Read berom Yirmiya 40 Bible Online

Yirmiya 40 - berom bible

Yirmiya 40

¹Dagwi Darwey a ha na Yirmiya e bama de Nebuzaradan gwɔ̀m bemat gyeng lɔ gwɔ̀m a ga hala hɛ washak e Rama. Bá kana kyè na yɛ vɔk e hwomo e ngyang, mwa na bwang bemat yi e Yɛrusalɛm na Yuda vemo de bá se kyè na yɛn sede besam vɔk e Babilɔn.

²Gwɔ̀m bemat gyeng lɔ gwɔ̀m o a kwey na Yirmiya e hagat ko a yang ɛ, “Dagwi Darwey, Dagwi mo a tɛ̀ a vwel hemo bengyip wey na hɛ,

³ko a remo a ga ra pyɛ de a ye ê ra. Pyɛ́ yemo mwa ya té yaga bemat min bá ra a Dagwi Darwey banɛn, ko yɛn a kyɛ́ ɛn nà gyeng ha mɛ.

⁴Ko di, a remo, ma sé kyè wɔ viri ngyang yemo e vɔ mo na me hala hwo washak. Ka sede hwô simo na hwo kyè tanga me vɔk e Babilɔn, ko hwô tɔk ra ano, ko mê bɛrɛng hwo naka. Ko ka sede hwô simo hwo wɔ wɛt, ko a sè a hwo gbing-gbing wɛt. Mwa sevwel o sa tɛnɛ hɛ e nuyel mo, kyè vɔk e kwɔn de hwà di ha jam a hwo.”

⁵Sede Yirmiya a toyo a yɛ na pyɛ cak wɛt, ko Nebuzaradan a ye, “To o vɔk na Gedaliya Ahikam Shafan de gbɔng gwɔ̀m Babilɔn a ga tɛ̀ a sè gwɔmna bapomo Yuda. Hwô tɔk sangal na yɛ, na hwo sangal e ji bemat, kɛ hwô wɔ e kwɔn de hwó bare hwô wɔ ɛ.” Ko a nɔng ɛ nɔrɔ na pyɛ̂ re na a kyè mɛ, ko a tik ɛ a kyè vɔk e kwɔn de a simo.

⁶Yirmiya a kyè wɔ sangal na Gedaliya Ahikam e Mizpa, ko a sangal na bwang bemat de ba tɛt ɛ e vwel o.

⁷Behak e ji begbɔng bemat fwom Yuda na bemat como ba ga kana nɔng bato mɛn wɛt. Yɛn a wok, gbɔng gwɔ̀m Babilɔn a ga tɛ̀ Gedaliya Ahikam a sè gwɔmna sevwel o, ko ba ga nɔng ɛ reto e ra mwa bwang bemat de ba ga hashe vɔk e Babilɔn wɛt — yɛn beras, na beha tanga nèy, na mwa vemo de ba dal na nepɛng e sevwel o.

⁸Ko Ishmayɛl Nataniya, na Yohanan Kareya, na Seraya Tanhumet, na nèy Efayi wo Netofa, tanga Yezaniya yi e Maaka ba wɔ́ na bemat mɛn na Gedaliya e Mizpa.

⁹Gedaliya Ahikam Shafan a yang ɛn, “Ma sira a yin, yin wok bengyip nɔ̂ng bato min na BeBabilɔn wɛt. Sangal hin e vwel o, ra in a gbɔng gwɔ̀m Babilɔn fwom, ko kayɛ pyɛ yê se a yin naka zɔng.

¹⁰Me pyɛ hom mê sangal e Mizpa, ko mê se tom min jeng de BeBabilɔn ba vey e ngamo. Ko yin ê tɔk kyě vos, na yin a tula nshi anap, na nèy cɔ́gɔt tanga něy pwat, ko yin sangal e nebapomo de yin a sé ɛ.”

¹¹Ano kwong, mwa BeIsrayɛl de bá sè e Mowap, na Amɔn, na Ɛdɔm tanga bavwel bahak, bá wok de gbɔng gwɔ̀m Babilɔn a ga simo a BeIsrayɛl behak be sangal e Yuda, ko a ga tɛ̀ Gedaliya Ahikam Shafan a sè gwɔmna mɛn.

¹²Ko yɛn a hala nekwɔn de yɛn a kana shara hɛn ɛ, ba to ɛn vey e Yuda. Yɛn a vey na Gedaliya e Mizpa, ko yɛn a tula nshi anap tyɔng wɛt, na gwakû nèy cɔgɔt e hywɛ̂p nɛ.

¹³E bama mo, Yohanan Kareya na bemat nuyel bemat como de ba ga kana nɔng bato mɛn wɛt, ba vey na Gedaliya e Mizpa,

¹⁴ko yɛn a yang ɛ, “Hwà tɔk, Gbɔng Gwɔ̀m Baalis wo Amɔn a ga tomo Ishmayɛl Netaniya na a vey mɔrɔ hwo wɛt a?” Ko Gedaliya Ahikam a sey tsak o na ha mo wɛt.

¹⁵Ko Yohanan Kareya a ha na yɛ yaang, a yang ɛ, “Tik na me wɔ mɔrɔ Ishmayɛl Netaniya mo, ko vit a mwat de ê tɔk mwat de a ra ano. Yaga sɛ́ de bê tík ɛ a vey mɔrɔ hwo ɛ? Pyɛ mo yê tɛ̀ mwa BeIbrani de ba ga vey tula hɛn na hwo bê shara hɛn, ko ê vey na rezot e ra mwa bemat de ba tik ɛn e Yuda.”

¹⁶Ko Gedaliya a toyo a yɛ, “Tsút, hwo ra ano wɛt! Pyɛ de hwà sé ha e ra Ishmayɛl ya sé mwin wɛt!”