Read berom Yirmiya 28 Bible Online

Yirmiya 28 - berom bible

Yirmiya 28

¹E shey hane, e pwɛl gwo netungun gwo shey he naas de Zɛdɛkiya á sè gbɔng gwɔ̀m Yuda, Hananiya Azur, zarap Dagwi yi e repomo Gibɛyɔn, a ha na me e Gbɔng Duk Re Fongol wo Dagwi Darwey, e nuyel bepiris, tanga bemat mwa, a yang me,

²“Dagwi Darwey, Da Jey Mwa, Dagwi Israyɛl, a ye ngan: ‘Ma ga pat reto gbɔng gwɔ̀m Babilɔn sede ba kwɔrɔ swesêk vɔk berɔndɔng.

³E ji neshey neba, mê toyo vey e ngamo na mwa pyɛ̂ nedanerey Gbɔng Duk Re Fongol Dagwi Darwey de Gbɔng Gwɔ̀m Nɛbukadnɛzar á kana hashe vɔk e Babilɔn.

⁴Mê toyo na Yɛhɔyakin Yɛhɔyakim gbɔng gwɔ̀m Yuda, mwa na BeYuda de bá hashe vɔk e de sesam e Babilɔn. Ey, mê pat reto gbɔng gwɔ̀m Babilɔn sede be kwɔrɔ swesêk vɔk berɔndɔng. Me Dagwi Darwey, ma ha ano.’ ”

⁵Ano kwong, Yirmiya, zarap Dagwi a ha na Hananiya e nuyel bepiris, na mwa bemat de ba sé tumal e Gbɔng Duk Re Fongol Dagwi Darwey:

⁶Ko Yirmiya, zarap a ye, “Ano! Tik na Dagwi Darwey a ra ano! Tik na Dagwi Darwey a sila neha de hwà ga yi mɛ na yɛ, na a toyo na pyɛ̂ nedanerey ye Gbɔng Duk Re Fongol Dagwi Darwey, mwa na bemat de bá kana hashe vɔk e sesam.

⁷Ko wet betong na pyɛ de me ha a hwo tanga bemat vemo mwa.

⁸Bezarap Dagwi vê raane, gyam jeng mot yemo, yɛn á yis na ha wɔgɔ, como, na vyong tanga tumbang yê vey hwo e ra bemat yére bavwel, na e ra bavwel begbɔng begwɔ̀m de ba vɔk reto sizɔng.

⁹Ko ka sede mwat a ye Dagwi a ye wɔgɔ, ‘Netyang nê sè’ ko ha mo ha sila, ko bê tɔk e Dagwi Darwey de a tomo hɛ mwin.”

¹⁰E bama mo, Hananiya a pat swesêk vɔk berɔndɔng o yi e rafwɔ Yirmiya, ko a kwɔrɔs gwɛ cɛk o cɛk o.

¹¹Ko Hananiya a ha e nuyel bemat mwa, a ye, “Dagwi Darwey a ye, ‘Gwong a gwomo de ê kwɔrɔ swesek dirik de Gbɔng Gwɔ̀m Nɛbukadnɛzar a ga tɛ̀ e rafwɔ mwa yére bemat jey e ji neshey neba.’ ” E jeng o, Yirmiya zarap Dagwi a vɛ̌ kyè e begwong mɛ.

¹²Jeng de Hananiya zarap Dagwi a ga kwɔrɔ swesek o yi e rafwɔ̂ Yirmiya, ko Dagwi Darwey a yang Yirmiya zarap mɛ,

¹³“Kyè wɔ̀ ha a Hananiya, yang ɛ, ‘Dagwi Darwey a ye, Hwà tɔk kwɔrɔ swesek cɔgɔt, ko bê sege gwɛ na bewɔ́rɔ dyam!

¹⁴Dagwi Darwey, Da Jey Mwa, Dagwi Israyɛl a ye: Ma ga tɛ̀ swesek dyam e ra mwa berafwɔ yére bemat jey yaga na yɛn a ra a Gbɔng Gwɔ̀m Nɛbukadnɛzar wo Babilɔn fwom, ko yɛn ê ra a yɛ fwom mwin. Ma ga tɛ̀ ngyāma mwa ye ra a Nɛbukadnɛzar o fwom arɔng.’ ”

¹⁵Ko Yirmiya zarap Dagwi a yang Hananiya zarap o arɔng, a ye, “Wet betong, à Hananiya! Dagwi Darwey a ga tomo hwo wɛt, ko mwa ano hwà ga tɛ̀ bemat vwel hemo be sey tsak o na bɔs.

¹⁶Yaga ano, Dagwi Darwey a ye, ‘Ma sé kyè wɔ pat o yi e jey yemo. E ji shey hemo hwô ku, yaga hwà ga ha a bemat be sogo a Dagwi Darwey nehywɛ.’ ”

¹⁷Ko Hananiya zarap Dagwi a vɛ̌ ku e pwɛl gwo netaama gwo shey o.