Read berom Yirmiya 24 Bible Online

Yirmiya 24 - berom bible

Yirmiya 24

¹E bama de Nɛbukadnɛzar gbɔng gwɔ̀m Babilɔn a vo Yɛkɔniya Yɛhɔyakim gbɔng gwɔ̀m Yuda e Yɛrusalɛm, a kyè na yɛ vɔk e de sesam, yɛ na bemat nuyel Yuda, na bemat fwôm vwɔ, na bezu, a kyè na yɛn mwa vɔk e Babilɔn. Ko Dagwi Darwey a dura a me e negwi-ywey sháp bya yê nèy regwi de ba tik e nuyel Gbɔng Duk Re Fongol.

²Shap ye mɛsɛng ya vɔk nèy regwi nerat de nà tanga vel, ko ye neba ya vɔk nèy regwi neves de bê tɔk re nɛ wɛt.

³Ko Dagwi Darwey a yang me, “À Yirmiya, hwà di sɛ́ ɛ?” Ma toyo a yɛ, ma ye, “Nèy regwi. Nerat o na sé nerat sizɔng, ko neves o, na sé neves de bê tɔk re nɛ wɛt.”

⁴Ano kwong, Dagwi Darwey a yang me,

⁵“Me Dagwi Darwey, Dagwi Israyɛl ma sé bɛrɛng bemat de ba hashe vɔk e vwel BeBabilɔn ba sé sede nèy regwi nerat nemo, ko mê teshe na yɛn na nerat.

⁶Mê gyeng ɛn, na me ba toyo na yɛn e vwel hemo. Mê lɔk ɛn naka, ko mê gangas hɛn e vwel wɛt. Mê tus ɛn, ko mê luyu hɛn wɛt.

⁷Mê nɔng ɛn yey de yɛn ê tɔk, me wɛ ma sé Dagwi Darwey. Ano yɛn ê sè bemat hom, ko mê sè Dagwi mɛn, yaga yɛn ê toyo vey na me na yey mɛn mwa.

⁸“Me Dagwi Darwey mê teshe na Zɛdɛkiya gbɔng gwɔ̀m Yuda na bemat nuyel mɛ tanga bwang bemat de ba pɔl e Yɛrusalɛm na mwa vemo de ba kyè vɔk e Misra, mwa hɛn mê teshe na yɛn sede nèy regwi neves de bê tɔk re nɛ wɛt.

⁹Mê tɛ̀ yɛn a sè pyɛ byɛm-byɛm na pyɛ vyes e nuyel yére bemat jey mwa. Yɛn ê sè pyɛ sedusa, bê haras a yɛn, bê shɛgɛsh hɛn, bê sè kis e mwa nekwɔn de mê shara hɛn vɔk ɛ.

¹⁰Mê vey na como, na vyong tanga tumbang e ra yɛn, sɛ̌ yɛn a wey hywiri yi e sevwel de ma nɔng ɛn, yɛn na beda mɛn.”