Read berom Yirmiya 31 Bible Online

Yirmiya 31 - berom bible

Yirmiya 31

¹Dagwi Darwey a ye, “Jeng ye kyè vey de mê sè Dagwi mwa yére Israyɛl, ko yɛn ê se bemat hom arɔng.”

²Dagwi Darwey a ye: “Bemat de ba dal e como, ba sɛ̀ nɔrɔ rat e hêy gbingiring, jeng de BeIsrayɛl ba jama pɔngɔ,

³Dagwi Darwey a dura a yɛn tó mɛ yɛn a se rɔ̌ yikyik, Ma tɛ̀ yey na yɛn na tɛ̂ yey sana yɛnɛ, ko ma sé re nuyel na tsak tɛ̂ yey o.

⁴Mê to lɔk in, ey, bê to lɔk in, à hwo yorom-hwong Israyɛl! Yin ê to hashe nebing min, na yin nusu na rɛ̌ yey pyɛng.

⁵Yin ê to how bě anap e ra berahwol Samariya, bemat tús o bê tus, ko yɛn ê re nèy anap o.

⁶Ey, jeng ye kyè vey de bemât gyeng bê yila, e berahwol Ɛfrayim be ye: ‘Vey in na wot wɔ tut e Siyɔn vɔk na Dagwi Darwey, Dagwi mot.’ ”

⁷Dagwi Darwey a ye: “Ra in lwɛ̄lɛ na yey pyɛng yaga Yakɔp, yere bemat jey de ya dal mwa na nerey! Ra lwɛlɛ! Somo hin! Mok in! ‘Dagwi Darwey a ga sey bemat mɛ. A ga sey ɛ mwa bwang BeIsrayɛl.’

⁸Mê vey na yɛn yi e vwel rwa bato ko me tula hɛn yi e neyɛnɛ jey. Bebók na vemo de be yɔmɔng bê raa hɛn, beha nejim na vemo de ba ga vey bagat tɔ, bê toyo sede regyɛng rey o.

⁹Bemat o bê toyo na sesin, na won jeng de ma sé toyo na yɛn. Mê kyè na yɛn vey e nerɔt nshi, e ra gwòng tɛɛrɛ, sana tiris bol. Ma sé sede da na Israyɛl, ko Ɛfrayim a sé hwey negel hom.”

¹⁰Dagwi Darwey a ye: “A yin yére bemat jey, wet in betong na me, na yin shara neha hom na bemat bakwogom yikyik. Ma ga kana shara bemat hom, ko mê to tula hɛn, mê gyeng ɛn sede lwek e gyeng kwara vyēl mɛ.

¹¹Ma ga viri Yakɔp ko ma ga séy ɛ yi e vɔ bemat de ba dal gap mɛ.

¹²Yɛn ê vey ra lwɛlɛ̂ yey pyɛng e Raku Siyɔn, ko yey mɛn yê pɛngɛ na nerat Dagwi Darwey de mê nɔng ɛn — nenɔrɔ̂ pyɛ̂ yéneng, na nshi anap, tanga něy pwat, nenɔrɔ tyīmit na berɔndɔng. Yɛn ê se sede bwî nshi naka, yɛn ê tɔk nevît pyɛ wɛt.

¹³Ko behwong bê rɛ̌ be vɔk yey pyɛng, ko beras, na bebot bemat, tanga bemakuk bê vɔk yey pyɛng arɔng. Mê tɛ̀ sesin mɛn sɛ tɛ́ ɛ seshɛgɛsh, mê wɔrɔk hɛn, me nɔng ɛn yey pyɛng bama reyɔm.

¹⁴Mê sila bepiris mɛn na pyɛ̂ re de ya dal na nerat, ko nerat hom nê vey a bemat hom. Me Dagwi Darwey ma ha ano.”

¹⁵Dagwi Darwey a ye: “Ba wok fwɔ e Rama, gwa sé gwô sesin na lashe yey ding-ding. A sé e Rahɛl de a sé tosho nèy mɛ. A kyɛ́ ɛ wɔrɔk, yaga nà to sé wɛt.

¹⁶Tik sesin o ano na hwo yishing nemwishil mo, yaga bê tala hwo pyɔlɔ̂ fwom mo, yɛn ê toyo yi e vwel vê repugu mo.

¹⁷Sɛt yey mo e ra jeng nuyel, nèy mo nê toyo e lɔ e sevwel mɛn. Me Dagwi Darwey ma ha ano.

¹⁸Mwin ma wok Ɛfrayim e ha e ji lashe yey, e tē: ‘Hwà ga tabak me, ko ma sey tabak o, ma sé sede mus nà gbat wɛ. Toyo na me, tik na me toyo, yaga e hwo à Dagwi Darwey, Dagwi hom.

¹⁹Yaga remo de ma doyo yi na hwo, ma tosho gabɔk. E bama de hwà ga tabak me, ma rusu bwol hom na lashe yey. Ma wok rekyen, ko ma tɛ̀ to hom pyɛ byɛs, yaga ma ra banɛn jeng de ma rɔngɔl wen.’

²⁰Ɛfrayim a sé hwey yey hom wɛt a? Hwey de ma dal na tɛ̂ yey na hɛ wɛt a? Kayɛ jeng de me ha ha ves e ra hɛ, me bare na hɛ na tɛ̂ yey. Yey hom ye vɛ hɛ na hɛ, mê tosho reyɔm hɛ mwin, Me Dagwi Darwey ma ha ano.

²¹Tɛ̀ pyɛ̂ dura, na hwo wɔrɔ mɛ gwong, na hwo to jama gwong de hwà kana nunus ɛ. Toyo, à hwo yorom-hwong Israyɛl. Vey e lɔ e bapomo de hwà yi ɛ.

²²Hwô sǎ e de tô yey vɔk e yɛ̌ jeng, hwo hwong nà tsak o ɛ? Yaga Dagwi Darwey a ga yong pyɛ pyas e jey, ya sé pyɛ langat sede hwā de e gyep rwas.”

²³Dagwi Darwey, Da Jey Mwa, Dagwi Israyɛl a ye, “Jeng de ma toyo na bemat o e vwel mɛn, yɛn ê to ye e sevwel Yuda na e bapomo sɛ wɔgɔ: “ ‘Dagwi Darwey a tɛ̀ a hwo nerat, à hwo rahwol vê necik. À hwo rahwol wo jɛrɛ!’

²⁴“Bemat bê sangal e Yuda, na e bapomo hɛ mwa, ko bemat cap, na belek vyēl, tanga kara mɛn bê sè ɛ arɔng.

²⁵Mê tɛ̀ vemo de ba sé gbɛrɛk be to tɛ́ ɛn wɛng-wɛng, ko kawɛ de a ga tɛ́ ɛ vit à gap yaga vyong, ê re pyɛ́ a sirik.”

²⁶Ano kwong, me Yirmiya ma sene ko ma di nevwa mo na jam a me.

²⁷“Me Dagwi Darwey ma ye, jeng ye kyè vey de mê sila sevwel Israyɛl na Yuda na bemat tanga yas.

²⁸Tyɛng sede remo de ma ra hywɛ na me luyu, me gangas, me wey, me bugut, na me vey na cɛk e ra yɛn, ano de mê ra naka na me lɔk ɛn, na me tus ɛn arɔng.

²⁹Sede jeng o ya pom, bemat bê to ye wɛt wɔgɔ: “ ‘Beda ba re nèy anap ne jwaatat, ko nà de kushu a nèy mɛn yìn.’

³⁰“A sé e kawɛ mwat de a re nèy anap ne jwaatat, de yìn mɛ bê kushu, ko kawɛ mwat a rɔda ku yaga banɛn mɛ pyɛ mɛ.”

³¹Dagwi Darwey a ye, “Jeng ye kyè vey de mê wuna me na sira pas na BeIsrayɛl tanga BeYuda.

³²A rɔda sè sede wuna-na-sira roso de mà ra na bedabeda mɛn wɛt jeng de mà jut ɛn na vwɔ hom, ko mà pat ɛn mɛ yi e sevwel Misra. Mwa ano de ma sè sede rwas mɛn, yɛn a gyeng wuna-na-sira mo wɛt.

³³Wuna-na-sira pas de mê ra na BeIsrayɛl hê se ngan: Mê tɛ̀ Badu hom e ji mɛn ko mê jɛk vɛ e neyey mɛn. Mê sè Dagwi mɛn, ko yɛn ê se bemat hom.

³⁴A rɔda sè a hwak e ji mɛn gbing-gbing na a basa a gwɛm mɛ na a tɔk Dagwi wɛt, yaga kawɛ e ji mɛn ê tɔk me, yi e swɛl mɛn vɔk e womo de a dal mwa na nerey. Mê hala banɛn mɛn, ko mê to bare na buru mɛn wɛt. Me Dagwi Darwey ma ha ano.”

³⁵Dagwi Darwey a ye: “Yɛ e nɔng gwi yaga negbey nagwi, e tɛ̀ pwɛl na netangacɛn na be lolo naturuk. E suk gworep, ko e tɛ̀ gwɛ gwo lulum. Reza mɛ à Dagwi Darwey, Da Jey Mwa.”

³⁶Dagwi Darwey a ye: “Sɛ̌ gwong de ma yong a pyɛ́ mo gwa tik fwom e bayis hom, ka ano wɛt ko yere Israyɛl yê tik nà se yere bemat jey e bayis hom nesheneshey wɛt.

³⁷Sɛ̌ ba tɔk mara lagwi tuhak, ko ba tɔk bɛrɛng nezɛɛt retis jey mwa, ka ano wɛt ko e jeng a yane de mê ye zak a yere Israyɛl, yaga pyɛ̂ mwa de ya ga ra wɛt. Me Dagwi Darwey ma ha ano.”

³⁸Dagwi Darwey a ye, “Jeng ye kyè vey de bê to ba lɔk Yɛrusalɛm mwa sede gbɔng repomo hom, yi e Tyɔ̌n Hananɛl e rwa ta vɔk e Ruhup To-Kwɔng.

³⁹Ko jɔt yɛnɛ vwel o ya rɔda re nuyel yi e hwomo e rwa ta vɔk e rahwol Garep, ko ye gwɔrɔ vɔk e Gowa.

⁴⁰Yi e nɛk o mwa burang, kwɔn de be lɛsɛ ɛ bavin bemat, ko bé lusha ɛ fongol, na mwa cɛl de ba sé e ra rak Kerɔt Kidrɔn pere vɔk e Ruhup Bedwa vɔk e rwa rak, mwa kwɔn o ha rɔda sè jaram yaga me. Bê sang to gangas, kɛ be wey na gbɔng repomo mo wɛt.”