Read berom Yirmiya 46 Bible Online

Yirmiya 46 - berom bible

Yirmiya 46

¹Dagwi Darwey a ha na Yirmiya e ra yére bemat jey.

²A pɛrɛ na Misra. Pyɛ de a ha e ra bemat como Gbɔng Gwɔ̀m Neko wo Misra de Gbɔng Gwɔ̀m Nɛbukadnɛzar wo Babilɔn a re ɛ na como e Karkɛmish bagat na Gwɔrɔt Ɛifaratɛs, e shey he naas de Gbɔng Gwɔ̀m Yɛhɔyakim Yɔsiya á se gwɔ̀m Yuda a yemo:

³“Yong in beruga min na yin kyè vɔk e de como!

⁴Tɔrɔ hin bedwa min, laga hin vɛ. Ngyɛrɛ hin ko yin tɛ̀sɛ bebong dyam min! Tsep in bebara min! Tɛ̀ in yɔ̀m como min!”

⁵Dagwi Darwey a rangal a ye: “E sɛ de me bɛrɛng ɛ? Yɛn a sé toyo na bama. Ba ga ro besuga mɛn ko yɛn a ga tele dey-dey. Yɛn e bɛrɛng bama wɛt, bengyip ba ga gwɔrɔ hɛn.

⁶Vê tele hyiw ba tɔk ye kwas wɛt, vê como ba tɔ̀k hywit ɛn wɛt arɔng. E rwa bato, e hagat Gwɔrɔt Ɛifaratɛs, be tiris bol, be gabsa.

⁷E wa de e turus sede Gwɔrɔt Nil, sede tɛmɛ-nshi gwɔrɔt bakwogom o ɛ?

⁸Misra wo sogso sede Gwɔrɔt Nil sede nerɔt de na tɛ̀ tɛmɛ Misra wa ye, ‘Mê sogo, ko me bang jey, mê wey na bapomo, na bemat vɛ mwa.’

⁹À bedwa, nára hin, a bekyɛkyɛ bedwa wɔ́s in! Gang bemat como — BeEtiyopya na BeLibya vê beruga BeLidya vê tabas ket hyiw.

¹⁰Hemo hɛ à tuk Darwey Dagwi Darwey, Da Jey Mwa tuk tala hɛn neves mɛn, tuk tabak ve repugu mɛ. Wal como mɛ wô ré ɛn sɛ̌ wa sirik, ko wô sɔ nemi mɛn sɛ̌ na vey a wɛ. Yaga Darwey Dagwi Darwey, Da Jey Mwa e nára nɔrɔ̂ yɛt, e vwel rwa bato e hagat Gwɔrɔt Ɛifaratɛs.

¹¹Tút in vɔk e Gileyat e de hwal, à yin BeMisra! Mwa behal min ba ga tɛ́ ɛn yúkyuk, vit a pyɛ de yê tɛ̀ in tyang.

¹²Yére bemat jey ya ga wok reha rekyen min, kawɛ mwat a ga wok tosho min. Mwat como a tiri bwol e ra mumwɛ, ko mwa hɛn ba gabsa e vwel.”

¹³Jeng de Nɛbukadnɛzar gbɔng gwɔ̀m Babilɔn á vey na a hwo Misra na como, Dagwi Darwey á ha na Yirmiya, a ye:

¹⁴“Ha in ha mo e Misra, ko yin shara hɛ e Migdɔl, na Mɛmfis tanga Tapanhes. Yong in na yin a dul bato min, yaga como yê wey na vemo de ba gwɔrɔ hin.

¹⁵Yaga sɛ́ de Afis, dagwi min a ga tele ɛ? Yaga sɛ́ de mus wo gap min a tumal ting wɛt ɛ? Yaga Dagwi Darwey a ga gang ɛ e vwel!

¹⁶Bemat como min ba ga tiris bol, ba gabsa, kawɛ mo a yang mumwɛ, ‘Rá dey! Tik wot to ot na bemat mot vɔk e vwel tɔ́ mot, yaga como de ya sé wey na bemat.’

¹⁷Vo in a Farawo gbɔng gwɔ̀m Misra reza repas — Mwat Kaa nà Tɔk Jeng

¹⁸Me Gbɔng Gwɔ̀m neken de reza hom a Dagwi Darwey, Da Jey Mwa, Ma sé kyè vey na gap, sede Raku Tabor e ji beraku, sede Raku Karmɛl bagat na gworep.

¹⁹À yin BeMisra, yong in pyɛ́ min vɔk e de sesam. Pomo Mɛmfis hê tɛ́ ɛ gbingiring, barin de vit a mwat e ji mo.

²⁰Vwel Misra hê se sede shep rɔndɔng ryat, de yót yi e rwa bato ye roros yɛ.

²¹Bemat comô byɛ mɛn mwa ba ga tɛ́ ɛn gbɛrɛk sede nèy ngyī. Yɛn a tumal na be tó como wɛt, mwa hɛn ba doyo, ba tele. Tuk gawey mɛn ha ga pom, jeng de bê tabak hɛn.

²²Misra wa ga tele, wó wus sede gwɔ̄m, jeng de bemat comô vê repugu ba vey bagat. Ba hwo e ra wɛ na tyém, sede bemat tow cɔ́gɔt.

²³Bê wey na yɛn sede gbɔng rehwot, mwa ano de bemat mɛn ba sé gyisik, bemat como mɛn ba dal rawal na nepyak, ba dal gap bara.

²⁴Ba ga tɛ̀ a BeMisra rekyen, bemat rwa bato ba ga re ɛn e como. Me Dagwi Darwey ma ha ano.”

²⁵Dagwi Darwey, Da Jey Mwa, Dagwi Israyɛl a ye, “Ma sé kyè wɔ tabak Amɔn, dagwi Tebes, mwa na Farawo, na Misra tanga bedagwi mɛ, na begwɔ̀m mɛ. Ma sé kyè wɔ jut gbɔng gwɔ̀m Misra na mwa vemo de ba tɛ̀ gap mɛn e ra yɛ.

²⁶Mê nára hɛn e vɔ vemo de be simo be mɔbɔs hɛn, vɔk na Gbɔng Gwɔ̀m Nɛbukadnɛzar wo Babilɔn na bemat como mɛ. Ko e bama jeng tyɔng, bemat ba rɔda to sangal e Misra sede remo de yɛn á ra e jeng de ya ga kwey. Me Dagwi Darwey ma ha ano.”

²⁷À hwo, mwat fwom hom Yakɔp, hwo vo bengyip wɛt. À hwo Israyɛl, hwo ye lot wɛt. Mê sey o yi e vwel yikyik, na yere mo yi e vwel sesam mɛn. Yakɔp ê toyo vey e lɔ, ê sangal tyang, na yey dyɛngɛ, ko vit a mwat de ê nɔng in bengyip.

²⁸Hwo vo bengyip wɛt, à Yakɔp mwat fwom hom, yaga ma sé tanga hwo, mê wey na mwa yére bemat jey, e ji vemo de ma gang o vɔk na yɛn, ko mê wey na hwo hywiri wɛt. Mê tabak hwo e gwong de gwa sé tyɛng, ko mê tik o sana tabak wɛt. Me Dagwi Darwey ma ha ano.