Read berom Yirmiya 23 Bible Online

Yirmiya 23 - berom bible

Yirmiya 23

¹Dagwi Darwey a ye, “Gawey e ra belek de ba sé wey, ko ba to sé shara tyīmit hom e kwɔn sehwey hom!”

²Pyɛ de Dagwi Darwey, Dagwi Israyɛl a ha a belek de be gyeng bemat mɛ à yemo, “A remo de yin a ga shara kwarâ tyīmit hom, yin a ro yɛ, ko yin a gyeng yɛ hywɛ wɛt, mê tabak hin yaga neves de yin a ra.

³Me pyɛ hom mê tula bwang kwara mo yi e mwa bavwel de ma ga kana shara hɛn ɛ, ko mê toyo na yɛ vey e dem gyenges yɛ̄ hê neta de yê tɔs nèy na ye karak.

⁴Mê tɛ̀ a yɛ belek de bê gyeng yɛ naka, ko yê to wok bengyip kɛ ye tē lot wɛt, ko cak yê to vuru hɛ arɔng wɛt. Me Dagwi Darwey ma ha ano.”

⁵Dagwi Darwey a ye, “Jeng ye kyè vey, de mê kasa gbɔng gwɔ̀m de a sé cik yi e yerê Davit, sede lang rat yi e cɔgɔt. Gbɔng gwɔ̀m de ê re negwɔm, na netsitsɛng, na a ra necik, na a gas badu e tē e sevwel o.

⁶E jeng mɛ, bê sey neken Yuda, ko Israyɛl ê sangal tyang. Reza de bê yila hɛ mɛ à remo: Dagwi Darwey à necik mot.”

⁷Dagwi Darwey a ye, “Jeng ye kyè vey de bemat bê sira na me ‘Dagwi wo neken de a pat BeIsrayɛl yi e Misra’ wɛt.

⁸Yɛn ê sira na me ‘Dagwi wo neken de a pat BeIsrayɛl yi e sevwêl sehak sê rwa bato, tanga yi e mwa bwang bavwel de ma ga kana shara hɛn vɔk ɛ.’ Mê toyo na yɛn e sevwel mɛn.”

⁹E ra reha bezarap Dagwi, “Yey hom ya ga tùt ɛ, mwa bekup hom be vow. Ma ga tɛ́ me sede mwat de a ga feng siring, mwat de a ga sɔ nshi anap pyak. Yaga Dagwi Darwey, tanga yaga ha mɛ hê jɛrɛ.

¹⁰Yaga vwel o ha sila na bemat ragas nejwang na sap cī, vwel o he tosho yaga Dagwi Darwey a ga kyini hɛ, nekwɔn gyenges yas e hey gbingiring na ga hworos. Yɛn a tɛ̀ rágas neves e neyey mɛn, yɛn e ra fwom na gap mɛn e begwong de ba jam wɛt.”

¹¹Dagwi Darwey a ye, “Bezarap hom mwa na bepiris hom be sap me wɛt. Ma ga vos ɛn e de ragas neves e duk re fongol.

¹²Yaga ano, gwòng mɛn bê sè a yɛn, sede vè tɔlɔt e jey hywiinin, Bê gangas hɛn e vɛ̀ ko bê gabsa, yaga mê vey na gawey e ra yɛn e shey tabak mɛn. Me Dagwi Darwey ma ha ano.

¹³E ji bezarap ve Samariya, ma ga di pyɛ́ vyes sizɔng. Yɛn a ga ha e reza Baal, ko yɛn a ga tɛ̀ bemat hom BeIsrayɛl be hala gwong hom.

¹⁴Ko e ji bezarap hom ve Yɛrusalɛm, ma ga di pyɛ de ya dal na neves. Yɛn e ragas nejwang, ko be vɛ́sɛ bɔs yɛn e sɛlɛ bemat na be buru, na vit a mwat de a tik nà ra pyɛ vyes. Mwa hɛn yɛn a sé a me beves sede bemat Sɔdɔm, ko bemat kwɔn o sede vê Gɔmɔra arɔng.

¹⁵Yaga ano, pyɛ de Dagwi Darwey, Da Jey Mwa a ye e ra bezarap mɛn à yemo, Mê nɔng ɛn pyɛ̂ re de ya sé kpashak, na yɛn a sɔ nshi de na vɔk nedɔm. A sé yi na bezarap hom ve Yɛrusalɛm, de neves nà shara hɛ e yɛnɛ sevwel o mwa.”

¹⁶Dagwi Darwey, Da Jey Mwa a ye: “Yin wet betong na ha de bezarap hom be ha a yin wɛt, yɛn e kwɛlɛng hin, yɛn e ha negwi-ywey ne tó mɛn, ko e pyɛ de ye yis e nu Dagwi Darwey wɛt.

¹⁷Be tâng vê byɛs ha Dagwi Darwey, ‘Yin ê vɔk yey dyɛngɛ’, na mwa vemo de be raa negbarak mɛn, ‘Gawey hê ra in wɛt!’

¹⁸E wa de á ga sè e de badu Dagwi Darwey na a di, kɛ a wok ha mɛ ɛ? Wa a ga gyɛng vô du mɛ na a shara hɛ ɛ?

¹⁹Di in, gul rwak Dagwi Darwey, gwa sé sede shom vyes mɛ, sede wúla de wo pɛsɛl na gap, gwô takla e bato bemat beves.

²⁰Shom Dagwi Darwey yê ye rɔ̀s wɛt, sɛ̌ a ra kayɛ pyɛ de e simo, tyɛng na pyɛ de ya sé e yey mɛ. E jeng ye yɛnɛ mo bê tɔk cap-ha mo wɛshɛrɛk.

²¹Ma tomo bezarap vemo wɛt, ko mwa ano yɛn a tele wɔ̀ ha. Ma ha na yɛn wɛt, ko mwa ano yɛn a wɔ yis na ha.

²²Ko ka yɛn a yang sè e de vô du hom, ka yɛn a yang shara a bemat neha hom, ko yɛn a yang doyo yi e gwòng ves mɛn, na yi e pyɛ́ vyes de yɛn e ragas.”

²³Dagwi Darwey a ye, “Ma sé Dagwi wo bagat zɔng, ma sé wo yikyik wɛt a?

²⁴Mwat e tɔk lɛrɛ tó mɛ e vwak hwak de mê kyɛm me di ɛ wɛt a? Ma sila lagwi na jey mwa wɛt a?

²⁵Ma tɔk pyɛ de bezarap vane ba ga ye, yɛn de be vɛ́sɛ bɔs e ji reza hom, be tē: ‘Ma ga ranas negwi! Ma ga ranas negwi yi na Dagwi!’

²⁶Vɔk e yɛ̌ jeng de bɔs hê nusu yi e neyey bezarap bɔs de be ha neha bɔs de na sé e neyey mɛn ɛ?

²⁷“Yɛn e bare, negwi de yɛn e ha nê tɛ̀ bemat hom be ye bam à me sede remo de beda mɛn bá ye bam a me, ko bá doyo e de raà Baal.

²⁸A sé naka na zarap Dagwi a ye, a sé e negwi de a ranas zɔng, ko zarap de a wok ha hom, a ha hɛ na tsak o arɔng. Bê tɔk tyɛngrɛ cugul na alkama a?

²⁹Há hom ha sé sede kya, tanga sede remos de re mɔbɔs beta cɛk o cɛk o.

³⁰Ma ga sogo cik e ra bezarap de be hashe neha bemɛn, ko be shara nɛ sede neha hom.

³¹Ano arɔng, ma ga sogo cik e ra bezarap de be ha neha mɛn ne tó mɛn, ko be tē, na yi na me.

³²Wet betong na pyɛ de ma ye, Dagwi Darwey a ye, ‘Ma ga sogo cik e ra bezarap de be ha negwi mɛn de na sila na nebɔs. Yɛn e ha negwi o ko yɛn e tɛ̀sɛ bemat hom be tē rɛng yi na nebɔs tanga dâk kaa mɛn. Ma tomo hɛn, kɛ ma nɔng ɛn nu be kyè wɛt, ko yɛn a vɔk hâ sɛlɛ hak ko tyɔng vɔk na bemat o wɛt. Me Dagwi Darwey ma ha ano.’ ”

³³Dagwi Darwey a yang me, “À Yirmiya, ka sede hwak e ji bemat hom, kɛ zarap kɛ piris ayi a rangal hwo, a ye, ‘Barê yey Dagwi Darwey ha sé e rɛ ɛ?’ Ko hwo yang ɛ, ‘Bare yey mɛ ha sé yin pyɛ min — yin à bare lashe yey mɛ! Ko yɛ ê bomo hin e jey.’

³⁴Ka sede hwak e ji bemat hom kɛ zarap, kɛ piris a ka ra fwom na batîn ha vemo wɔgɔ, ‘Bare yey Dagwi Darwey’, ko mê tabak hɛ, yɛ na belɔ mɛ.

³⁵Ko kawɛ mɛn a rangal besa mɛ bemat vwara mɛ, a ye, ‘Dagwi Darwey a ga toyo na ha wɔgɔ, ala arɛt? Dagwi Darwey a ga ye ala ɛ?’

³⁶Ko yɛn a kwon to ha wɔgɔ, ‘Bare yey Dagwi Darwey’ wɛt, yaga ka sede mwat hwak a ra ano, ko mê tɛ̀ ha hom he sè a yɛ barê lashe yey mwin. Bemat o ba ga sege neha Dagwi mɛn, Dagwi wo neken, Dagwi Darwey, Da Jey Mwa.

³⁷Hwo rangâl bezarap ngan, ‘Dagwi Darwey a toyo a yin na sɛ́ ɛ? Dagwi Darwey a ye ala ɛ?’

³⁸Ko ka sede yɛn a ye, ‘Bare yey Dagwi Darwey.’ Ko me Dagwi Darwey ma ye, A remo de yin a tē, ‘Bare yey Dagwi Darwey’, jeng de ma ga tusa hin e ra té ano,

³⁹ko mê hashe hin mwin, mê basak hin yikyik yi na me, yin na mwa gbɔng repomo de ma nɔng in, yin tanga bedabeda min.

⁴⁰Mê tɛ̀ yin a tɛ́ in pyɛ sedusa na ye rekyen de bê sang ye bam a yɛ wɛt.”