Read berom Yirmiya 49 Bible Online

Yirmiya 49 - berom bible

Yirmiya 49

¹Vɔk na BeAmɔn, Dagwi Darwey a ye: “Israyɛl a vɔk bewen wɛt a? A vɔk wò re nedanelɔ wɛt a? Yaga sɛ́ de vê sáp Milkɔm ba sey ɛ vwel Gat, ko bemat mɛ ba sangal e bapomo mo ɛ?

²Ano, jeng ye kyè vey, de mê pɛl durum como e ra Raba wo BeAmɔn. Wô tɛ́ ɛ gwɔt barin, ko bê dak kya e nebapomo mo. Ano de BeIsrayɛl bê to sey ɛ vwêl vemo de ba kana sey ɛ vwel mɛn. Me Dagwi Darwey ma ha ano.

³Dák in sekun à yin bemat Hɛshbɔn, yaga Ai wa ga tɛ́ ɛ barin! Tosho hin, a yin bemat Raba! Tɛ̀ in berugu sesin, lashe hin yey, kyě tele hin kpɛɛ! Yaga bê jut dagwi min Milkɔm vɔk e de sesam mwa na bepiris mɛ na vê fwom mɛ.

⁴Yaga sɛ́ de yin e dak kaa na gap min ɛ? Gap min o he kyè wɔ tala hɛ, À yin BeAmɔn sede hwong sana tsak o, yin a tɛ̀ gap min e ra yas min, yin e tē: E wa de ê kyɛm a hwo e ra wot ɛ?

⁵Me kyè wɔ vey na gwazɛrɛk e ra yin, yin na mwa bemat vwara min, ko bê shara hin kawɛ e remɛ, vit a mwat de ê toyo na bemat min de ba ga tele. Me Darwey Dagwi Darwey, Da Jey Mwa ma ha ano.

⁶Ko e bama jeng, mê toyo a Amɔn na nerat mɛ Me Dagwi Darwey ma ha ano.”

⁷Vɔk na BeƐdɔm. Dagwi Darwey, Da Jey Mwa a ye: “Vit a netsitsɛng kwong e Teman a? Vô du ha ga lashe hɛ e vɔ vê tɔ́k a? Netsitsɛng mɛn na ga vuru hɛn a?

⁸À yin bemat Dedan, doyo hin na yin tele! Lɛsɛ hin! Yaga mê vey na gawey Esau e ra yere mɛ, e jeng de mê tabak hɛ.

⁹Jeng de bemât vos nèy anap bê vey na yin, bê tɛrɛs ɛ nemɔ mo wɛt a? Jeng de begbik be vey e lɔ naturuk, yɛn e hashe pyɛ́ de yɛn e simo zɔng.

¹⁰Ko me kē, ma ga hywɛrɛm Esau kpimit, ma ga wuma nedem lɛsɛ mɛ, ko e tɔk to lɛrɛ to mɛ wɛt. Ba ga wey na nèy mɛ, na cáng mɛ, na bemat vwara mɛ, a to sɛ wɛt.

¹¹Tik in nehyɛn min, mê bɛrɛng nɛ naka, ko tik na bekuma min be tɛ̀ gap mɛn e ra me.”

¹²Dagwi Darwey a ye: “Ka vemo de a sé tyɛng be tabak hɛn wɛt, ba sɔ keshi tabak, ko yin e bare yin ê kyè sana tabak a? Yin ê kyè sana tabak wɛt, yin ê sɔ keshi tabak o!

¹³Me Dagwi Darwey pyɛ hom ma sira wɔgɔ, repomo Bɔsra rê tɛ́ ɛ pyɛ bengyip, na kwɔn gbingiring, bemat bê shɛgɛsh rɛ, ko be dusa na reza rɛ. Mwa nebapomo rɛ nê tɛ́ ɛn barin gbak-gbak.”

¹⁴Yirmiya a ye: “Ma ga wok yɛgɛt yi na Dagwi Darwey, ko ba ga tomo tom vɔk na yére bemat jey wɔgɔ, ‘Tula hin na yin vey e ra yɛ, na yin sogo yaga tô como!’

¹⁵Mê tɛ̀ yin dal na nesɛl e ji mwa yére bemat jey, pyɛ byɛs e nuyel bemasi.

¹⁶Bengyip mo de be wokos, na tos to mo ba ga kwɛlɛng hwo, hwo de hwó sangal e sarang beta, de hwà sé e ra rak berahwol, mwa ano de hwà yong kwɔn sangal mo e rak o sede hê kim, yi e hwomo, mê vey na hwo e vwel. Me Dagwi Darwey ma ha ano.”

¹⁷Dagwi Darwey a ye, “Gawey de hê hwo e ra Ɛdɔm hê se ves sizɔng, ko kawɛ mwat de a sé kwey ê yang ɛ yɔɔt, ko a vo bengyip tyɔng wɛt.

¹⁸Pyɛ de yê té na Ɛdɔm yê se tyɛng na yemo de yá té na Sɔdɔm tanga Gɔmɔra, na bapomo de bá sè bagat na vɛ, de bá wey na mwa vɛ hywiri. Vit a mwat de ê to sangal e vɛ, vit a mwat de ê to wɔ̂ rekyɛn e hwomo.

¹⁹Sede gukum de wa sé nusu yi e rehwot Rɔt Yɔrdan pere vɔk e tyɛl hwéy vyēl rat, ano de mê vey na me tɛ̀ BeƐdɔm be tele dey-dey yi e sevwel mɛn. Ko mwat nuyel de ma kasa ê re negwɔm e ra yere bemat jey o. Bê tɔk tyɛngrɛ me na wa ɛ? E wa de ê kyɛm a hwo me ɛ? E wɛ̌ lwek bemat mɛ de ê kyɛm a ra repugu na me ɛ?

²⁰Yaga ano, wet in betong na yin a wok gwong de me Dagwi Darwey ma yong a Ɛdɔm, na pyɛ de ma tɛ̀ e yey na me ra a BeTeman. Mwin, bê hwɔlɔ hɛn sede nèy tyīmit e ji kwara mo, ko a rɔda se a kawɛ pyɛ vyes sizɔng.

²¹Jeng de Ɛdɔm wô gaba rewɔng rê se tyɔng wɛt, ko jey mwa yê digis, ko bê wok fwɔ̂ sesin mɛn e Rep Sere.

²²Di hwak ê sogo ziri, ê tut e gwi sede kim. A rɔda shara bafabak mɛ e ra Bɔsra. Neyey bemat como Ɛdɔm nê beseng sede yey hwā de e rus tɔ.”

²³Pyɛ de Dagwi Darwey a ha e ra Damaskus a yemo: “A sé a bemat bapomô Hamat na Arpat kpɛɛ, yaga yɛn a ga wok reha reves. Pyɛ mo ya nɔng ɛn bengyip, ko ya luk ɛn sede gul gwo luk gworep, ko yɛn e tɔk yɛklɛ hɛn wɛt.

²⁴A sé a bemat Damaskus jwɛɛnɛn, ko yɛn a ga tele na bengyip, yɛn e lingsit mɛ, pyɛ mo ye lɔl ɛn, ko ye royo hɛn, sede hwā de e rus tɔ́.

²⁵Ba ga ye waa a gbɔng repomo mo, repomo de ra kana sè wàshwash na yey pyɛng.

²⁶Ano, bê mɔbɔs bebot bemat mɛn e majey-jɔgɔ, ko mwa bemat como mɛn bê wey e jeng o.

²⁷Mê dak kya e jwa-pomo Damaskus ko hê re nelɔ negwɔm Gbɔng Gwɔ̀m Bɛn-Hadat. Me Dagwi Darwey, Da Jey Mwa ma ha ano.”

²⁸Pyɛ de Dagwi Darwey a ha e ra yere Kedar na yɛnɛ segwɔm gbɔng repomo Hazor de Gbɔng Gwɔ̀m Nɛbukadnɛzar wo Babilɔn a re e como a yemo: “Sogo hin, kyè in vɔk e Kedar! Wey in na bemat rwa rak.

²⁹Sey in ɛ bǔk mɛn na karâ vyēl mɛn, na pyɛ̂ bang bǔk o, mwa na pyɛ́ de ya sé e vɛ. Hashe hin bemaryat mɛn, ko yin yang bemat o, ‘Rezot ra ga rɔnɔ hin mwa!’

³⁰À yin bemat Hazor: Tele hin yikyik, wɔ lɛsɛ hin. Yaga Gbɔng Gwɔ̀m Nɛbukadnɛzar wo Babilɔn a ga yong gwong vwes e ra yin, a vɔk pyɛ vyes e yey na a ra a yin. Me Dagwi Darwey ma ha ano.

³¹Sogo hin, hwo in yere de ya sé bɛs, ya sé sangal tyang. Ya vɔk ruhup, kɛ bewɔ́rɔ manas o wɛt, ya sé sangal nju yɛ.

³²Bemaryat mɛn bê tɛ́ ɛn pyɛ̂ jugu, kara berɔndɔng mɛn, yin ê hashe arɔng. Mê shara e kagwɛ rwa gul, vemo de ba yɛt tot mɛn bit o, ko mê vey na rezot e ra yɛn e kawɛ bak.

³³Hazor wô tɛ́ ɛ kwɔn sangal nevu-hey, kwɔn gbingiring nesheneshey. Vit a mwat de ê sangal ɛ, kɛ a wɔ̂ rekyɛn e hwomo. Me Dagwi Darwey ma ha ano.”

³⁴Ha de Dagwi Darwey a ha a Yirmiya zarap mɛ, e ra Elam, e pɛrɛ negwɔm Zɛdɛkiya wo Yuda a hemo:

³⁵“Dagwi Darwey, Da Jey Mwa a ye: Di, mê kwɔrɔ gbang Elam, Pyɛ de ya tɛ̀ yɛn a vɔk gap.

³⁶Mê tɛ̀ gùl naas e ra Elam, yi e rwa gul naas ve lagwi. Ko mê shara hɛn vɔk e mwa gul o, bê sè yere bemat jey jining, de bemat de ba ro ɛn yi e Elam bê wɔ ɛ wɛt.

³⁷Mê tɛ̀ BeElam be vow e nuyêl ve repugu mɛn, e nuyel vemo de ba tɛ̀ yêy mɔbɔs hɛn. Mê vey na rezot e ra yɛn, na nepep shom hom arɔng. Mê tó ɛn na wal como, sɛ̌ ma wey na yɛn mwa pyɛt.

³⁸Mê tɛ̀ gwofwa negwɔm hom e Elam, ko mê lut gwɔ̀m mɛn na bemat nuyel mɛ.

³⁹Ko e jeng ye yɛnɛ mo, mê toyo a Elam na nerat mɛ. Me Dagwi Darwey ma ha ano.”