Read berom Yirmiya 36 Bible Online

Yirmiya 36 - berom bible

Yirmiya 36

¹E shey he naas de Yɛhɔyakim Yɔsiya a sé gbɔng gwɔ̀m Yuda, Dagwi Darwey a yang Yirmiya,

²“Jut bwok-basa na hwo jɛk ɛ kayɛ pyɛ de ma ga há a hwo e ra Israyɛl na Yuda tanga yére bemat jey mwa, yi e jeng de ma susu ha na hwo, jeng de Yɔsiya á sè gbɔng gwɔ̀m, pere vey e remo.

³Gyeng rɔ̌ jeng de BeYuda bê wok reha gawey mwa de ma vɔk e yey na me vey mɛ e ra yɛn, yɛn ê doyo yi e begwong beves mɛn. Ko mê hala a yɛn neves mɛn na banɛn mɛn.”

⁴Ano kwong Yirmiya a yila Baruk Neriya ko a ha a yɛ, na a raa e jɛk, kayɛ pyɛ de Dagwi Darwey a ga ha a yɛ. Ko Baruk a jɛk yɛ̄ mwa e bwok-basa mo.

⁵E bama mo Yirmiya a misang a Baruk pyɛ́ yemo: “Bé to simo a me na me wɔ e Gbɔng Duk Re Fongol wɛt.

⁶Ko me simo hwo ba wɔ e hwomo e jeng de bemat be tik rê pyɛ́, de ye kyè vey. Hwô basa bwok-basa mo na gbɔng fwɔ, yaga na yɛn a bin wok kayɛ pyɛ de Dagwi Darwey a ga ha a me. Tik na BeYuda de ba vey yi e bapomo mɛn be wok há mo arɔng.

⁷Gyeng yɛn ê ra a Dagwi Darwey won, na yɛn a doyo yi e begwong beves mɛn, yaga Dagwi Darwey a ga shìra bemat o na shom tanga yol vyes.”

⁸Ano Baruk Neriya a basa neha Dagwi Darwey e Gbɔng Duk Re Fongol tyɛng na pyɛ de Yirmiya a ha a yɛ.

⁹E pwɛl gwo shanetat gwo shey he tungun de Yɛhɔyakim á sè gbɔng gwɔ̀m Yuda, bemat o bá tik rê pyɛ́, e nuyel Dagwi Darwey. Mwa bemat de bá sangal e Yɛrusalɛm na mwa vemo de bá vey e hwomo yi e bapomo Yuda bá gyeng tik rê pyɛ́ mo.

¹⁰Ko Baruk a hwo basa bwok-basa mo, kayɛ pyɛ de Yirmiya a ga ha. A ra ano e Gbɔng Duk Re Fongol, yi e duk Gemariya Shafan mwat-jɛk. Duk me mo wá sè e lala he rak o, bagat na Ruhup Pwas gwo Gbɔng Duk Re Fongol, kwɔn de bemat o mwa ba tɔk wok ha mɛ.

¹¹Mikaya Gemariya Shafan a wok Baruk á se basa e ji bwok-basa pyɛ de Dagwi Darwey a ga ha.

¹²Ko a wɔ e lɔ gwɔ̀m, e duk mwat-jɛk de mwa begbɔng bemat fwom ba sé ra ɛ badu. Ɛlishama mwat-jɛk, na Delaya Shemaya, na Ɛlnatan Akbɔr, na Gemariya Shafan, na Zɛdɛkiya Hananiya tanga mwa bwang begbɔng bemat fwom ba sé ɛ.

¹³Mikaya a ha a yɛn kayɛ pyɛ de a wok Baruk a basa a bemat o.

¹⁴Ko begbɔng bemat fwom o ba tomo Yɛhudi Netaniya Shɛlɛmiya Kushi na a yang Baruk a vey na bwok-basa de a ga basa a bemat o. Baruk a vey a yɛn na gwɛ.

¹⁵Yɛn a yang ɛ, “Sangal na hwo basa a wot gwɛ.” Ko Baruk a ra ano.

¹⁶Bama de a ga basa gwɛ, yɛn a hwo bɛrɛng bemɛn na bengyip ko ba yang Baruk, “A sé gbing-gbing wot a ha a gbɔng gwɔ̀m pyɛ́ yemo.”

¹⁷Ko yɛn a rangal hɛ, ba ye, “Ha a wot a remo, gwong de hwà ra na hwo jɛk pyɛ́ yemo. E Yirmiya de a ha a hwo yɛ ko hwo raa hwó jɛk a?”

¹⁸Baruk a toyo a yɛn, “Yirmiya a ha a me kahɛ tin ha mo, ko ma raa na jɛk o na nshi-jɛk e bwok-basa mo.”

¹⁹Ko yɛn a yang ɛ, “Yin na Yirmiya yin wɔ̀ lɛrɛ hin. Yin kwon tik mwat hwak a tɔk dem de yin a sé ɛ wɛt.”

²⁰Begbɔng bemat fwom o ba tik bwok-basa mo e duk Ɛlishama mwat-jɛk, yɛn a kyè vɔk e lala lɔ gwɔ̀m, ko yɛn a ha a gbɔng gwɔ̀m kayɛ pyɛ.

²¹Ko gbɔng gwɔ̀m a tomo Yɛhudi a wɔ vey na bwok-basa mo. A jut gwɛ e duk Ɛlishama, ko a basa a gbɔng gwɔ̀m na mwa begbɔng bemat fwom de ba sé e tumal, ba gwɔrɔ hɛ.

²²Á sè nabolos, ko gbɔng gwɔ̀m á sè sangal e lɔ gwɔ̀m he nabolos, á sè wok kya e gwokywa.

²³Sede Yɛhudi a tala basa regap o rehak ko gbɔng gwɔ̀m o a yɛrɛ rɛ na jang-wal, ko a bomo e kya. A sǎ e de ra ano sɛ̌ a pere wɔ rangas bwok-basa mo mwa.

²⁴Ko gbɔng gwɔ̀m o, kɛ hwak e ji begbɔng bemat fwom mɛ de ba wok pyɛ de ba basa, a ka vo bengyip, kɛ a ka dura lashe yey wɛt.

²⁵Mwa ano de Ɛlnatan, na Delaya tanga Gemariya ba ra won na gbɔng gwɔ̀m na a rangas bwok-basa mo wɛt, ko a tɛ̀ tong na yɛn wɛt.

²⁶E bama mo a nɔng Yɛramɛɛl, hwey gbɔng gwɔ̀m yɛn na Seraya Azariyɛl, na Shɛlɛmiya Abdeel nu na be vo Yirmiya, na mwat-jɛk mɛ Baruk, ko Dagwi Darwey a ga kana lɛrɛ hɛn.

²⁷E bama de Gbɔng Gwɔ̀m Yɛhɔyakim a ga rangas bwok-basa de Yirmiya a ha a Baruk a raa a jɛk, Dagwi Darwey a yang Yirmiya,

²⁸a jut bwok-basa hwak na a to jɛk ɛ kayɛ pyɛ de ya kana sé e gwo mɛsɛng o.

²⁹Dagwi Darwey a yang Yirmiya a ha a gbɔng gwɔ̀m ngan, “Hwà ga rangas bwok-basa, ko hwà ga to rangâl Yirmiya, yaga sɛ́ de a jɛk wɔgɔ, gbɔng gwɔ̀m Babilɔn a rɔda vey wey na vwel hemo, na a mɔbɔs bemat hɛ mwa na yas hɛ ɛ?

³⁰Yaga ano a remo, me Dagwi Darwey ma sé ha a hwo, à Gbɔng Gwɔ̀m Yɛhɔyakim, vit a yere mo cak de yê sang to re negwɔm e ra segwɔm Davit. Bê bomo revin mo e jey, e kwɔn de gwi gwô ta hɛ nagwi ko neyɔkyɔ̂k fwala ne hwo e ra hɛ naturuk.

³¹Mê tabak hwo, na yére mo tanga begbɔng bemat fwom mo yaga banɛn de mwa hin yin a ga ra. Hwo kɛ bemat Yɛrusalɛm na BeYuda yin a ga tɛ̀ nehywɛ min e ra netusa hom wɛt, yaga ano, mê vey a yin na rezot de ma kana shìra hin na hɛ.”

³²E bama mo Yirmiya a jut bwok-basa hwak, a nɔng Baruk mwat-jɛk mɛ, ko a jɛk ɛ kayɛ pyɛ de a ha a yɛ — kayɛ pyɛ de ya kana sé e gwo mɛsɛng o, na neha yere nining de Yirmiya a ha a yɛ na a raa a jɛk.