Read berom Yirmiya 38 Bible Online

Yirmiya 38 - berom bible

Yirmiya 38

¹A vane ano, Shefatiya Matan, na Gedaliya Pash-hur, na Yɛhukal Shɛlɛmiya tanga Pash-hur Malkiya yɛn a wok de Yirmiya a sé ha a bemat wɔgɔ,

²Dagwi Darwey á kana ye, “Kawɛ mwat de a sangal gbak e gbɔng repomo remo ê ku e como, kɛ na vyong, kɛ na tumbang ayi. Ko kawɛ mwat de a nusu na a nɔng to me na BeBabilɔn, bê mɔrɔ hɛ wɛt, ko ê hywit ɛ na neken me.”

³Yirmiya á to sè ha a yɛn wɔgɔ, “Dagwi Darwey a kana ye, ‘Ma sé kyè wɔ nɔng gbɔng repomo remo e vɔ bemat como Babilɔn, ko yɛn ê sey ɛ rɛ e como.’ ”

⁴Begbɔng bemat fwom bá wɔ na gbɔng gwɔ̀m ko bá yang ɛ, “Tik be mɔrɔ mwat womo. A sé tɛ̀ bemat como gbɔng repomo remo gbɛrɛk na neha de e ha, ko a sé ra pyɛ jining o na bwang bemat de ba tɛt ɛ e gbɔng repomo mo. A sé jama a sɛlɛ bemat o wɛt, ko e simo a mǎ hɛn zɔng.”

⁵Gbɔng Gwɔ̀m Zɛdɛkiya a toyo a yɛn, a ye, “Ey yàa, a jam ano! Ra in pyɛ de yin e simo na yɛ. Mê dul in wɛt.”

⁶Ano yɛn a jut Yirmiya, ba gyira hɛ na rǐk e hwes Malkiya hwêy gbɔng gwɔ̀m, de gwa sé e lala lɔ gwɔ̀m. Vit a nshi e hwes o, sɛ̌ bwɔrɔk zɔng, ko Yirmiya a hwo kyè wɔ̀ ye pyɔp e ji gwɛ.

⁷Ko Ɛbɛd-mɛlɛk wo Etiyopya, rɛmɛt de á ra fwom e lɔ gwɔ̀m, á wok ba ga gyira Yirmiya e hwes. E jeng o gwɔ̀m á sè e de badu e Ruhup Bɛnyamin.

⁸Ɛbɛd-mɛlɛk a hwo wɔ na yɛ e hwomo, ko a yang gbɔng gwɔ̀m o,

⁹“Neken gbɔng gwɔ̀m ne ros, pyɛ de bemat vemo ba ra ya sé tyɛng wɛt. Yɛn a ga gyira Yirmiya e hwes, e kwɔn de ê ku ɛ na vyong, a remo de vit a bwang pyɛ́ e gbɔng repomo.”

¹⁰Ko gbɔng gwɔ̀m a nɔ̂ng Ɛbɛd-mɛlɛk nu a jut bemat betat tanga yɛ, na yɛn a wɔ hwɔlɔ hɛ vey e jey yi e hwes o gyam na a ku.

¹¹Ano Ɛbɛd-mɛlɛk a nára hɛ na bemat o vɔk e gban tikis pyɛ́ lɔ gwɔ̀m a wɔ vɛ bègɛt rugu, ko a nára a Yirmiya vɛ e hwes o mwa na rik o.

¹²A yang ɛ a tɛ̀ vɛ e bebagam mɛ, yaga na rik o be mǎ hɛ wɛt. Yirmiya a ra ano,

¹³ko yɛn a hwɔlɔ hɛ mɛ vey e jey yi e hwes o. E bama mo, ba tik Yirmiya a sangal e lala lɔ gwɔ̀m o.

¹⁴E jeng o cak, Gbɔng Gwɔ̀m Zɛdɛkiya a tɛ̀ be vey a yɛ na Yirmiya e rwi gwo netat gwô yel e Gbɔng Duk Re Fongol Dagwi Darwey, ko a yang ɛ, “Mê rangal hwo pyɛ cak, ko me simo hwo ha a me tsak o, hwo lɛrɛ a me pyɛ wɛt.”

¹⁵Yirmiya a toyo a yɛ, “Ka sede ma ha a hwo tsak o, ko hwô mɔrɔ me, ko ka sede ma vo a hwo redu, ko hwô tɛ̀ tong na há mo wɛt.”

¹⁶Ko Gbɔng Gwɔ̀m Zɛdɛkiya a sira a yɛ yaang, a ye, “Ma sira na Dagwi Darwey wo neken, Dagwi de a nɔng ot neken, mê mɔrɔ hwo, kɛ me nára hwo e vɔ bemat de ba sé jama neken mo wɛt.”

¹⁷Ano kwong Yirmiya a ha a Zɛdɛkiya wɔgɔ, “Dagwi Darwey, Da Jey Mwa, Dagwi Israyɛl a ye ngan, ‘Ka hwà nɔng tó mo e vɔ begbɔng bemat fwom gbɔng gwɔ̀m Babilɔn, ko bê tik o kwen, ko bê dak kya e gbɔng repomo remo wɛt. Bê hala hwo na belɔ mo beken.

¹⁸Ko ka sede hwà kyɛ́ o nà nɔng to mo, ko bê nára gbɔng repomo remo e vɔ BeBabilɔn, ko yɛn ê dak kya e rɛ vit, ko hwô hywit o e vɔ mɛn arɔng wɛt.’ ”

¹⁹Ko gwɔ̀m a toyo a yɛ, a ye, “Me tele me bemât vwel mot de ba ga tele wɔ sɛ BeBabilɔn. Gyeng bê nára me e vɔ mɛn ko yɛn ê nɔng me rezot.”

²⁰Yirmiya a yang ɛ, “Bê nára hwo e vɔ mɛn wɛt. Gabɔk wɛt, gyeng hâ Dagwi Darwey, ko kayɛ pyɛ yê kyè a hwo naka, ko bê tik o kwen.

²¹Ko di Dagwi Darwey a ga dura a me na negwi-ywey pyɛ de yê té ka sede hwà kyɛ́ o nà nɔng to mo e vɔ mɛn.

²²Ma di bwang beha mwa de ba tɛt ɛ e lɔ gwɔ̀m Yuda bá sè kyè na yɛn vɔk na begbɔng bemat fwom gbɔng gwɔ̀m Babilɔn. Wet betong na hâ lwɛlɛ de yɛn á kyě ha jeng de yɛn á se kyè: “Begbɔng besâ gbɔng gwɔ̀m ba kwɛlɛng hɛ, yɛn a tɛ̀ a ra pyɛ de yɛn e simo. Ko a remo de bol mɛ ba ga ye pyɔp e bwɔrɔk, besa mɛ mo ba ga hala hɛ!”

²³Yirmiya a to gwɛ ye, “Mwa beha mō na nèy mo bê hashe hɛn vɔk na BeBabilɔn, ko hwo pyɛ mo hwô hywit o yi na yɛn wɛt. Gbɔng gwɔ̀m Babilɔn ê vo o sede mwat ngyang, ko bê dak kya e gbɔng repomo remo buruk.”

²⁴Zɛdɛkiya a toyo a yɛ, a ye, “Hwo tik mwat hwak a tɔk berem de wot a ra wɛt, ka ano wɛt, ko bê wey na neken mo.

²⁵Ka sede begbɔng bemat fwom ba wok wot a ga ra berem na hwo, yɛn ê vey rangal hwo pyɛ de wot a ha. Yɛn ê sira, bê mɔrɔ hwo wɛt ka sede hwà ha a yɛn kayɛ pyɛ de wot a ha.

²⁶Ha a yɛn zɔng, hwá ga sè ra won na me, wɔgɔ, me to tomo na hwo e lɔ ngyang Yɔnatan na hwo wɔ ku e hwomo wɛt.”

²⁷Ano mwa begbɔng bemat fwom o ba wɔ na Yirmiya, ba rangsal hɛ pyɛ̂ mwa, ko a ha a yɛn tyɛng pyɛ de gbɔng gwɔ̀m a yang ɛ a ha. Vit a pyɛ cak de yɛn a tɔk ra, yaga vit a mwat de a wok nehywɛ́ berem mɛn o.

²⁸Ko ba tik ɛ e lala lɔ gwɔ̀m o sɛ̌ tuk de ba re Yɛrusalɛm na como.