Read berom Yirmiya 39 Bible Online

Yirmiya 39 - berom bible

Yirmiya 39

¹E pwɛl gwo kuru gwo shey he shanetat de Zɛdɛkiya á se gbɔng gwɔ̀m Yuda, Gbɔng Gwɔ̀m Nɛbukadnɛzar wo Babilɔn a vey na bemat como me mwa ko a hwo Yɛrusalɛm na como.

²E tuk he shanetat he pwɛl gwo naas gwo shey he kuru na hɛ hining de Zɛdɛkiya á sè gbɔng gwɔ̀m, bá gangas jwa-pomo Yɛrusalɛm o.

³Jeng de ba re Yɛrusalɛm, mwa begwɔ̀m gbɔng gwɔ̀m Babilɔn ba vey ko ba sangal e Ruhup Tē. Begwɔ̀m o vɛ à Nergal Sarezer, na Sangar Nebo, na Sarsekim dâ bemat fwom lɔ gwɔ̀m, tanga hwak de bá tang ɛ a Nergal Sarezer, dâ bemat tɔk netangacɛn, na mwa bwang begbɔng bemat como.

⁴Jeng de Gbɔng Gwɔ̀m Zɛdɛkiya na mwa bemat como mɛ ba di pyɛ de ya sé té, yɛn a simo be hywit ɛn yi e gbɔng repomo mo naturuk. Yɛn a hwo nusu e gwong bwi lɔ gwɔ̀m, ba kwey gwong ruhup de gwa wuna bejwâ-pomo beba na yɛn a hywit ɛn e bak Nɛk Yɔrdan.

⁵Ko bemat como Babilɔn ba ro ɛn, ba vo Zɛdɛkiya e tyɛl bagat na Yeriko. Ko yɛn a jut ɛ vɔk na Gbɔng Gwɔ̀m Nɛbukadnɛzar, de á sè e gbɔng repomo Ribla e yɛnɛ sevwel Hamat, ko Nɛbukadnɛzar a yɛrɛ a yɛ shɔt e hwomo.

⁶A mɔrɔ nèy bewen Zɛdɛkiya e Ribla e bayis da mɛn, ko a tɛ̀ be mɔbɔs begbɔng bemat fwom Yuda arɔng.

⁷Ano arɔng, a tɛ̀ be paa yéneng bayis Zɛdɛkiya, be tɛ̀ a yɛ ngyang, ko be kyè na yɛ vɔk e Babilɔn.

⁸E jeng o arɔng BeBabilɔn ba dak kya e lɔ gwɔ̀m, na e nelɔ bemat, ko ba gangas jwa-pomo Yɛrusalɛm.

⁹E yɛnɛ mo Nebuzaradan, gwɔ̀m bemat gyeng lɔ gwɔ̀m a hashe bwang bemat de ba tɛt ɛ e gbɔng repomo mo sede bemat ngyang, mwa na vemo de ba ga kana tele wɔ̀ sɛ ɛ.

¹⁰A hala behak e ji bepɛng e sevwel Yuda mo, yɛn vemo de ba vɔk pyɛ nedanelɔ cak wɛt, ko a nɔng ɛn bě anap na hiri.

¹¹Ko Gbɔng Gwɔ̀m Nɛbukadnɛzar a nɔ̂ng Nebuzaradan, gwɔ̀m bemat gyeng lɔ gwɔ̀m nu na a nɔng redu remo ngan,

¹²“Ci wɔ jama hin Yirmiya na yin a bɛrɛng hɛ naka. Yin kwon mǎ hɛ wɛt, ko ra in a yɛ kayɛ pyɛ de e simo.”

¹³Ano Nebuzaradan na begwɔ̀m Nebushazban, dâ bemat fwom lɔ gwɔ̀m, na Nergal Sarezer, dâ bemat tɔk netangacɛn, na mwa bwang begbɔng bemat fwom gbɔng gwɔ̀m Babilɔn,

¹⁴ba tɛ̀ be vey na Yirmiya yi e lala lɔ gwɔ̀m. Ba tik ɛ e vwɔ Gedaliya Ahikam Shafan na a kyè na yɛ tyang vɔk e lɔ mɛ, na a bɛrɛng hɛ naka. Yi ano, Yirmiya a sangal tyang e tē bemat o.

¹⁵Jeng de Yirmiya a sè rɔngɔl e ngyang e lala lɔ gwɔ̀m, Dagwi Darwey a ha a yɛ,

¹⁶a ha a Ɛbɛd-mɛlɛk wo Etiyopya wɔgɔ: “Dagwi Darwey, Da Jey Mwa, Dagwi Israyɛl a ye, ‘Tyɛng sede remo de ma ye mê ra, ma sé kyè wɔ vey a gbɔng repomo remo na gawey, ko nedanerey wɛt. Ko jeng de pyɛ́ yemo yê té, hwô ba se e hwomo na hwo di yɛ.

¹⁷Ko me, Dagwi Darwey, mê gyep o, ko bê nára hwo wɛt e vɔ bemat de hwà vɔk bengyip mɛn.

¹⁸Mê tik o tyang, ko bê mɔrɔ hwo wɛt. Hwô hywit o kwen yaga hwà ga tɛ̀ gap mo e ra me. Me Dagwi Darwey ma ha ano.’ ”