Read berom Yirmiya 4 Bible Online

Yirmiya 4 - berom bible

Yirmiya 4

¹Dagwi Darwey a ye, “À yin BeIsrayɛl, ka sede yin a doyo, yin a toyo vey na me, ka sede yin a paa pyɛ̂ byɛm-byɛm min e bayis hom, ko yin a to yey wɛt,

²ko ka sede yin a sira na reza Dagwi wo neken, na tsak o, na gâs badu e tē, tanga necik, ê tɛ̀ a yere bemat jey nerat, ko yê dak kaa na yɛ.”

³Dagwi Darwey a yang BeYuda na bemat Yɛrusalɛm ngan: “Hów in hiri min de ba rɔngɔl nà how, yin tus pyɛ́ e serɔgɔ wɛt.

⁴Yosom hin bato min yaga Dagwi Darwey, paa in nevês neyey min sede hwô yósom, à yin BeYuda na bemat Yɛrusalɛm. Ka ano wɛt, ko shom hom yê tabas sede kya, hê re ko vit a mwat rimi mo, yaga neves pyɛ de yin a ragas.

⁵Pɛl in durum e yɛnɛ vwel o mwa! Mok in na gap rɛng-rɛng! Ha in a BeYuda na bemat Yɛrusalɛm, be tele vɔk e bapomo de ba gwɔrɔ vɛ.

⁶Nára a yɛn vwɔ vɔk e Siyɔn! Tele hin vɔk e kwɔn dal! Yin ra jɔgɔ wɛt! Dagwi Darwey a sé kyè vey na rezot, na gbɔng gawey yi e rwa bato.

⁷Sede gukum de wa sé nusu yi e rehwot de wó lɛsɛ hɛ ɛ, ano de mwât wey na yere bemat jey a ga nusu. A sé kyè vey yi e kwɔn mɛ. Bê hala bapomô Yuda e barin, ko vit a mwat de ê sangal e ji vɛ.

⁸Yaga ano, tɛ̀ in berugû sesin, tosho hin na yin a dak sekun, yaga shom vyes ye Dagwi Darwey ya ga doyo yi e Yuda wɛt.”

⁹Dagwi Darwey a ye, “E jeng o begwɔ̀m na bemat nuyel mɛn ba rɔda vɔk yey ting wɛt, bepiris hom bê ye lot ko bezarap hom bê langat hɛn.”

¹⁰Ko ma ye, “À Darwey Dagwi Darwey hwà ga kwɛlɛng bemât Yɛrusalɛm tyɔng wɛt! Hwà ga kana ye, bê sangal tyang, ko di wâl como à womo e tɔ mɛn.”

¹¹Jeng ye kyè vey de bê há a bemat Yɛrusalɛm wɔgɔ, gul de gwa fes gwa sé pɛsɛl yi e hey gbingiring vey na yɛn. Gwô se gul swɛl o de gwo gangas byɛmɛ zɔng wɛt,

¹²gul de Dagwi Darwey ê nɔng gwɛ nu na gwo nusu, gwô dal gwomo mo na gap! A sé e Dagwi Darwey pyɛ mɛ de a sé yɛrɛ a bemat mɛ shɔt.

¹³“À mwasi, tosho na hwo dak sekun, yaga wal o wa sé yaga mɔbɔs bemat hom, na mwa bemat nuyel Israyɛl. Bê mɔbɔs hɛn na bwang bemat hom mwa. Ányéyêy! Tɛ̀ in vɔ e to!

¹⁴À Yɛrusalɛm, kus neves e yey mo, yaga na be bin sey o. Vɔk e yɛ̌ jeng de hwô sǎ e de barê pyɛ̂ banɛn de hwà tik e yey mo ɛ?

¹⁵Betom be mok yi e gbɔng repomo Dan, be shara ha rezot yi e berahwol Ɛfrayim.

¹⁶Ha in a yére bemat jey, shara hin hɛ̄ e ra Yɛrusalɛm. Vê repugu be kyè vey yi e vwêl yikyik, yɛn e mok como e ra bapomo Yuda.

¹⁷Yɛn a ga vey gwɔrɔ hɛ, sede bemat gyeng hwiri, yaga ha ga sogo a me nehywɛ. Me Dagwi Darwey ma ha ano.

¹⁸Begwong mo na pyɛ́ de hwó ra ba ga vey na pyɛ́ yemo e ra hwo. Gawey mo a hemo, ha sé kpashak tyɔng wɛt. Ha ga luga hwo e yey!”

¹⁹Yee, rezot ow! Me tɔk niri na rezot o wɛt! Yee, yey hom ow! Yey hom ye dak kpɛɛ zɔng! Me tɔk ban-yuu wɛt. Me wok bedurum, na sekûn como.

²⁰Rezot remo re raa rehak, ba ga hala sevwel o mwa e barin. Ba ga langat bǔk mot sana tɔ́k mot, ba ga hama berugû bangas bapɔk vɛ̄ cɛk o cɛk o.

²¹Mê ros e rɛ̌ e de bɛrɛng como de ya sé pep-pep, na me wokos wûs bedurum ɛ?

²²Dagwi Darwey a ye, “Bemat hom ba sé betɔn, yɛn a tɔk me wɛt. Yɛn a sé sede nèy de na vɔk bato gbarak, yɛn e tɔk pyɛ wɛt. Yɛn a sé begwɔ̀m ragas pyɛ́ vyes, ko yɛn a sé berɛs e ra ragas pyɛ́ ryat.”

²³De ma bɛrɛng jey o, ko ma di ya sé barin zɔng, hal a yɛ. Ma bɛrɛng lagwi arɔng, ko ma di vit a negbey.

²⁴Ma bɛrɛng beraku ko ma di ba sé digis. Ma bɛrɛng berahwol ko ma di ba sé kyě ra rerɛgɛ.

²⁵Ma bɛrɛng, ko vit a bemat, ko benon mwa ba ga tele yi e hwomo.

²⁶Ma bɛrɛng, ko vwel de ha kana siri, ha ga tɛ́ ɛ gbingiring, mwa bapomo mɛn ba ga tɛ́ ɛn barin, e nuyel Dagwi Darwey, e nuyel shom vyes mɛ.

²⁷Yaga Dagwi Darwey a ye, “Vwel o mwa, hê tɛ́ ɛ barin, ko mwa ano, mê wey na hɛ hywiri wɛt.

²⁸“Jey yê ra sesin, lagwi wô tɛ́ ɛ mwangalang. Dagwi Darwey a ha ano, ko ê sege bare yey mɛ wɛt, a ga yong pyɛ de ê ra, ko ê toyo na bama wɛt.”

²⁹Jeng de bê wok lwɛ́lɛ bemat bedwa, na gwô bemat begbang, kawɛ mwat ê tele. Behak bê tele vɔk e rehwot, ko behak bê turus be lɛsɛ hɛn e sarang beta. Bê hala karɛ repomo hal, ko vit a mwat de ê to ba sangal e ji vɛ.

³⁰À Yɛrusalɛm, gawey e ra hwo! Yaga sɛ́ de hwó tɛsɛ yɔ̀m shinang zoyong ɛ? Yaga sɛ́ de hwó tɔrɔ hwo na pyɛ̂ dyam shinang na hwo mɔmɔ bayis na būm ɛ? Hwà sé tɔrɔ tó mo na hwo se rwat zɔng-reng! Bemat yey mo be byɛnɛng hwo, ko be simo be mɔrɔ hwo.

³¹Ma wok sesin sede sê hwā de jim tɔ́ ya kaba hɛ. Ma wok rus sede hê hwā de a sé tɔ hwey negel mɛ. A sé sesin Yɛrusalɛm, de wa sé gapsing sana nesong, wó nása vɔ e gwi ko wo tē, “Gawey e ra me! Mê ku, yɛn a sé kyè vey mɔrɔ me!”