Read berom Yirmiya 34 Bible Online

Yirmiya 34 - berom bible

Yirmiya 34

¹Dagwi Darwey a ha na Yirmiya e jeng de Gbɔng Gwɔ̀m Nɛbukadnɛzar wo Babilɔn na bemat como mɛ, tanga bemat como yi e mwa yére segwɔm jey, na yére detidetu de ya sé e nɛn mɛ, ko yɛn e sɛlɛ hɛ. Yɛn á sè tó como e Yɛrusalɛm na bapomo de ba gwɔrɔ rɛ.

²Dagwi Darwey, Dagwi Israyɛl a yang Yirmiya a wɔ̀ ha a Gbɔng Gwɔ̀m Zɛdɛkiya wo Yuda ngan, “Me Dagwi Darwey ma rɔda nára gbɔng repomo remo e vwɔ gbɔng gwɔ̀m Babilɔn, ko ê dak kya e rɛ.

³Hwô hywit o wɛt, bê vo o, ko bê nára hwo e vwɔ mɛ. Hwô di ɛ bayis na bayis, ko hwo pyɛ mo hwô ha na yɛ, hwô kyè vɔk e Babilɔn.

⁴À Zɛdɛkiya, wet betong na hwo wok pyɛ de me Dagwi Darwey me ha e ra hwo. Bê mɔrɔ hwo e de como wɛt,

⁵hwô ku e ji netyang. Ko sede remo de bemat bá rangas pyɛ̂ nesang hyɔɔlɔl jeng de yɛn á lɛsɛ bedabeda mo, de bá sè begwɔ̀m e nuyel mo, ano de yɛn ê rangas pyɛ̂ nesang hyɔɔlɔl yaga hwo. Yɛn ê tosho hwo, be tē, ‘Yaa kukuuk! À darwey!’ Me Dagwi Darwey ma ha ano.”

⁶Ano arɔng, Yirmiya a ha a Gbɔng Gwɔ̀m Zɛdɛkiya tomo hemo e gbɔng repomo Yɛrusalɛm,

⁷e jeng de bemat como gbɔng gwɔ̀m Babilɔn bá sè tó como na rɛ, Lakish tanga Azeka, bwang bapomo de ba gwɔrɔ vɛ na jwa de bá tɛt ɛ e Yuda.

⁸Gbɔng Gwɔ̀m Zɛdɛkiya a wuna hɛ na sira na bemat Yɛrusalɛm, na be mok a yɛn rehâ hala hɛn washak

⁹wɔgɔ, kawɛ e ji mɛn a hala sam mɛ WoIbrani rwas kɛ hwā washak, yaga na hwak mɛn a vɔk gwa mɛ WoIsrayɛl sede sam wɛt.

¹⁰Bemat o mwa na bemat nuyel mɛn ba ye ey à sira mo na be hala besam mɛn washak, be sang to vɛ́ besam na yɛn wɛt. Yɛn a hala besam o mwa washak mwin.

¹¹Ko e bama mo, yɛn a sege barê yey mɛn, yɛn a to hashe hɛn, ba tɛ̀ ɛn be to tɛ́ ɛn besam.

¹²Ko Dagwi Darwey a to ha na Yirmiya a ye:

¹³Dagwi Darwey, Dagwi Israyɛl a ye, hwo ha a bemat o ngan, “Ma wuna me na sira na bedabeda min jeng de ma sey ɛ hɛn yi e Misra, ko ma hala hɛn washak yi e sesam. Ma ha a yɛn wɔgɔ,

¹⁴kanɛ neshey netaama yɛn a hala washak, kawɛ WoIbrani de a sé sam, ko a ga ra a yɛn fwom neshey netyiimin. Ko bedabeda min ba tɛ̀ nehywɛ mɛn vey na me, kɛ ba wet betong na pyɛ de ma ha wɛt.

¹⁵A sé e nepɔlɔ tyɔng de na kwey de yin a sege barê yey min na yin a ra pyɛ de ya pɛngɛ a me yey. Mwa hin yin a simo yin a hala begwa min BeIsrayɛl washak, ko yin a wuna hin na sira e nuyel hom, e Gbɔng Duk Re Fongol e kwɔn de be re a me ɛ fongol.

¹⁶Ko e bama mo yin a to sege neyey min, yin a kyɛ́ in nà nɔng me nerey. Mwa hin yin a to hashe besam beras na beha de yin a ga kana hala washak tyɛng na simo mɛn, ko yin a to tɛ̀ ɛn e ji sesam min.

¹⁷Yaga ano, a remo, me Dagwi Darwey ma ye, yin a ga kyé in nà gyeng ha hom, yin a ga nɔ̂ng begwa min BeIsrayɛl sangâl tó mɛn washak wɛt. Ey, a jam ano, mê nɔng in sangal washak arɔng, sangal washak na yin a kushu na como, na tumbang tanga vyong. Mê tɛ̀ yin a sè pyɛ byɛm-byɛm e nuyel yére bemat jey mwa e ra pyɛ de mê ra a yin.

¹⁸Begbɔng bemat fwom Yuda na ve Yɛrusalɛm, mwa na begbɔng bemat fwom lɔ gwɔ̀m, na bepiris, tanga mwa bemat nuyel, bá wuna hɛn na sira na me, ko bá kyè e tê bedɔ̀rɔ mus de bá yɛrɛ na be dura hɛ. Ko yɛn á kwɔrɔ sira mo, yɛn á gyeng batin hɛ wɛt. Yaga ano, mê ra a yɛn yere pyɛ de yɛn a ra a mus o.

²⁰Mê nára hɛn e vɔ bemat repugu mɛn, de be simo be mɔbɔs hɛn, ko benon na ngyāma yê re bavin mɛn.

²¹Mê to nára Gbɔng Gwɔ̀m Zɛdɛkiya wo Yuda na begbɔng bemat fwom mɛ e vɔ vemo de be simo be mɔbɔs hɛn arɔng. Mê nára hɛn e vɔ bemat como Babilɔn de ba ga tik tô como na yin.

²²Mê nɔng ɛn nu, ko yɛn ê toyo vey e gbɔng repomo remo. Yɛn ê hwo e ra rɛ, be re rɛ, ko be dak kya e rɛ. Mê tɛ̀ bapomo Yuda be se sede hey gbingiring de vit a mwat de a sangal ɛ. Me Dagwi Darwey ma ha ano.”