Read berom Yirmiya 35 Bible Online

Yirmiya 35 - berom bible

Yirmiya 35

¹Jeng de Yɛhɔyakim Yɔsiya á sè gbɔng gwɔ̀m Yuda, ko Dagwi Darwey a yang Yirmiya,

²“Ci na bemat ruhup Rekap na hwo ha na yɛn. Ko hwo vey na yɛn e hwak e ji beduk Gbɔng Duk Re Fongol na hwo nɔng ɛn nshi anap na yɛn a sɔ.”

³Ano ma wɔ jut mwa bemat ruhup Rekap, yɛn vɛ a Yaazaniya Yirmiya hwak de ba tâng da mɛ a Habaziniya, na mwa begwa mɛ tanga nèy mɛn,

⁴ko ma vey na yɛn e Gbɔng Duk Re Fongol. Ma wɔ yel na yɛn e duk bemat masa fwom Hanan Igdaliya, zarap Dagwi. Duk o wá sè e ra rak wo Maaseya Shalum, mwat gyeng ruhup Gbɔng Duk Re Fongol o, ko wá sè bagat na beduk bemat gyeng behak arɔng.

⁵Ano kwong, ma vey tik neshǐ na bèkɛt de ba sila vɛ na nshi anap e nuyel BeRekap o, ko ma yang ɛn, “Gang in yey na nshi anap nemo.”

⁶Ko yɛn a toyo a me, ba ye, “Yēe wey ow, wot e sɔ nshi anap wɛt! Da beda mot Yonadap Rekap á nɔng ot nu, wot, kɛ yere mot, wot sang sɔ nshi anap ko tyɔng wɛt.

⁷Á to ha a wot, wot lɔk nelɔ, kɛ wot how cāp wɛt, wot tus bě anap kɛ wot sey vɛ wɛt. Á nɔng ot nu gak, wot sangsal e bǔk, yaga na wot a bin nàra e vwel hemo de wot ê sangal ɛ sede bekɛnɛt.

⁸Wot a ga gyeng mwa nu de Yonadap á nɔng ot. Wot pyɛ mot wot e sang sɔ nshi anap wɛt, kɛ beha mot, na nèy mot bewen na behwong mwa hot.

⁹Wot e lɔk beduk na wot a vɛ mɛ nelɔ wɛt, wot e sangsal e bǔk zɔng, ko wot a vɔk bě anap, kɛ hiri, kɛ pyɛ̂ yeneng ko tyɔng wɛt. Wot a ga gyeng gyat kayɛ pyɛ de da beda mot Yonadap á nɔng ot nu e ra yɛ.

¹¹Ko jeng de Gbɔng Gwɔ̀m Nɛbukadnɛzar á hwo sevwel o na como, wot á yong ɛ̀ na wot a vey e Yɛrusalɛm yaga na wot a hywit ot yi e vɔ bemat como BeBabilɔn na BeSirya. Pyɛ ma yemo de ya tɛ̀ wot a sé sangal e ngamo e Yɛrusalɛm.”

¹²E bama mo, Dagwi Darwey, Da Jey Mwa, Dagwi Israyɛl a yang me, me wɔ̀ ha a BeYuda na bemat Yɛrusalɛm ngan, “Me Dagwi Darwey me rangal hin pyɛ de ya tɛ̀ yin a kyɛ́ in nà wet betong na me, na yin a gyeng pyɛ́ de me basa a yin.

¹⁴Yere Yonadap mwa ba ga gyeng nu de da beda mɛn a nɔng ɛn — yɛn a kwon sɔ nshi anap wɛt, ko pere vey e tuk hemo, vit a hwak mɛn de a ga sang wɔ̀t nɛ. Ko ma ga sǎ e de ha na yin sana ruru, ko yin a ga gyeng ha hom wɛt.

¹⁵Ma sé re nuyel e de tomsal a yin na bemat fwom hom, bezarap hom, ko yɛn a ga tang in, yin hala begwong beves min na yin ra pyɛ de ya sé ryat. Yɛn a ga tusa hin, yin kwon re a bedagwi beduk fongol, kɛ yin ra a yɛn fwom wɛt, yaga na yin a re nuyel na sangal e vwel de ma nɔng in na bedabeda min. Ko yin a wet betong na me, kɛ yin a tɛ̀ nehywɛ min vey na me wɛt.

¹⁶Yere Yonadap ba ga gyeng nu de da beda mɛn a nɔng ɛn, ko yin vemo, yin a ga gyeng ha hom wɛt.

¹⁷Yaga ano, a remo, me Dagwi Darwey, Da Jey Mwa, Dagwi Israyɛl, mê vey a yin BeYuda na bemat Yɛrusalɛm na mwa gawey de ma ga kana sira e ra yin. Mê ra ano yaga yin a kyɛ́ in nà wet betong jeng de ma ha na yin, ko yin a kyɛ́ in nà ye ey jeng de ma yila hin.”

¹⁸Ano kwong, ma ha a bemat ruhup Rekap wɔgɔ, Dagwi Darwey, Da Jey Mwa, Dagwi Israyɛl a ye ngan, “Yin a ga gyeng nu de da beda min Yonadap á nɔng in, yin a ga raa kayɛ pyɛ de á basa a yin na yin a ra, ko yin a ga ra kayɛ pyɛ de á nɔng in nu e ra yɛ.

¹⁹Yaga ano, Me Dagwi Darwey, Da Jey Mwa, Dagwi Israyɛl, ma sira, Yonadap hwey Rekap a rɔda vɔk yere mɛ rwas o kayɛ jeng na a ra a me fwom.”