Read berom Yirmiya 42 Bible Online

Yirmiya 42 - berom bible

Yirmiya 42

¹E bama mo mwa bemat nuyel bemat como, mwa na Yohanan Kareya tanga Azarya Hɔshiya, ba vey na nezap bemat mwa, yi e besɛl o vɔk e berey o,

²yɛn a yang Yirmiya zarap Dagwi ngan, “Gabɔk wɛt, ra a wot pyɛ de wot ê won na hwo! Ra a Dagwi Darwey, Dagwi mot won yaga wot. Ra won yaga mwa hot de wot a nàra beken. Raane wot á sè pyak, ko a remo bwang mot tyɔng zɔng de wot a rɔngɔl ɛ, sede remo de hwà di ot.

³Ra won yaga na Dagwi Darwey, Dagwi mot a bin dura a wot gwong de wot ê kwey ɛ, na pyɛ de wot ê ra.”

⁴Yirmiya, zarap a toyo a yɛn, a ye, “Ey yaa, mê ra a Dagwi Darwey, Dagwi mot won mwin, tyɛng sede remo de yin a lolo, ko kayɛ pyɛ de a toyo mɛ, mê ha a yin. Mê lɛrɛ a yin pyɛ cak wɛt.”

⁵Ko yɛn a yang ɛ, “Tik na Dagwi Darwey a sè mwat nuha wo mwin, na wo tsak o e ra wot, ka sede wot a tik nà gyeng mwa nu de Dagwi Darwey, Dagwi mot ê nɔng o yaga wot,

⁶kɛ pyɛ mo ya jam a wot, kɛ ya jam wɛt ow, wot ê gyeng hâ Dagwi Darwey, Dagwi mot, de wot a sé lolo hwo na hwo ra a yɛ won. Kayɛ pyɛ yê sè a wot naka ka sede wot a gyeng ha mɛ.”

⁷E bama nepɔlɔ kuru, Dagwi Darwey a ha na Yirmiya,

⁸ko a yila Yohanan Kareya na mwa bemat nuyel bemat como de ba sé na yɛ, na bwang bemat o mwa yi e besɛl o vɔk e berey o.

⁹Ko a yang ɛn, “Dagwi Darwey, Dagwi Israyɛl de yin a tomo me na yɛ na won min a ye:

¹⁰‘Ka sede yin e simo yin re nuyel na sangal e sevwel semo, ko mê to lɔk in, mê gangas hin wɛt; mê tus in, mê luyu hin wɛt. Gawey de ma vey mɛ e ra yin ha ga vey a me na lashe yey sizɔng.

¹¹Yin re nuyel na wok bengyip gbɔng gwɔ̀m Babilɔn wɛt. Ma sé tanga yin, na me sey in, na me sey ɛ hin e vwɔ mɛ.

¹²Yaga mê tosho reyɔm min, ko mê tɛ̀ ɛ a tosho reyɔm min arɔng, na a to toyo na yin e sangal min. Me Dagwi Darwey, ma ha ano.’

¹³“Ko ka sede yin a ye: Wot ê sangal e vwel hemo wɛt, yin a kyɛ́ in nà gyeng fwɔ̂ Dagwi Darwey, Dagwi min,

¹⁴ko yin e tē: Wey, wot ê kyè wɔ sangal e Misra, e kwɔn de wot ê di ɛ̀ como e ngamo nuyel wɛt, kɛ wot ê to wok durûm yila como wɛt, kɛ wot ê to vɔk vyong wɛt, wot ê sangal e hwomo.

¹⁵Ka sede a sé ano, ko wok in hâ Dagwi Darwey, à yin bwang BeYuda, Dagwi Darwey, Da Jey Mwa, Dagwi Israyɛl a ye, ‘Ka sede yin a tɛ̀ tuushush na yin wɔ yel e Misra, na yin sangal e hwomo,

¹⁶ko como de yin e tele hin yɛ yê hwo e ra yin e vwêl Misra mo, ko vyong de yin e kyɛ́ in yɛ tyɔng wɛt yê raa hin ɛ, ko yin ê kushu e hwomo e vwel Misra mo.

¹⁷Mwa bemat de ba ga tɛ̀ e yey mɛn gak wɔgɔ, bê wɔ na be wɔ̀ sangal e Misra bê kushu e hwomo e como, kɛ na vyong, kɛ na tumbang ow, ko gwining ê nàra kwen wɛt, vit a bwang mɛn de bê hywit ɛn rezot de mê vey mɛ e ra yɛn arɔng.’

¹⁸“Dagwi Darwey, Da Jey Mwa, Dagwi Israyɛl a ye, ‘Tyɛng sede remo de ba shusha shom hom na lashe yey hom sizɔng e ra bemat Yɛrusalɛm, a sé ano de bê shusha lashe yey hom sizɔng e ra yin, ka sede yin a kyè vɔk e Misra. Yin ê sè sede beving, pyɛ byɛm-byɛm, pyɛ ha ves, na pyɛ sedusa. Yin ê sang to di kwɔn hemo wɛt.’

¹⁹“À yin bwang BeYuda, Dagwi Darwey a ye, ‘Yin wɔ e Misra wɛt. Yaga ano, tɔk in tsɛng-tsɛng ma sé tusa hin a remo;

²⁰ka sede yin a kyɛ́ in ha hemo, ko a sé e tô neken min. Yin á ra won na me, na me ra a Dagwi Darwey, Dagwi mot won yaga yin, ko yin á sira, yin ê ra kayɛ pyɛ de a ye hwo há a wot, ko wot ê ra yɛ.

²¹Ko di a remo ma ga ha a yin, ko yin a sé kyɛ́ in nà gyeng kayɛ pyɛ de Dagwi Darwey, Dagwi min a tomo me ha a yin.

²²Yaga ano, tɔk in tsɛng-tsɛng yin ê kushu e como, kɛ na vyong, kɛ na tumbang ayi e sevwel de yin e simo yin kyè wɔ sangal ɛ.’ ”