Read berom Yirmiya 43 Bible Online

Yirmiya 43 - berom bible

Yirmiya 43

¹Jeng de Yirmiya a tala ha a bemat o kayɛ pyɛ de Dagwi Darwey, Dagwi mɛn a tomo hɛ na a ha a yɛn,

²ko Azarya Hoshaya, na Yohanan Kareya, na mwa bwang bemat kaa mo ba yang Yirmiya, “Hwà sé vɛ́sɛ bɔs. Dagwi Darwey, Dagwi mot a tomo hwo na hwo ha a wot, wot wɔ sangal e Misra wɛt!

³Baruk Neriya a ga tɔgɔs hwo e ra wot, yaga na BeBabilɔn be sɛ̀ reto e ra wot, yaga na yɛn a mɔbɔs hot, kɛ be hashe hot vɔk e de sesam e Babilɔn.”

⁴Yaga ano, Yohanan Kareya, kɛ hwak e ji bemat nuyel bemat como, kɛ hwak e ji bemat o a gyeng nû Dagwi Darwey na yɛn a nàra e sevwel Yuda wɛt.

⁵Ko Yohanan Kareya na mwa bemat nuyel bemat como ba jut kawɛ mwat de a tɛt ɛ e Yuda, ba kyè na yɛn vɔk e Misra, mwa na bemat de ba ga toyo yi e bwang yére bemat jey e nekwɔn de yɛn a kana shara hɛn vɔk ɛ:

⁶yɛn à beras na beha na nèy, na nèy behwong gwɔ̀m. Yɛn a jut kawɛ mwat de Nebuzaradan gwɔ̀m bemat gyeng lɔ gwɔ̀m á kana tik ɛn e vɔ Gedaliya Ahikan Shafan na a bɛrɛng hɛn naka, mwa na Yirmiya zarap Dagwi tanga Baruk Neriya.

⁷Yɛn á kyɛ́ ɛn nà gyeng nû Dagwi Darwey, ko yɛn a kyè vɔk e Misra, pere vɔk e gbɔng repomo Tapanhes.

⁸E hwomo Dagwi Darwey a ha na Yirmiya, a yang ɛ,

⁹“Hashe bègbɔng beta na vɔ mo, na hwo lɛrɛ vɛ e vwel e rwi yel e lɔ gwɔ̀m Misra hê Tapanhes, ko tik na bemat nuyel Yuda be bɛrɛng pyɛ de hwà sé ra.

¹⁰Ko hwo ha a yɛn, ‘Me Dagwi Darwey, Da Jey Mwa, Dagwi Israyɛl, ma sé kyè wɔ vey na mwat fwom hom Gbɔng Gwɔ̀m Nɛbukadnɛzar wo Babilɔn e kwɔn hemo, ko yɛ a rɔda tɛ̀ gwofwa negwɔm mɛ e ra beta de hwà ga bang vɛ, ko ê tɛ̀ buk negwɔm mɛ e ra vɛ.

¹¹Nɛbukadnɛzar ê vey re Misra na como: “ ‘Bemat gawêy kushu na tumbang, bê kushu na tumbang, vê gawêy sesam bê ra nesam, ko vê gawêy mɔbɔs hɛn e como, bê mɔbɔs hɛn e como.

¹²“ ‘Mê dak kya e ra begbɔng beduk re fongol bedagwi Misra, ko gbɔng gwɔ̀m Babilɔn ê tɛ̀ kya e ra bedagwi mɛn, kɛ a hashe vɛ a kyè mɛ ayi. Sede remo de lwek vyēl e paa ngyána haalal e berugu mɛ, ano de gbɔng gwɔ̀m Babilɔn ê paa pyɛ́ vyes haalal e Misra, ko a de kyè wɛrɛ na wɛ̂ng como.

¹³A rɔda wey na pyɛ̂ dura yê beta mɛn e Heliyopolis e Misra, ko a rɔda dak kya buruk e ra begbɔng beduk rê fongol bedagwî BeMisra.’ ”