Read berom Yirmiya 47 Bible Online

Yirmiya 47 - berom bible

Yirmiya 47

¹Gyam na Farawo gbɔng gwɔ̀m Misra a hwo Gaza na como, Dagwi Darwey a ha na Yirmiya e ra BeFilisti.

²A ye, “Di! Nshi na sé sogo e rwa bato, ko nê yi na gap sede rɔt de ha tɛ̀ tɛmɛ. Nê bang vwel o na kayɛ pyɛ de ya sé e ji hɛ, na gbɔng repomo tanga bemat de ba sangal e hwomo. Bemat bê dak sekun yaga sɛlɛ, kawɛ mwat e jey ê tosho ding-ding.

³Yɛn ê wok wus bekwok bol bedwa, na lwɛ́lɛ bekyɛkyɛ bedwa, na nèngyágarak bol bekyɛkyɛ mo. Beda bê toyo yaga nèy mɛn wɛt, vɔ mɛn bê sè pang e bahagat mɛn.

⁴Jeng ya ga vey na be wey na BeFilisti na be dul yi e Tur na Sidɔn mwa mwat sɛlɛ de a tɛt ɛ. Me Dagwi Darwey, mê wey na BeFilisti, na bwang vê bakwogom Kaftor.

⁵Gbɔng lashe yey ha ga vey a bemat Gaza, ko bemat Ashkɛlɔn ba nàra yuu. Bwang BeFilisti yerê vê hwɔ̀k, vɔk e yɛ̌ jeng de yin ê yɛt babek min ɛ?

⁶Yin ê tosho yin tē, ‘Wal como Dagwi Darwey! Hwô sǎ e de tow bemat vɔk e yɛ̌ jeng ɛ? To o vɔk e fwal mo, sangal e hwomo, na hwo pɔng!’

⁷Ko wô pɔng e rɛ, remo de ma ga nɔng wɛ fwom na wo ra ɛ? Ma ga nɔng wɛ nu na wo hwo e ra Ashkɛlɔn, na bemat de ba sangal e vwa gworep.”