Read berom Yirmiya 29 Bible Online

Yirmiya 29 - berom bible

Yirmiya 29

¹Neha bwok-rwang a nemo de Yirmiya zarap Dagwi a jɛk vɔk na bwang bemakuk e de sesam, na bepiris na bezarap Dagwi, tanga mwa bwang bemat de Nɛbukadnɛzar a kana hashe e sesam yi e Yɛrusalɛm vɔk e Babilɔn.

²A jɛk gwɛ e bama de ba ga jut Gbɔng Gwɔ̀m Yɛhɔyakin, na neng mɛ, na begbɔng bemat fwom lɔ gwɔ̀m, na bemat nuyel Yuda na vê Yɛrusalɛm, tanga bemat fwom vwɔ, mwa na bezu vɔk e de sesam.

³A nɔng Ɛlasa Shafan na Gemariya Hilkiya gwɛ. A sé e yɛn vɛ de Gbɔng Gwɔ̀m Zɛdɛkiya wo Yuda á sè tomo vɔk na Gbɔng Gwɔ̀m Nɛbukadnɛzar wo Babilɔn. Ba jɛk ɛ ngan:

⁴“Dagwi Darwey, Da Jey Mwa, Dagwi Israyɛl a sé há a mwa bemat de yɛ a simo na Nɛbukadnɛzar a hashe e sesam yi e Yɛrusalɛm vɔk e Babilɔn.

⁵‘Lɔk in nelɔ na yin a sangal ɛ. How in bě na yin a re pyɛ́ de yin a tus ɛ.

⁶Ra in weneng na yin a tɔs nèy bewen na behwong, vos in a bewen min beha, ko yin nɔngɔs behwong min e weneng na yɛn a tɔs nèy bewen na behwong arɔng. Gwɛ̌ hin na nepyak, yin tɛt in wɛt.

⁷Ra in fwom yaga nerat gbɔng repomo de ma tomo hin ɛ sede besam. Ra in won na Dagwi Darwey yaga rɛ, yaga ka sede yɛn a sɛ̀ nerat, ko yin ê sɛ̀ nerat arɔng.

⁸Me Dagwi Darwey, Da Jey Mwa, Dagwi Israyɛl me tusa hin, yin tik bezarap de ba sé sangal na yin, kɛ behak de be tē, yɛn e tɔk ha pyɛ de ye kyè ba té, be kwɛlɛng hin wɛt. Yin wet betong na neha negwi mɛn wɛt.

⁹Yɛn a sé vɛ́sɛ bɔs e ji reza hom. Me ma tomo hɛn wɛt. Me Dagwi Darwey, ma ha ano.’ ”

¹⁰“Dagwi Darwey a ye, ‘Jeng de neshey Babilɔn kuru bataama na kwey, ma rɔda to bare na yin, mê gyeng sira hom, na me toyo na yin vey e kwɔn hemo.

¹¹Me nju hom zɔng de ma tɔk pyɛ de ma ga yong yaga yin, begwông nerat, ko vê neves wɛt, begwong de bê vey a yin na pyɛ́ ryat na sɛ̂t yey.’

¹²“E bama mo, yin a rɔda yila me. Yin a rɔda vey ra a me won, ko mê toyo a yin na pyɛ de yin a rangal.

¹³Yin a rɔda jama me, ko yin ê sɛ mɛ, yaga yin ê jama me na yey min mwa.

¹⁴Ey, ma ye, yin a rɔda sɛ mɛ, ko ma rɔda toyo a yin na sevwel min. Ma rɔda tula hin yi e kasɛ̌ sevwel, na yi e kahɛ kwɔn de ma ga kana shara hin vɔk ɛ, ko ma rɔda toyo na yin e kwɔn de ma kana shara hin vɔk ɛ e de sesam. Me Dagwi Darwey ma ha ano.

¹⁵“Yin e tē, Dagwi Darwey a ga nɔng in bezarap e Babilɔn.

¹⁶Wet in betong na pyɛ de Dagwi Darwey e ha e ra gbɔng gwɔ̀m de a sé sangal e ra gwofwa negwɔm Davit na e ra bemat gbɔng repomo remo, yɛn vɛ à cáng min de bá hashe hɛn vɔk e de sesam tanga yin wɛt.

¹⁷Dagwi Darwey, Da Jey Mwa a ye, ‘Ma sé kyè vey na como, na vyong tanga tumbang e ra yɛn, ko mê tɛ̀ yɛn a sè sede nèy regwi de na ga bɔsɔ de bê kyɛm be re nɛ wɛt.

¹⁸Ma rɔda ro ɛn na como, na vyong tanga tumbang, ko yɛn ê sè pyɛ byɛm-byɛm na mwa yére bemat jey. E kahɛ kwɔn de ma shara hɛn vɔk ɛ, a rɔda sè a bemat o yɔɔt, na pyɛ bengyip na pyɛ de ya ga té na yɛn. Bemat ba rɔda shɛgɛsh hɛn, ko reza mɛn rê sè pyɛ sedusa.

¹⁹Pyɛ yemo ya rɔda té na yɛn yaga yɛn a gyeng neha de ma sǎ e de tomsal a yɛn e nenu bezarap hom wɛt. Yɛn a kyɛ́ ɛn nà wet betong arɔng.

²⁰Mwa yin, de ma kana tomo yi e Yɛrusalɛm vɔk e de sesam e Babilɔn, wet in betong na pyɛ de me, Dagwi Darwey me ha.’

²¹“Dagwi Darwey, Da Jey Mwa, Dagwi Israyɛl, a ga ha reha e ra Ahap Kɔlaya na Zɛdɛkiya Maaseya de be há a yin bɔs e ji reza mɛ. A ga ye, ‘Mê nára hɛn e nɛn reto Gbɔng Gwɔ̀m Nɛbukadnɛzar wo Babilɔn de a rɔda mɔbɔs hɛn e bayis min.’

²²Sede bemat de bá hashe hɛn yi e Yɛrusalɛm vɔk e Babilɔn e de sesam be simo be dùsa mwat hwak, ko yɛn e ye, ‘Tik na Dagwi Darwey a teshe na hwo sede Zɛdɛkiya na Ahap, de gbɔng gwɔ̀m Babilɔn a rangas hɛn na kya beken!’

²³Pyɛ de yê té na yɛn à yemo, yaga ba ga gang ɛn na shɔt banɛn baves e ji Israyɛl — yɛn a ga ra nejwang na beha bemat vwara mɛn, ko yɛn a ga ha neha bɔs e ji reza hom, ma sé wò tɔ̂k pyɛ́ de yɛn a ga ra ko ma sé nuha e ra yɛn. Dagwi Darwey a ha ano.”

²⁴Dagwi Darwey, Da Jey Mwa, Dagwi Israyɛl a nɔng me ha vɔk na Shemaya wo Nɛhɛlam, de a ga kana tomo bwok-rwang e ji reza mɛ vɔk na mwa bemat Yɛrusalɛm, na piris Tsefanya Maaseya tanga mwa bwang bepiris o wɔgɔ,

²⁶“À Tsefanya, Dagwi Darwey a tɛ̀ hwà sé piris e tô Yɛhɔyada, ko a remo hwo wɛ a gwɔ̀m bemat fwom e Gbɔng Duk Re Fongol Dagwi Darwey. A sé fwom mo na hwo di, kawɛ mwat lolong de e tē a sé zarap Dagwi, be rɔgɔs hɛ na ngyang na be tɛ̀ a yɛ rwéy dyam e fwɔ.

²⁷Yaga sɛ́ de hwà ga ra ano na Yirmiya wo Anatot, de a sê bûm ha a bemat sede piris wɛt ɛ?

²⁸Yaga a ga ha a bemat e Babilɔn wɔgɔ, yɛn a rɔda sè e de sesam e hwomo jeng tyɔng wɛt, ko yaga ano, yɛn a lɔk nelɔ, be sangal ɛ e hwomo, be how bě, na be re pyɛ́ de yɛn a tus ɛ.”

²⁹Piris Tsefanya a hwo basa a zarap Yirmiya bwok-rwang o.

³⁰Ko Dagwi Darwey a ha na Yirmiya a yang ɛ,

³¹a tomo a mwa bemat de ba sé e de sesam e Babilɔn ha hemo e ra Shemaya. “Me Dagwi Darwey, ma rɔda tabak Shemaya na yere mɛ mwa. Ma tomo hɛ wɛt, ko a ha na yin sede yɛ a sé zarap hom, ko a tɛ̀ yin a sey tsak o na hâ bɔs. A rɔda vɔk yere e ji min wɛt. A rɔda nàra kwen na a di pyɛ́ ryat de ma sé kyè wɔ ra a bemat hom wɛt, yaga a ha a yɛn be sogo a me nehywɛ. Me Dagwi Darwey ma ha ano.”