Read berom Yirmiya 44 Bible Online

Yirmiya 44 - berom bible

Yirmiya 44

¹Dagwi Darwey a ha na Yirmiya e ra mwa BeIsrayɛl de ba sé sangal e Misra, e bagbɔng bapomo Migdɔl, na Tapanhes tanga Mɛmfis tanga e vwel Patrɔs.

²Dagwi Darwey, Da Jey Mwa, Dagwi Israyɛl a ye, “Yin pyɛ min yin a ga di gawey de ma vey mɛ e ra Yɛrusalɛm na mwa bwang bapomo Yuda. Bɛrɛng hin vɛ, pere vey e jeng yemo, ba rɔngɔl e barin, ko vit a mwat de a sangal e ji vɛ,

³yaga bemat mɛn ba ra neves pyak, ko ba tɛ̀ ma wok shom. Yɛn a nása nɔrɔ yas vɔk na bedagwi behak, ko yɛn a ra a bedagwi de yɛn, kɛ yin, kɛ bedabeda min bá sang re a vɛ fongol wɛt.

⁴Ma sǎ e de tomsal a yin na bemat fwom hom, bezarap Dagwi, de bá dopse tang in, yin kwon ra pyɛ́ vyes de ma kyɛ́ me yɛ zakzak wɛt.

⁵Ko yin a wet betong, kɛ yin a tɛ̀ nehywɛ min wɛt. Yin a kyɛ́ in nà hala negwɔn neves, ne nása nɔrɔ yas de be yɛt vɔk na bedagwi beduk.

⁶Yaga ano, ma shusha shom hom, na lashe yey hom e ra bapomo Yuda, na e ra nehyok Yɛrusalɛm, ko ma dak kya e ra vɛ. A remo ba ga lashe hɛn, ba ga tɛ́ ɛn barin.”

⁷“Ano me Dagwi Darwey, Da Jey Mwa, Dagwi Israyɛl, ma sé rangal hin a remo pyɛ de ya tɛ̀ yin a sé ra a bato min pyɛ́ vyes yere yemo. Yin e simo yin a hwɔtɔ gawey e ra beras na beha, nèy na nèy vɔ, yaga na bwang behak e ji min ba tɛt ɛ wɛt a?

⁸Yaga sɛ́ de yin e cɔgɔs shom hom, na tom vɔ min, yi na nása nɔrɔ yas de be yɛt a bedagwi beduk e ngamo e Misra, dem de yin a vey sangal ɛ arɛt? Yin e ra ano yaga na yin a wey na bato min, na kayɛ yere bemat jey ye shɛgɛsh hin, na ye dusa reza min a?

⁹Yin a ga ye bam a mwa pyɛ́ vyes de bedabeda min ba ra e bapomo Yuda na e nehyok Yɛrusalɛm, na yê begwɔ̀m Yuda na beha mɛn, tanga myin na beha min a?

¹⁰Ko pere vey e yunung, yin a ga dyɛng bato min wɛt. Yin a ga nɔng me nerey, kɛ yin a sangal tyɛng na Badu de ma nɔng in, yin na bedabeda min wɛt.

¹¹“Ano kwong, Me Dagwi Darwey, Da Jey Mwa, Dagwi Israyɛl, mê doyo e ra yin, na me wey na BeYuda hywiri.

¹²E ra reha bwang BeYuda de ba tɛ̀ e yey mɛn gak na be kyè, be wɔ sangal e Misra, mê di ba wey na yɛn e hwomo mwa vit. Mwa hɛn, bê kushu e Misra, kɛ e como, kɛ na vyong ayi. Berey o na besɛl o bê kushu e como, kɛ na vyong, ko yɛn ê sè pyɛ byɛm-byɛm, pyɛ kis, bemat bê shɛgɛsh hɛn, ko bê dusa reza mɛn.

¹³Mê tabak vemo de ba sé sangal e Misra, tyɛng sede remo de ma tabak Yɛrusalɛm na como, na vyong tanga na tumbang.

¹⁴Vit a hwak e ji bwang BeYuda de ba vey sangal e Misra de ê hywit ɛ, kɛ a dal, ko gwining mɛn ê to ɛ́ vɔk e Yuda, e kwɔn de yɛn e simo be to wɔ sangal ɛ tyɔng wɛt. Vit a hwak de ê to ɛ́, sɛ̌ tyɔng de ba tele.”

¹⁵Ko mwa beras de ba tɔk beha mɛn be nása nɔrɔ yas de be yɛt vɔk na bedagwi behak, na mwa beha de ba sé tumal e hwomo, mwa na BeIsrayɛl de ba sangal e Patrɔs wo Misra, yɛn a sé gbɔng regyɛng tyɔng wɛt, ba yang Yirmiya,

¹⁶“Wot a kyɛ́ ot nà wet betong na pyɛ de hwà ga ha a wot e ji reza Dagwi Darwey.

¹⁷Wot ê ra kayɛ pyɛ de wot a sira wot ê ra. Wot ê nára a dagwi mot hwā, Derwey Lagwi, nɔrɔ yas de be yɛt, ko wot ê shusha a yɛ nɔrɔ nshi anap, tyɛng sede remo de wot, na bedabeda mot, na begwɔ̀m mot, na bemat nuyel mot bá ragas e bapomo Yuda tanga e nehyok Yɛrusalɛm. E jeng o wot á tē shɛrɛk na pyɛ̂ re, wot a vɔk pyɛ̂ nedanerey, ko wot á vɔk reyɔm rehak wɛt.

¹⁸Ko yimo jeng de wot a tik nása nɔrɔ yas de be yɛt vɔk na Derwey Lagwi, ko wot a tik shusha a yɛ nɔrɔ nshi anap, wot a to vɔk pyɛ́ wɛt, ko bemat mot ba ga kushu na como, tanga na vyong arɔng.”

¹⁹Beha mo ba to ye, “Jeng de wot e halang kpam-tuk rɔkrɔk de be yong na wo sè sede Derwey Lagwi, na wot a nása nɔrɔ pyɛ́ de be yɛt vɔk na yɛ, na wot a shusha a yɛ nɔrɔ nshi anap, beras mot be tē ey à pyɛ́ de wot e ra mo wɛt a?”

²⁰Ko Yirmiya a yang mwa bemat o, beras na beha de ba toyo a yɛ na ha mo,

²¹“E ra reha nenɔrɔ pyɛ̂ rangas de yin na bedabeda min, na begwɔ̀m min, na bemat nuyel min, na bemat sevwel o mwa, yin á nása e bapomo Yuda, na e nehyok Yɛrusalɛm, yin e bare, Dagwi Darwey a tɔk reha nɛ, kɛ a ga ye bam na nɛ bɛ?

²²Yunung vwel min ha sé barin, ko vit a mwat de a sangal e ji hɛ. Ha ga tɛ́ ɛ hal, na pyɛ byɛm-byɛm, na pyɛ sedusa yaga Dagwi Darwey a tɔk re nuyel na niri na nengyas tanga pyɛ́ vyes de yin a ragas wɛt.

²³Rezot remo ra hwo e ra yin yaga yin a nása a bedagwi behak nɔrɔ̂ pyɛ́ de be yɛt vɔk na Dagwi, yi ano yin a ra a Dagwi Darwey banɛn, yaga yin a kyɛ́ in nà gyeng mwa Badu mɛ, na nu de a nɔng in.”

²⁴Ko Yirmiya a ha a mwa bemat o, na mwa beha mo wɔgɔ, “Wet in betong na hâ Dagwi Darwey, mwa yin BeYuda de yin a sé sangal e vwel Misra.

²⁵Dagwi Darwey, Da Jey Mwa, Dagwi Israyɛl a ye, ‘Yin na beha min, tomong min ba ga sila pyɛ de yin a ha na nenu min, yin a tē: Wot a tɛ̀ e yey mot na wot a sila sira de wot a ga ra, na wot a nása nenɔrɔ yas de be yɛt vɔk na Derwey Lagwi, na wot a shusha a yɛ nɔrɔ nshi anap. Ey, cí in mɛ, sila hin sira min, na yin a nása a yɛ nenɔrɔ min.

²⁶“ ‘Ko a remo, wet in betong na hâ Dagwi Darwey, à mwa yin BeYuda de yin a sangal e Misra: Me Dagwi Darwey ma sira na gbɔng reza hom, mê to simi na WoYuda hwak de a sangal e Misra a to vo reza hom na nu mɛ wɛt, na a ye: E ji reza Darwey Dagwi Darwey wo neken!

²⁷“ ‘Ma rɔda ra na me di, yɛn a sɛ̀ pyɛ̂ nedanerey wɛt, ko na be wey na yɛn BeYuda de ba sangal e Misra e negya. Mwa hɛn yɛn ê kushu, kɛ e como, kɛ na vyong, sɛ̌ vit a hwak e ji mɛn de a tɛ́t ɛ.

²⁸Tyɔng e ji mɛn zɔng de bê hywit ɛn reku, ko bê toyo yi e sevwel Misra vey e sevwel Yuda. Ko bwang vemo de ba dal beken bê tɔk neha mwat de na sila mwin, kɛ nenang kɛ nemɛn!

²⁹Me Dagwi Darwey mê nɔng in pyɛ dura wɔgɔ, mê tabak hin e dem hemo, ko sira de ma ra wɔgɔ, mê vey na gawey e ra yin hê sila arɔng.

³⁰Me Darwey Dagwi Darwey, mê nára Farawo Hofra, gbɔng gwɔ̀m Misra e vɔ vê repugu mɛ de be simo be mɔrɔ hɛ, tyɛng sede remo de ma nára Gbɔng Gwɔ̀m Zɛdɛkiya wo Yuda e vwɔ Gbɔng Gwɔ̀m Nɛbukadnɛzar wo Babilɔn de á sè mwat repugu mɛ, de a simo a mɔrɔ hɛ arɔng.’ ”