Read berom Yirmiya 37 Bible Online

Yirmiya 37 - berom bible

Yirmiya 37

¹Gbɔng Gwɔ̀m Nɛbukadnɛzar a tɛ̀ Zɛdɛkiya Yɔsiya a sè gbɔng gwɔ̀m Yuda e to Yɛhɔyakim Yɛhɔyakin.

²Ko Zɛdɛkiya, kɛ begbɔng bemat fwom mɛ, kɛ bwang bemat o mwa ba gyeng ha de Dagwi Darwey a nɔng Yirmiya wɛt.

³Gbɔng Gwɔ̀m Zɛdɛkiya a tomo Yɛhukal Shɛlɛmiya na Tsefanya Maaseya piris na be wɔ̀ ra won na Yirmiya wɔgɔ, “Ra a Dagwi Darwey, Dagwi mot won e to yére bemat jey mot.”

⁴E jeng o ba ga kana tɛ̀ Yirmiya e lɔ ngyang wɛt, á sè rɔ̌ kyě kyè washak e ji bemat.

⁵E jeng o arɔng, bemat como Farawo ba ga kana nusu yi e Misra, ko jeng de BeBabilɔn de ba gwɔrɔ Yɛrusalɛm na como ba wok yɛn à vane vey pom, ko yɛn a hwɔtɔ bemat mɛn yi e Yɛrusalɛm.

⁶Ano, Dagwi Darwey a yang Yirmiya zarap mɛ ngan,

⁷“Dagwi Darwey, Dagwi Israyɛl a ye: Há in a gbɔng gwɔ̀m Yuda de a tomo hin vey vo redu na me wɔgɔ: Bemat como Farawo ba sé kyè vey sɛlɛ hin a? Yɛn ê hala hin be kyè wɛrɛn e sevwel mɛn e Misra.

⁸Ko BeBabilɔn bê toyo, be hwo e ra gbɔng repomo mo, be re rɛ, ko be dak kya e rɛ.

⁹Me Dagwi Darwey ma sé tusa hin, yin kwon kwɛlɛng bato min na yin bare, BeBabilɔn bê nàra nà toyo, yaga yɛn ê toyo mwin.

¹⁰Ka yin a ka re mwa BeBabilɔn mo na como, ko yin a hala ɛ̀ vemo de ba ga mǎ hɛn e dyɛngɛ e bǔk mɛn, yɛn ê sogo gbak, ko be dak kya e repomo mo buruk.”

¹¹Bemat como BeBabilɔn bá to ɛn na bama yi e Yɛrusalɛm yaga bemat como Misra bá se kyè vey bagat.

¹²Yaga ano, Yirmiya a hwo hala Yɛrusalɛm ko a kyè vɔk e yɛnɛ sevwel Bɛnyamin na a wɔ̀ sey nu mo mɛ he benap lɔ mɛ.

¹³Ko jeng de a wul Ruhup Bɛnyamin, mwat nuyel bemat como de a vɔk fwom e kwɔn o, mwat de bá tang ɛ a Iriya Shɛlɛmiya Hananiya á yang ɛ a tumal ko á ye, “Hwà sé hala hot na hwo wɔ̀ sɛ BeBabilɔn!”

¹⁴Yirmiya a toyo a yɛ, a ye, “Wey ow, a sé ano wɛt, ma sé tele wɛt!” Ko Iriya a wet betong na ha mɛ mo wɛt. A vo ɛ, ko a kyè na yɛ vɔk na begbɔng bemat fwom.

¹⁵Yɛn a tɛ̀ shom sizɔng na Yirmiya, ba tè be dak ɛ, be bang ɛ e lɔ Yɔnatan, mwat-jɛk, de ba ga tɛ̀ lɔ mo he tɛ́ ɛ lɔ ngyang.

¹⁶Ba wɔ̀ tik ɛ e keduk bang bemat ke vwel o, ko ba gyeng ɛ e hwomo jeng pyak.

¹⁷E bama mo Gbɔng Gwɔ̀m Zɛdɛkiya a tomo be vey na Yirmiya, ko e hwomo e lɔ gwɔ̀m, a rangal hɛ e hagat yaang, a ye, “Hwà kyɛm hwo vɔk ha hak yi na Dagwi Darwey bɛ?” Yirmiya a toyo a yɛ, a ye, “Ey, bê nára hwo e vwɔ gbɔng gwɔ̀m Babilɔn.”

¹⁸Ko Yirmiya a rangal hɛ arɔng, a ye, “E renɛn sɛ́ de ma ra a hwo, kɛ begbɔng bemat fwom mo, kɛ bemat vemo, de ra tɛ̀ yin a tɛ̀ me e ngyang ɛ?

¹⁹Sɛ́ ya té na bezarap Dagwi min de bá ha a yin wɔgɔ, gbɔng gwɔ̀m Babilɔn a rɔda hwo in, kɛ sevwel semo na como wɛt ɛ?

²⁰Ko di a remo, à darwey, me ra won na hwo, wet betong na me, na hwo ra pyɛ de me ra won o na hwo. Gabɔk wɛt, hwo toyo na me e lɔ ngyang, e lɔ Yɔnatan wɛt sɛ̌ mê ku e hwomo.”

²¹Ano Gbɔng Gwɔ̀m Zɛdɛkiya a nɔng nu be bang Yirmiya e lala lɔ gwɔ̀m. A sangal e hwomo, ko kahɛ tuk ba nɔng ɛ regat kpam-tuk yi e kwɔn kyeres o, sɛ̌ mwa kpam-tuk wa tala hɛ vit e gbɔng repomo mo.