Read berom Yirmiya 33 Bible Online

Yirmiya 33 - berom bible

Yirmiya 33

¹Jeng de Yirmiya á rɔngɔl e ngyang e lala na bemat gyeng, ko Dagwi Darwey a to ha na yɛ.

²Dagwi Darwey de a yong jey, a tɛ̀ yɛ̄ ano, ko a sɛt yɛ̄ e kwɔn yɛ, a ha na me. Yɛ de reza mɛ à Dagwi Darwey, a ye,

³“Yila me, ko mê toyo á hwo. Mê há a hwo pyɛ̂ langat na pyɛ̂ bes de hwà tɔk pyɛ cak e ra yɛ wɛt.

⁴Me Dagwi Darwey, Dagwi Israyɛl, ma ye, bê gangas nelɔ Yɛrusalɛm na lɔ gwɔ̀m Yuda a remo de ba ga gwɔrɔ nɛ, ko ba sé tó como e ra nɛ.

⁵Bemat o behak bê tó como na BeBabilɔn, ko yɛn ê silsa nelɔ mó na bavîn bemat de mê wey na yɛn na shom hom tanga nepep yey hom sizɔng. Ma ga doyo bayis yi e gbɔng repomo remo yaga pyɛ́ vyes de bemat o ba ga ra.

⁶Ko mê tɛ̀ gbɔng repomo remo tyang na me to toyo a yɛn na netyang mɛn. Mê dura a yɛn yêy dyɛngɛ, ko mê gyéng ɛn naka.

⁷Mê tɛ̀ Yuda na Israyɛl be vɔk nedanerey, ko mê to lɔk ɛn sede yɛn á kana sè raane.

⁸Mê tɛ̀ yɛn a sè haalal yi e banɛn de yɛn a ga kana ragas a me, ko mê hala banɛn mɛn mwa na sogô nehywɛ mɛn.

⁹Yɛrusalɛm wô se a me kwɔ̂n yey pyɛng, na nerey, na kaa, ko kayɛ yére bemat jey e jey yê wok bengyip, ko yê vow jeng de yɛn a wok reha pyɛ́ ryat de ma ra yaga bemat Yɛrusalɛm tanga reha nedanerey de ma rɔda vey a gbɔng repomo mo mɛ.”

¹⁰Dagwi Darwey a ye, “Bemat be tē, kwɔn hemo ha sé sede hey gbingiring, vit a bemat kɛ yas e hɛ. Ko yɛn a ha tyɛng. Bapomo Yuda na nehyok Yɛrusalɛm ba sé hal, vit a bemat, vit a yas e sangal e vɛ. Ko e nedem o, yin ê to wok

¹¹lwɛ̄lɛ yey pyɛng na seshɛgɛsh na rewɔng yey pyɛng re rwas gwel na gwel o e nzem jut gwel. Yin ê wok bemat be ra lwɛ̄lɛ jeng de be kyè vey na nenɔrɔ̂ feng a me e Gbɔng Duk Re Fongol hom. Yɛn a rɔda tē: “ ‘Feng in a Dagwi Darwey, Da Jey Mwa, yaga Dagwi Darwey a sé wo nerat, tɛ̂ yey mɛ ha sé gbak-gbak!’ “Ma rɔda tɛ̀ vwel o he to vɔk nedanerey yere ne raane. Me Dagwi Darwey ma ha ano.”

¹²Dagwi Darwey, Da Jey Mwa a ye, “E vwel hemo de ha sé sede hey gbingiring, hemo de vit a bemat kɛ yas de ya sangal ɛ, ba rɔda to vɔk cɛl sehwey de belek vyēl bê kyese na tyīmit mɛn.

¹³E bapomo sevwel berahwol, na vê benɛk berahwol tanga vê Nɛgɛf e rwa batin, na e yɛnɛ vwel Bɛnyamin, na nebapomo de nà gwɔrɔ Yɛrusalɛm, tanga e bapomo Yuda. Belek vyēl bê to hwo bara tyīmit mɛn. Me Dagwi Darwey ma ha ano.”

¹⁴Dagwi Darwey a ye, “Jeng ye kyè vey de mê sila vonu de ma ra a BeIsrayɛl na BeYuda.

¹⁵E jeng o, mê kasa gbɔng gwɔ̀m yi e yere Davit de a sé cik, sede lang rat yi e cɔgɔt. Gbɔng gwɔ̀m o ê gas badu e tē na a ra necik e sevwel o.

¹⁶Bê sey BeYuda na bemât Yɛrusalɛm, ko yɛn ê sangal e ji netyang. Bê yila gbɔng repomo mo a, ‘Dagwi Darwey à necik mot’.

¹⁷“Me Dagwi Darwey ma sira wɔgɔ, Davit ê sang bidɛ mwat de ê sangal e ra gwofwa negwɔm lɔ Israyɛl wɛt,

¹⁸ko bê sang bidɛ bepiris yi e yerê Levi de bê ra a me fwom, na be nása nenɔrɔ rangas, na ne pyɛ̂ yeneng, tanga nenɔrɔ rangas detidetu wɛt.”

¹⁹Dagwi Darwey a to ha na Yirmiya a ye,

²⁰“Ma ga wuna me na sira tanga nagwi na naturuk yaga na yɛn a vɛ̀sɛ e jeng de ya sé tyɛng, ko bê sang kwɔrɔ sira mo wɛt.

²¹Ano arɔng, ma wuna me na sira na mwat fwom hom Davit wɔgɔ, yɛ ê vɔk yere mɛ de a rɔda se gbɔng gwɔ̀m kayɛ jeng, ko ma ga wuna me na sira na bepiris hom yi e yere Levi wɔgɔ, yɛn ê ra a me fwom kayɛ jeng, ko bê tɔk kwɔrɔ wuna-na-sira mo wɛt.

²²Mê gwɛ nepyak yere mwat fwom hom Davit, na nepyak bepiris yi e yere Levi, de bê tɔk basa nepyak mɛn wɛt, sede remo de be tɔk basa nepyak netangacɛn e lagwi kɛ yéneng bazɛk e rekwogom gworep wɛt.”

²³Dagwi Darwey a to yang Yirmiya,

²⁴“Hwà ga wok de bemat be tē, ma ga kyɛ́ me zakzak Israyɛl na Yuda, nelɔ neba de ma kana kasa a? Yaga ano, yɛn a sé byɛs bemat hom, ko yɛn e to bɛrɛng hɛn sede yere bemat jey wɛt a?

²⁵Ko me, Dagwi Darwey ma wuna me na sira na nagwi na naturuk ko ma ga yong badu de bê gyeng jey na lagwi,

²⁶tyɛng sede remo de ma ga ra pyɛ yemo ano mwin, a sé ano de mê gyeng wuna-na-sira hom na yerê Yakɔp tanga mwat fwom hom Davit. Mê kasa gwining e yere Davit na a re negwɔm e ra yére Abraham, na Yishak, tanga Yakɔp. Mê tosho reyɔm bemat hom, ko mê to nɔng ɛn pyɛ̂ nedanerey arɔng.”