Read berom Yirmiya 41 Bible Online

Yirmiya 41 - berom bible

Yirmiya 41

¹E pwɛl gwo netaama gwo shey o, Ishmayɛl Netaniya Ɛlishama, hwak e ji bemat lɔ gwɔ̀m de a to sé hwak e ji begwɔ̀m gbɔng gwɔ̀m a wɔ e Mizpa na bemat kuru na a wɔ di Gwɔmna Gedaliya Ahikam. Jeng de mwa hɛn ba sé re pyɛ́ e dem hining,

²ko Ishmayɛl Netaniya na bemat kuru de ba sé tanga yɛ ba hwɔlɔ bewal mɛn ko ba mɔrɔ mɛ Gedaliya Ahikan Shafan, yaga gbɔng gwɔ̀m Babilɔn a tɛ̀ ɛ a sè gwɔmna sevwel o.

³Ishmayɛl a to mɔbɔs BeIsrayɛl mwa de ba sé na Gedali e Mizpa, mwa na bemat como BeBabilɔn de ba sé e hwomo.

⁴Tuk het, gyam na mwat hwak a tɔk reha reku Gedaliya,

⁵ko bemat kuru rwit ba pom yi e Shɛkɛm, na Shilo, tanga Samariya. Yɛn a ga hwon negyɛk mɛn, ba hama berugu mɛn, ko ba kyě jɔ́s babek mɛn na neba. Yɛn a sé kyè na pyɛ̂ yéneng, na pyɛ̂ nesang hyɔɔlɔl na be wɔ nára e Gbɔng Duk Re Fongol.

⁶Ano Ishmayɛl a nusu yi e Mizpa na a wɔ man na yɛn, ko a sè kyě tosho. Jeng de a wul na yɛn, a ye, “Gabɔk wɛt, vey in na yin a di Gedaliya Ahikam.”

⁷Ras de yɛn a yel e gbɔng repomo mo, Ishmayɛl na bemat mɛ ba mɔbɔs hɛn, ko ba bomos bavin o e hwes.

⁸Ko bemat ba sé kuru e regyɛng mɛn de yɛn a yang Ishmayɛl, “Gabɔk wɛt, hwo mɔrɔ hot wɛt! Wot a vɔk alkama, na baale na něy pwat tanga shok de wot a lɛrɛ e hiri.” Ko a tik ɛn beken a mɔbɔs hɛn na bemɛn wɛt.

⁹Hwes de Ishmayɛl Netaniya a bomos ɛ bavin bemat de a ga kana mɔbɔs, gwɛ a gbɔng hwes de Gbɔng Gwɔ̀m Asa á kana cing jeng de Gbɔng Gwɔ̀m Baasha wo Israyɛl á sè como na yɛ. Ishmayɛl a sila gwɛ na bavin bemat o.

¹⁰Ko a tɛ̀ nèy behwong gwɔ̀m o na bwang bemat Mizpa be tɛ́ ɛn besam mɛ, vemo de Nebuzaradan gwɔ̀m bemat gyeng lɔ gwɔ̀m á kana tik e vwɔ Gedaliya Ahikam na a bɛrɛng hɛn naka. Ishmayɛl Netaniya a hashe hɛn e sesam ko a hwo kaba gwong na yɛn, na a ye dɔ vɔk e yɛnɛ sevwel BeAmɔn.

¹¹Sede Yohanan Kareya na mwa bemat nuyel bemat como de ba sé na yɛ ba wok reha pyɛ́ vyes de Ishmayɛl Netaniya a ga ra,

¹²yɛn a sogo, ba hwo raa hɛ na bemat mɛn, ko yɛn a wɔ vo ɛ bagat na gbɔng dideng e Gibɛyɔn.

¹³Jeng de bemat ngyang Ishmayɛl ba di Yohanan Kareya na bemat nuyel bemat como mo tanga yɛ, yɛn a vɔk yey pyɛng.

¹⁴Ano, mwa bemat de Ishmayɛl a ga hashe e sesam yi e Mizpa ba doyo, ba toyo, ko ba wɔ́ na Yohanan Kareya.

¹⁵Ko Ishmayɛl Netaniya na bemat mɛ rwit ba tele yi na Yohanan ko ba hywit ɛn vɔk na BeAmɔn.

¹⁶E bama mo Yohanan Kareya na bemat nuyel bemat como de ba sé na yɛ ba jut nedirik bɛrɛng bemat de Ishmayɛl Netaniya a kana hashe na a kyè mɛ yi e Mizpa sede bemat ngyang bama de a mɔrɔ Gedaliya Ahikam, bemat o vɛ à bemat como, na beha, na nèy tanga berɛmɛt, ko a toyo na yɛn e Gibɛyɔn.

¹⁷Yɛn á vɔk bengyip BeBabilɔn remo de Ishmayɛl a mɔrɔ Gedaliya, de gbɔng gwɔ̀m Babilɔn a tɛ̀ a sè gwɔmna sevwel o. Yaga ano, yɛn a tɛ̀ e yey mɛn be kyè vɔk e Misra na yɛn a kyè yikyik yi e BeBabilɔn. Yɛn a pe tumal e Kimham bagat na Bet-Lɛhɛm.