Read berom Yirmiya 26 Bible Online

Yirmiya 26 - berom bible

Yirmiya 26

¹E susu rê negwɔm Yɛhɔyakim Yɔsiya wo Yuda, ha hemo ha yi na Dagwi Darwey vɔk na Yirmiya wɔgɔ,

²“Dagwi Darwey a ye ngan: ‘Tumal e lala Gbɔng Duk Re Fongol, na hwo shara mwa pyɛ de ma nɔng o nu, na hwo ha a bemat de ba yi e mwa bapomo Yuda, na be ba re fongol e hwomo. Ha a yɛn kayɛ pyɛ de ma nɔng o nu e ra yɛ, hwo tik pyɛ cak sana ha a yɛn wɛt.

³Gyeng rɔ̌ bemat o bê wet betong, na be hala begwong beves mɛn. Ka sede yɛn a ra ano, ko mê sege bare hom e ra reha gawey de ma ga yong, na me vey mɛ e ra yɛn yaga mwa tomong ves mɛn.’ ”

⁴Dagwi Darwey a yang me, me ha a bemat o ngan, “Me Dagwi Darwey ma ye: Gyeng in Badu hom yi na raà pyɛ de ma ga nɔng in,

⁵na yi na tɛ̂ nehywɛ e ra reha de bemat fwom hom, bezarap, de ma ga sǎ e de tomsal a yin mɛ. Yin a ga sang gyeng pyɛ de yɛn a ha wɛt.

⁶Ano, ma rɔda wey na Gbɔng Duk Re Fongol womo sede pyɛ de ma kana ra e Shilo, ko mwa yére bemat jey bê tɛ̀ reza gbɔng repomo re sè pyɛ sedusa.”

⁷Bepiris, mwa na bezarap Dagwi, tanga mwa bemat o ba wok de Yirmiya a sé ha pyɛ́ yemo e Gbɔng Duk Re Fongol.

⁸Ko ras de Yirmiya a yɛnɛ mwa neha de Dagwi Darwey a nɔng ɛ nu na a ha, mwa hɛn ba vo ɛ, ba tá mɛ lwɛ́lɛ, ba ye, “Wot ê mɔrɔ hwo!

⁹Yaga sɛ́ de hwà ga ha e ji reza Dagwi Darwey wɔgɔ, Gbɔng Duk Re Fongol womo wô tɛ́ ɛ sede Shilo, ko bê wey na gbɔng repomo remo, ko vit a mwat de ê sangal e ji rɛ ɛ?” Ko bemat o ba gushung hɛn, ba tɛ̀ ɛ e tē e Gbɔng Duk Re Fongol Dagwi Darwey.

¹⁰Sede bemat nuyel Yuda ba wok pyɛ́ yemo yɛn a nára hɛn dey-dey yi e lɔ gwɔ̀m vey e Gbɔng Duk Re Fongol, ko yɛn a sangal e nuyel Ruhup Pwas.

¹¹E bama mo, bepiris, na bezarap Dagwi ba yang bemat nuyel na bwang bemat o, “A sé naka be yɛrɛ a mwat womo shɔt reku, yaga a ga ha ha ves e ra gbɔng repomo remo. Yin a wok ha mo na betong min.”

¹²Ko Yirmiya a ha na mwa bemat nuyel o, na bwang bemat o a ye, “A sé e Dagwi Darwey de a pat me na me shara kayɛ pyɛ de yin a wok ma ha e ra Gbɔng Duk Re Fongol womo, na e ra gbɔng repomo remo.

¹³Yaga ano, sege hin begwong sangal min, na pyɛ́ de yin a sé ra, na yin a gyeng hâ Dagwi Darwey, Dagwi min. Ka yin a ra ano, ko a rɔda sege bare yey mɛ e ra reha gawey de a ye ê vey mɛ e ra yin.

¹⁴Ko di me, ma sé e vɔ min! Ra in a me pyɛ de yin a di ya sé naka, ko ya sé a yin tyɛng.

¹⁵Ko tik na yin a tɔk tsɛng-tsɛng, ka sede yin a mɔrɔ me, ko bê gang in na gbɔng repomo remo tanga mwa bemat de ba sé e ji rɛ na shɔt losho nemi mwat de a sé cik, yaga e ji ha mwin, a sé e Dagwi Darwey de a tomo me na me ba ha neha nemo e betong min.”

¹⁶Ko bemat nuyel, na bwang bemat o ba yang bepiris na bezarap Dagwi ngan, “Mwat womo a ra pyɛ de bê mɔrɔ hɛ wɛt, yaga a ha na wot e ji reza Dagwi Darwey, Dagwi mot.”

¹⁷Ko behak e ji bemakuk ba sogo e tumal, ba yang mwa bemat de ba ga tula hɛn e hwomo,

¹⁸“Jeng de Hɛzɛkiya á sè gbɔng gwɔ̀m Yuda, Mika na Moreshet, zarap Dagwi á ha a bemat wɔgɔ, Dagwi Darwey, Da Jey Mwa à kana ye, “ ‘Bê ba how Siyɔn sede hwiri, Yɛrusalɛm wô ba tɛ́ ɛ gwɔt fongol, ko rahwôl Gbɔng Duk Re Fongol wô ba tɛ́ ɛ rehwot.’

¹⁹“Hɛzɛkiya gbɔng gwɔ̀m Yuda kɛ mwa BeYuda bá kana mɔrɔ hɛ a? Hɛzɛkiya á wok bengyip Dagwi Darwey, ko á jama nerat mɛ wɛt a? Ko Dagwi Darwey á tik nà vey na gawey de á kana ha e ra yɛn wɛt a? Di, wot a ga vey bagat vey na tumbang e ra bato mot!”

²⁰Ko di mwat o hwak á sè de bá tang ɛ à Uriya Shemaniya yi e Kiriyat Yɛyarim, yɛ á ha e ji reza Dagwi Darwey e ra gbɔng repomo mo, na e ra vwel o tyɛng sede remo de Yirmiya a ra.

²¹Jeng de Gbɔng Gwɔ̀m Yɛhɔyakim, na bemat como mɛ tanga begbɔng bemat fwom mɛ bá wok pyɛ de Uriya mo á ha, ko gwɔ̀m o á jama begwong de ê tɛ̀ be mɔrɔ hɛ. Ko Uriya á wok nehywɛ́ mo, ko á vɔk a tele na bengyip, á wo lɛrɛ hɛ e Misra.

²²Gbɔng Gwɔ̀m Yɛhɔyakim á tomo Ɛlnatan Akbɔr na bemat behak vɔk e Misra, na be wɔ jama hɛ.

²³Yɛn á toyo na yɛ na Gbɔng Gwɔ̀m Yɛhɔyakim, ko á tɛ̀ ba mɔrɔ hɛ, be bomo revin mɛ e dem lɛsɛ bemat.

²⁴Ko a remo de Ahikam Shafan a dyɛng ɛ̀ ma e Yirmiya, ko a nára hɛ e vɔ bemat na be mɔrɔ hɛ wɛt.