e ji nèy mɛ, de ê di wɛng, de ê sangal e ra gwofwa negwɔm Davit, na a to re negwɔm Yuda.”