Read berom Yirmiya 48 Bible Online

Yirmiya 48 - berom bible

Yirmiya 48

¹Pyɛ de Dagwi Darwey, Da Jey Mwa, Dagwi Israyɛl a ha e ra Mowap a yemo: “Gawey e ra bemat Nebo, ba ga wey na repomo mɛn! Ba ga tɛ̀ a Kiriyatayim rekyen, ba ga re rɛ na como, ba ga gangas kwɔn dal mɛn, ko ba ga tɛ̀ a bemat o rekyen.

²Nerey Mowap na ga tala hɛn, vê repugu ba sé yóng a Hɛshbɔn neves. ‘Tik wot wɔ̀ dul rɛ nà se yere bemat jey!’ Hwo repomo Madmɛn, hwà wɛro yuu, bemat como bê kwey e hwo.

³Bemat Hɔrɔnayim be dak sekun be tē, ‘Como vyes! Gbɔng gawey!’

⁴Ba ga wey na Mowap, wet betong na sesin nèy mɛn.

⁵Wok in lwɛ́lɛ vos yey mɛn, yɛn e turus vɔk e Luhit, yɛn e gyiris vɔk e Hɔrɔnayim, yɛn e wokos sesin reyɔm na rezot mɛn.

⁶Yɛn a ye: ‘Dari hin dey, yaga neken min! Dari hin sede madung e hey gbingiring!’

⁷À Mowap, hwà tɛ̀ gap mo e ra reto mo, na yas mo, ko di a remo, hwo mwa bê re o na como. Dagwi mo Kɛmɔsh ê kyè vɔk e de sesam, mwa na bepiris mɛ, na begwɔ̀m mɛ.

⁸Wo wey ê yel e kahɛ pomo, ko vit a hinde hê dal. Bê lashe nɛk ko bê wey na tyɛl arɔng. Me Dagwi Darwey ma ha ano.

⁹Bere hin nevwashe e hiri Mowap, na yin wey na wɛ. Bê hala bapomo wɛ e barin, ko vit a mwat de ê to sangal e hwomo.

¹⁰Wo gawey à mwat de e ra fwom Dagwi Darwey na yey mɛ mwa wɛt! Wo gawey a mwat de e tik wal mɛ nà lusha nemi!”

¹¹Dagwi Darwey a ye, “Sevwel Mowap sa ga dopse sangal tyang, ko ba ga sang kyè na se vɔk e de sesam wɛt. Sa se sede nshi anap de ba tik nɛ na ne sangal yaang zɔng, ko ba sǎ e de shusha nɛ yi e fùs gwomo vɔk e gworo wɛt. Netâ nɛ na ga gwɛ̌ hɛn wɛt, ko na ta e nu sede remo de ná sè yimo susu mo zɔng.

¹²“Yaga ano, jeng ye kyè vey de mê tomo bemat na be losho Mowap sede nshi anap. Bê lusha bètus nshi anap o ko be mɔbɔs vɛ cɛk o cɛk o.

¹³Ko a rɔda se a BeMowap o pyɛ rekyen na dagwi mɛn Kɛmɔsh, tyɛng sede remo de á se a BeIsrayɛl pyɛ rekyen na Bet-Ɛl, kwɔn bedagwi beduk de yɛn a tɛ̀ gap mɛn e ra yɛn.

¹⁴“À yin beras Mowap, yaga sɛ́ de yin e tē yin a sé besuga, bemat yey ting de ba ga mara hin na como wɛt ɛ?

¹⁵Ba ga wey na Mowap na bagbɔng bapomo mɛ mwa, ba ga mɔbɔs na wal bewen mɛn de ba dal na nerat mwa. Me Gbɔng Gwɔ̀m de reza hom à Dagwi Darwey, Da Jey Mwa ma ha ano.

¹⁶Gawey Mowap he kyè vey pom, ko bê wey na vwel o dey-dey.

¹⁷Ra in sesin hɛ, mwa yin yére bemat vwarâ hɛ, na mwa yin de yin a tɔk reza de ha vɔk. Yɛ in, ‘Ba ga gang negwɔm hɛ de ha vɔk reto sizɔng, gbɔng nerat hɛ, na gwele negwɔm de gwa ga kwɔrɔ hɛ!’

¹⁸Yin de yin a sangal e Dibon, gyirik hin yi e kwɔn nerey min, na yin sangal e vwel, e ji búm. Mwat wey na Mowap a ga pom, ko a ga gangas kwɔn dal min.

¹⁹À yin de yin a sangal e Arower, tumal hin e gwong na yin gyeng! Rangal hin vemo de ba sé tele, rangal hin hɛn pyɛ de ya té.

²⁰Mowap wa ga gaba, wa ga tɛ́ ɛ pyɛ rekyen, tosho hin wɛ, dak in sekun! Ha in a Rɔt Arnɔn, ba ga wey na Mowap!

²¹“Shɔt ya ga hwo e ra bapomo vwel tas e rahwol — vɛ à Hɔlɔn, na Yaza, tanga Mefat,

²²na Dibon, na Nebo, tanga Bet-Diblatayim,

²³Kiriyatayim, na Bet-Gamul, tanga Bet-Meyɔn,

²⁴Kɛriyɔt na Bɔsra. Shɔt ya ga hwo e ra mwa bapomo Mowap, vê bagat na vê yikyik.

²⁵Ba ga bugut gbɔng gap Mowap, ba ga wey na reto wɛ. Me Dagwi Darwey ma ha ano.”

²⁶Dagwi Darwey a ye, “Tɛ̀ in Mowap wo feng siring, yaga wa ga sogo a me nehywɛ. Mowap wô biring e ra hwɔs wɛ, ko bemat bê shɛgɛsh wɛ.

²⁷À Mowap, hwó bare na remo de hwá shɛgɛsh BeIsrayɛl a? Hwá teshe na yɛn sede ba ga vos ɛn na regyɛng begbik, ko kayɛ jeng de hwó ha e ra yɛn, hwó rugum to mo!

²⁸“À yin bemat sangal e Mowap! Nusu hin e bapomo na yin wɔ sangal e bevwak beta. Sè in sede bebɔp de ba tɛsɛ barɛngɛ mɛn e bahagat vwɛngɛ.

²⁹Wot a ga dak kaa Mowap, de wó dak kaa tyɔng wɛt — na reha tos to, na kaa ves tanga netset, yey wɛ ya ga tɛ́ ɛ gbarak na neves.

³⁰Me Dagwi Darwey ma tɔk tôs to mɛ, dak kaa mɛ ha sé bɔs zɔng, tomong mɛ ba sé bɔs zɔng.

³¹Yaga ano, me dak sekun yaga Mowap, me tosho yaga kawɛ WoMowap, me ra sesin yaga bemat Kir-Heres.

³²Mê tosho yaga tin anap Sibma, hê dal hemo de mê ra yaga bemat Yazɛr. Nelang mo nà ga ye dɔ a gworep, nà ga pere wɔ wul Yazɛr. Ko di wo wey a ga hwo, e ra nèy mo naswigi, na nèy anap mo arɔng.

³³Ba ga sey ɛ yey pyɛng na seshɛgɛsh mo, yi e sevwel Mowap de sa vɔk pyɛ́ shɛrɛk. Ma ga dul nshi anap yi e kwɔn piri mo, vit a mwat de e farang nɛ na yey pyɛng, lwɛ́lɛ de be ra gwa sé gwo yey pyɛng wɛt.

³⁴“Bemat Hɛshbɔn na Ɛlɛyalɛ ba dak sekun, ko ba tɔk wok hɛ yikyik e Yahas, bemat Zowar ba tɔk wok hɛ, ko ha wɔ́ vɔk e Hɔrɔnayim na Eglat Shɛlishiya arɔng. Ko nshi kerɔt Nimrim na pere wɔ hworok.

³⁵Mê ro BeMowap nà nɔngɔs nɔrɔ yas de be yɛt e nekwɔn re fongol mɛn ne rahwol, na yi na nása nɔrɔ yas de be yɛt vɔk na bedagwi mɛn arɔng. Me Dagwi Darwey ma ha ano.

³⁶“Ano de yey hom ye lashe hɛ yaga Mowap tanga bemat Kir-Heres, sede mwat de e ra lwɛlɛ sesin na yǔye, yaga kayɛ pyɛ de yɛn a vɔk ya ga kyè vit.

³⁷Mwa hɛn ba ga wula bato mɛn, ko ba ga yɛt setot negyɛk mɛn arɔng. Mwa hɛn ba ga kyě jɔs vɔ mɛn na neba, ko kawɛ e ji mɛn a tɛ̀ rugu sesin.

³⁸Vit a pyɛ de be di e ra tɛt beduk Mowap na e bemajey-jɔgɔ mɛn, sɛ̌ bemat sesin zɔng, yaga ma ga mɔrɔ Mowap sede fus de mwat hwak e simo wɛ wɛt.

³⁹Ba ga shara Mowap! Dak in sekun! Mowap wa ga tɛ́ ɛ pyɛ rekyen, wa ga tɛ́ ɛ barin, ko mwa yére bemat jey de ya rɔnɔ wɛ be shɛgɛsh wɛ. Me Dagwi Darwey ma ha ano.”

⁴⁰Dagwi Darwey a ye: “Di, hwak ê yi na yol sede kim, ko ê shara bafabak mɛ e ra Mowap.

⁴¹Bê re bapomo mo e como, ko be sey ɛ nekwɔn dal mɛn. E tuk o, neyey bemat como Mowap nê se sede ne hwā de e rus tɔ́.

⁴²Bê wey na Mowap, wô to se yere bemat wɛt, yaga wa sogo a Dagwi Darwey nehywɛ.

⁴³Bengyip, na bavɔng tanga sòro ba sé gyeng in, à yin BeMowap! Me Dagwi Darwey ma ha ano.

⁴⁴Kawɛ mwat de a tele a bengyip o, ê gaba e revɔng o, ko kawɛ mwat de a nu ɛ e revɔng o, ko soro wô vo ɛ shing! Yaga mê vey na pyɛ́ yemo e ra Mowap, e shey de mê tabak hɛn. Me Dagwi Darwey ma ha ano.

⁴⁵E necam Hɛshbɔn, bemât tele yi e vwel mɛn bê sangal ɛ gbɛrɛk, yaga kya ha ga nusu yi e Hɛshbɔn, lem kya yi e lɔ Sihɔn. Ha ga rangas berahwol Mowap sede tili wɛ, na beraku wɛ sede pɛt vê sogo nehywɛ.

⁴⁶Gawey e ra hwo, à Mowap, Bemat Kɛmɔsh ba ga wey, yaga ba ga hashe bewen min sede bemat ngyang, ko behwong min e sesam.

⁴⁷Mwa ano, mê to toyo a Mowap na nerat wɛ, e jeng de ye kyè vey. Me Dagwi Darwey ma ha ano.” Talâ shɔt e ra Mowap a yemo.