Read berom Yirmiya 30 Bible Online

Yirmiya 30 - berom bible

Yirmiya 30

¹Dagwi Darwey, Dagwi Israyɛl,

²a yang Yirmiya, “Jɛk e bwok-basa kayɛ pyɛ de ma ga ha a hwo.

³Yaga jeng yé kyè vey de ma rɔda toyo na bemat hom, yɛn Israyɛl na Yuda. Ma rɔda toyo na yɛn vey e sevwel de ma kana nɔng bedabeda mɛn, ko yɛn a rɔda to vɔk benap mɛn. Me Dagwi Darwey, Dagwi Israyɛl ma ha ano.”

⁴Dagwi Darwey a ha e ra BeIsrayɛl na BeYuda ngan:

⁵“Me wok sesin rezot, sesin bengyip, ko sê netyang wɛt.

⁶A remo, tumal na hwo bare! Rwas e tɔk tɔ hwey a? Yaga sɛ́ kwong de me bɛrɛng kawɛ rwas na vɔ e ra jim mɛ sede hwā de e rus tɔ ɛ? Yaga sɛ́ de kawɛ mwat e bɛrɛng yɔɔm ɛ?

⁷Gbɔng gasi ves he kyè vey bê tɔk tyɛngrɛ tuhak na hɛ wɛt, jeng reyɔm yaga bemat hom, ko mwa ano yɛn a rɔda dal.”

⁸Dagwi Darwey, Da Jey Mwa a ye, “Jeng de tuk hane ha rɔda ba pom, mê kwɔrɔ swesek de gwa sé e rafwɔ mɛn, me pat ngyang mɛn, ko yɛn ê to sè besam yére dyuk wɛt.

⁹Yɛn a rɔda ra a me fwom, me Dagwi Darwey, Dagwi mɛn, tanga womo de ma rɔda tɛ̀ ɛ e ra gwofwa negwɔm Davit sede gbɔng gwɔ̀m.

¹⁰“À bemat hom, yin wok bengyip wɛt, à BeIsrayɛl, yin ye lot wɛt. Mê sey ɛ hin, yi e vwel yikyik, yi e vwel de yin a sé ɛ besam. Yin ê to vɛ hin e lɔ, na yin a sangal e ji netyang. Bê gyep in naka, ko vit a mwat de ê shira hin.

¹¹Mê vey na yin na me sey in, Mê wey na yére bemat jey mwa, yi e nedem de ma kana shara hin ɛ, ko mê wey na yin wɛt. Mê hala hin sana tabak wɛt, ko jeng de mê tabak hin, mê ra ano e gwong de gwa sé tyɛng. Me Dagwi Darwey ma ha ano.”

¹²Dagwi Darwey a yang bemat mɛ, “Baram min bê vel wɛt, nedem de yin a mǎ hin ɛ nê tɛ̀ tyang wɛt.

¹³Vit a mwat de ê bɛrɛng hin naka, vit a hwal yaga bweykanang min. Ba ga ye waa a reha tɛ́ min tyang.

¹⁴Mwa vê tɛ̂ yey min ba ga ye bam a hin, yɛn e to ka bare na yin wɛt. Ma ga hwo e ra yin sede mwat repugu, ba ga tabak hin na neves. Yaga banɛn min ba sé pyak, ko neves min na sé nerey.

¹⁵Yin to gwɔrɔng yaga baram min wɛt, vit a hwal de gwô tɛ̀ in tyang. Ma tabak hin ano, yaga banɛn min ba sé vɛ̀t. Ko tomong ves min ba sé pwoy.

¹⁶Ko di a remo, mwa vemo de be re in, bê re ɛn arɔng. Ko mwa vê repugu min, bê hashe hɛn sede besam arɔng. Mwa vemo de ba tak a yin, bê tak a yɛn, ko mwa vemo de ba jugu hin, bê jugu hɛn arɔng.

¹⁷Mwa ano de vê repugu min be tē, ‘Ba ga kyini Siyɔn, vit a mwat de e bare na wɛ.’ Ko mê to tɛ̀ in tyang, mê tɛ̀ baram min tyang. Me Dagwi Darwey ma ha ano.”

¹⁸Dagwi Darwey a ye, “Mê toyo na bemat hom e sevwel mɛn, ko mê wok nemwishish kahɛ lɔ. Bê to lɔk Yɛrusalɛm e ra raku wɛ, ko bê toyo na lɔ gwɔ̀m rɛ.

¹⁹Bemat de ba sangal e hwomo bê ra lwɛlɛ somo, yɛn ê mok na yey pyɛng, Yɛn ê gwɛ pyak yi na nerat hom e ra yɛn, Nerat hom nê tɛ̀ be nɔng ɛn nerey.

²⁰Mê toyo a nèy mɛn na reto mɛn rê raane, na me to tus ɛn gbarak. Mê tabak mwa vemo de be tak a yɛn.

²¹Gwɔ̀m mɛn ê yi e yere mɛn. Wò rê negwɔm ê sè yi e ji mɛn arɔng. A rɔda vey na me, jeng de ma yila hɛ, yaga e wa de ê kyɛm a vey sana yila hɛ ɛ?

²²Yɛn ê sè bemat hom, ko mê sè Dagwi mɛn. Me Dagwi Darwey ma ha ano.”

²³Shom Dagwi ya sé sede wula, gul de gwo pɛsɛl na gap tyɔng wɛt de gwo hwosom e ra bato bemat beves.

²⁴Gwô tik kwɔk wɛt sɛ̌ a ra kayɛ pyɛ de a ga tɛ̀ e yey na a ra. E jeng de ye kyè vey, bemat mɛ bê tɔk pyɛ́ yemo mwa kyɛrɛng.