Read berom Yirmiya 27 Bible Online

Yirmiya 27 - berom bible

Yirmiya 27

¹E mɛsɛng negwɔm Zɛdɛkiya Yɔsiya, gbɔng gwɔ̀m Yuda, Dagwi Darwey a ha a Yirmiya ha hemo.

²“Dagwi Darwey a yang me me yong a tó hom swesêk vɔk berɔndɔng, ko me tɛ̀ gwɛ na baguk e rafwɔ hom.

³E bama mo a ye me tomo vɔk na begwɔ̀m Ɛdɔm, na Mowap, na Amɔn, na Tur tanga Sidɔn, e nu betom mɛ de ba sé sangal e bavwel o, ko ba vey di Gbɔng Gwɔ̀m Zɛdɛkiya wo Yuda e Yɛrusalɛm.

⁴Nɔng ɛn nu vɔk na bedanelɔ mɛn ngan: Dagwi Darwey, Da Jey Mwa, Dagwi Israyɛl a yang ɛn be ha a begwɔ̀m mɛn wɔgɔ:

⁵‘A sé me, yi na gbɔng reto hom, na vwɔ gap hom de ma yong jey, na mwasi, tanga mwa ngyāma de ya sé e jey o, ko ma nɔng kawɛ mwat de ma kasa yɛ̄.

⁶Ko di e me wɛ ma nɔng mwa bavwel vemo e vɔ Gbɔng Gwɔ̀m Nɛbukadnɛzar wo Babilɔn mwat fwom hom, ko ma ga tɛ̀ ngyāma mwa ye ra a yɛ fwom.

⁷Yére bemat jey mwa yê ra a yɛ fwom, ko yɛn ê ra a hwey mɛ tanga hwêy hwey mɛ fwom, sɛ̌ jeng ya vey de yere bemat jey mɛ yê gaba arɔng. Ano de yére bemat mɛ bê ra a yére bemat jey na begbɔng begwɔ̀m de ba dal ɛn na reto fwom arɔng.’

⁸“ ‘Ko ka sede yere bemat jey cak, kɛ segwɔm sehak ba rɔda dyɛng bato mɛn e nɛn segwɔm mɛ sede swesêk vɔk berɔndɔng wɛt, ko mê tabak yere bemat jey yane mo na como, na vyong, tanga tumbang, sɛ̌ ma tik Nɛbukadnɛzar a wey na yɛn mwa vit. Me Dagwi Darwey ma ha ano.

⁹Yin wet betong na bezarap min, kɛ kawɛ mwat de e tē e tɔk ha pyɛ́ de ye kyè vey e ngamo nuyel, kɛ yi e negwi, kɛ yi na yishi bevuvwel, kɛ yi na vyoshon ayi. Ko mwa hɛn yɛn e tang in, Yin kwon dyɛng bato min na gbɔng gwɔ̀m Babilɔn wɛt.

¹⁰Yɛn a sé kwɛlɛng hin na hâ bɔs zɔng, na be tɛ̀ be ba hashe hin, be kyè mɛ yikyik yi e vwel min. Mê ro in e jey, ko bê wey na yin.

¹¹Ko kayɛ yere bemat jey de yê dyɛng tô yɛ e nɛn gbɔng gwɔ̀m Babilɔn sede swesêk vɔk berɔndɔng, na yɛ ra a yɛ fwom, ko mê tik ɛn be sangal e vwel mɛn, na be how hɛ, na be to sangal e hɛ arɔng. Me Dagwi Darwey ma ha ano.’ ”

¹²Ma ha a Gbɔng Gwɔ̀m Zɛdɛkiya wo Yuda pyɛ jining o, ma ye, “Dyɛng to mo e nɛn gbɔng gwɔ̀m Babilɔn sede swesêk vɔk berɔndɔng. Ra a yɛ na bemat mɛ fwom, ko hwô nàra kwen.

¹³Yaga sɛ́ de hwo na bemat mo yin ê kushu e como, kɛ na vyong, kɛ na tumbang ɛ? Pyɛ ma yemo de Dagwi Darwey a ye yê té na yere bemat jey de ya dyɛng tô yɛ na gbɔng gwɔ̀m Babilɔn wɛt.

¹⁴Yin kwon wet betong na bezarap Dagwi de be tang in, yin dyɛng bato min na yɛ wɛt. Yɛn a sé kwɛlɛng hin zɔng.

¹⁵Dagwi Darwey pyɛ mɛ a ga ha wɔgɔ, e yɛ de a tomo hɛn wɛt, yɛn a sé vɛ́sɛ a yin bɔs zɔng e ji reza mɛ. Yaga ano, ê ro in e jey, ko bê mɔbɔs hin, yin na bezarap de ba sé vɛ́sɛ a yin nebɔs nemo.”

¹⁶E bama mo, ma ha a bepiris, na bemat o wɔgɔ, “Dagwi Darwey a ye ngan, ‘Yin wet betong na bezarap Dagwi de be tē, “Ba ga vey bagat toyo na pyɛ̂ nedanerey Gbɔng Duk Re Fongol Dagwi Darwey yi e Babilɔn.” Yɛn a sé vɛ́sɛ a yin bɔs.

¹⁷Yin tɛ̀ tong na ha mɛn wɛt! Dyɛng in bato min na gbɔng gwɔ̀m Babilɔn, ko yin ê sǎ tyang! Yaga sɛ́ de gbɔng repomo remo rê tɛ́ ɛ barin ɛ?

¹⁸Ka sede yɛn a sé bezarap Dagwi mwin, ka yɛn a sɛ̀ ha yi na Dagwi Darwey, ko tik na yɛn a rangal Dagwi Darwey, Da Jey Mwa, de a tik be hashe pyɛ̂ nedanerey de yá rɔngɔl e Gbɔng Duk Re Fongol, na e lɔ gwɔ̀m tanga e Yɛrusalɛm mwa vɔk e Babilɔn wɛt.’ ”

¹⁹“Yaga Dagwi Darwey, Da Jey Mwa, a ha e ra besesek duk, na gwokwɛngɛ dyam pama, na pyɛ́ de gwa sé e rak yɛ, na bwang pyɛ̂ nedanerey de ba tik e gbɔng repomo remo,

²⁰de Gbɔng Gwɔ̀m Nɛbukadnɛzar wo Babilɔn a hashe wɛt, jeng de á kyè na Gbɔng Gwɔ̀m Yɛkɔniya Yɛhɔyakim wo Yuda vɔk e de sesam, yɛ na bemat nuyel Yuda na Yɛrusalɛm.

²¹Wet betong na pyɛ de me, Dagwi Darwey, Da Jey Mwa, Dagwi Israyɛl, ma ha e ra pyɛ̂ nedanerey de ba hala e Gbɔng Duk Re Fongol, na e lɔ gwɔ̀m Yuda, tanga e Yɛrusalɛm.

²²Bê hashe hɛn vɔk e Babilɔn ko bê nàra e hwomo sɛ̌ jeng de ma doyo nehywɛ hom vɔk na yɛn. E bama mo mê toyo na yɛn, mê to ba tik ɛn e kwɔn hemo. Me Dagwi Darwey ma ha ano.”