Read berom Yirmiya 3 Bible Online

Yirmiya 3 - berom bible

Yirmiya 3

¹Dagwi Darwey a ye, “Ka sede mwat a tɛ̀ hwā mɛ e gwong, ko hwā mo a hala hɛ, ko a wɔ̀ ra wenêng mwat hwak, mwat woro mo ê tɔk to toyo na hwā mo wɛt. Ka sede a ra ano, a ga tɛ̀ vwel o mwa ligis. Ko hwo Israyɛl, hwà ga vɔk bemât yey mo pyak ko hwó simo hwo to toyo na me a?

²Bɛrɛng batɛ̂t berahwol na hwo di! Kwɔ̂n hwak ha sɛ́ de hwà ga tik nà wɔ ra ɛ nejwang a? Hwà ga sǎ e de gyenges bemât yey mo e varâ gwong, sede WoArap de e gyeng mwat e hey gbingiring. Hwà ga pɔrɔk vwel o na nejwang tanga neves mo.

³Pyɛ ma yane de ya ro na rwak, ko nerwak naswigi nà ka rop wɛt arɔng. Bɛ́rɛng bayis mo ha sé yere hê devwes, ko hwó ka wok rekyen mwa wɛt.

⁴Ko a remo hwà yang me, À da hom, hwá tɛ̀ yey na me yimo me bwot o.

⁵Hwô wokos shom na me gbak-gbak a? Hwô lashe yey na me nesheneshey a? À Israyɛl pyɛ de hwà ye, à yane, ko hwà ga ra yere neves mwa de hwà tɔk ra.”

⁶E jeng negwɔm Yɔsiya, Dagwi Darwey a yang me, “Hwà ga di pyɛ de Israyɛl, devwes wane a ga ra a? A ga doyo a me ma, a ga ra nejwang e ra tɛ̂t kawɛ rahwol, na e necam kayɛ cɔgɔt.

⁷Ma bare e bama de a ga ra pyɛ́ yemo mwa, a rɔda toyo vey na me, ko a ga toyo wɛt. Ko gwa mɛ Yuda de a sé sede yɛ arɔng a bɛrɛng pyɛ mo mwa.

⁸Yuda arɔng a di de ma gas weneng na Israyɛl, ko ma tɛ̀ ɛ e gwong yaga a ga doyo a me ma, a ga tɛ́ ɛ devwes. Ko Yuda, gwa Israyɛl de a sé vwes o tyɛng ano arɔng, a ka vo bengyip wɛt. Yɛ arɔng a ga tɛ́ ɛ devwes,

⁹ko a ka vo rekyen ko tyɔng wɛt. A ga tɛ̀ vwel o ligis, ko a ga ra nejwang yi na re a beta tanga cɔ́gɔt fongol.

¹⁰Ko e bamâ pyɛ yemo mwa, Yuda gwa Israyɛl de a ragas neves, a dura sede a sé to vey na me, a ra ano na tsak o wɛt. Me Dagwi Darwey ma ha ano.”

¹¹E bama mo, Dagwi Darwey a yang me, “Mwa ano de Israyɛl a ga doyo a me ma, a ga dura wɛshɛrɛk a dal gwa mɛ Yuda wo neves.

¹²Wɔ̀ yang Israyɛl, segwɔm rwa bato, “À Israyɛl wo neves, toyo vey na me. Mê vo shom na hwo wɛt, yaga ma sé wo tosho reyɔm. Mê vɔk shom na hwo nesheneshey wɛt.

¹³Tik na hwo dura buru mo zɔng, ko hwà ga sogo nehywɛ Dagwi Darwey, Dagwi mo, ko hwà ga dusa simo mo na bemat beduk e necam kayɛ cɔgɔt, ko hwà ga gyeng nu de ma nɔng o wɛt.” Me Dagwi Darwey ma ha ano.

¹⁴“À yin nèy neves, toyo hin, yin a sé benang. Mê jut gwining e ji min yi e karɛ repomo, na bemat beba yi e kagwɛ ruhup, ko mê toyo na yin vey e Raku Siyɔn.

¹⁵“Ma rɔda nɔng in belêk yey hom, ko yɛn ê gyeng in na netsitsɛng tanga tɔk.

¹⁶E bama mo, jeng de yin a ga tɛ́ in pyak e vwel o, ko bemat bê to kyě ha e ra Kundung Wuna-na-Sira hom wɛt. Yɛn ê to kyě ha hâ gwɛ, kɛ be to bare na gwɛ wɛt. Yɛn ê to ka jama gwɛ wɛt, kɛ be ka yong gwohwak wɛt.

¹⁷Sede jeng o ya pom, bê yila Yɛrusalɛm a ‘Gwofwa negwɔm Dagwi Darwey’, ko mwa yére bemat jey yê tula hɛ e hwomo na be re a me fongol. Yɛn ê to ra pyɛ́ de neyey mɛn ne ha a yɛn wɛt, neyey mɛn nemo de na sé gbarak, ko na sé neves arɔng.

¹⁸E jeng yane, BeIsrayɛl bê wuna hɛn na vê Yuda, ko mwa hɛn bê vey yi e de sesam e vwel rwa bato, na yɛn a toyo vey e vwel de ma nɔng bedabeda mɛn na sē sè nap mɛn gbak-gbak.”

¹⁹Dagwi Darwey a ye, “Ma bare, gwong de mê wuna hin na nèy hom, na me nɔng in vwel rat, vwel de ha dal mwa hê yere bemat jey na he sè nap min. Ma bare yin ê yila me, à da hom, ko yin ê sang to doyo a me ma wɛt.

²⁰Ko di sede remo de hwā de e ragas neves, e hala rwas mɛ, a sé ano de yin yerê Israyɛl yin a ra a me neves arɔng. Me Dagwi Darwey ma ha ano.”

²¹Ba wok fwɔ yi e ra tɛ̂t berahwol, a sé e BeIsrayɛl de ba sé tosho, be ra won yaga yɛn a ga sangal sangal ves e ji banɛn, ko yɛn a ga ye bam a Dagwi Darwey, Dagwi mɛn.

²²Toyo hin, yin de yin a ga kana doyo a Dagwi Darwey ma, yɛ ê tɛ̀ in tyang, na a tɛ̀ yin a to sè bemɛ. Há in, “Wot a sé toyo vey na hwo, yaga hwà sé Dagwi Darwey Dagwi mot.

²³Mwin berahwol ba sé pyɛ kwɛlɛng zɔng, ano na rewɔ̂ng beraku. E Dagwi Darwey de a sé Dagwi mot, e yɛ a wo sêy Israyɛl.”

²⁴Pyɛ́ de bedabeda mot ba ra a yɛ̄ fwom ya ga wey na rekyen yimo wot sè rɔngɔl bebot o, vyēl na berɔndɔng mɛn, nèy mɛn bewen na behwong mwa arɔng.

²⁵Tik na wot a dyɛng e ji rekyen mot, tik na neves mot ne kyiri hot. Wot a ga ra a Dagwi Darwey, Dagwi mot banɛn, wot na bedabeda mot, yi e nebot mot vey e yunung, wot a ga wet betong na fwɔ̂ Dagwi Darwey, Dagwi mot wɛt.