Read berom Yirmiya 5 Bible Online

Yirmiya 5 - berom bible

Yirmiya 5

¹À bemat Yɛrusalɛm, tele hin e nehyok min. Bɛrɛng hin kagwa na yin a tē naka! Ngyɛgɛt hin nekwɔn rɛsɛl pyɛ́ kɛ yin ê sɛ̀ mwat gwining de e ra pyɛ́ de ya sé ryat, de e tē ngyɛ́k na a raa Dagwi na tsak o a? Ka sede yin a sɛ̀ ɛ, ko Dagwi Darwey ê hala a Yɛrusalɛm banɛn mɛn.

²Mwa ano de yɛn e tē, “E ji reza Dagwi Darwey wo neken”, mwa ano, yɛn e sisa hin na bɔs zɔng.

³À Dagwi Darwey, e tsak o de hwó jama wɛt a? Hwà rusu hɛn, ko yɛn a ka rus wɛt. Hwà tabak hɛn, ko yɛn a ka wok hɛ wɛt. Yɛn a tɛ̀ bayis mɛn be se gbarak, be dal gwofwa, ko yɛn a kyɛ́ ɛn nà tosho gabɔk.

⁴E bama mo, ma bare, ko ma yɛ, “Bemat vemo ba sé bepɛng zɔng, ba sé betɔn arɔng, yaga yɛn a tɔk gwong Dagwi Darwey wɛt, na pyɛ́ de Dagwi mɛn e simo.

⁵Yaga ano, mê wɔ na bemat nuyel na me ha na yɛn, yɛn a tɔk gwong Dagwi mwin gwɛ a gyêng badu mɛ.” Ko mwa hɛn ba ga kwɔrɔs sesêk vɔk berɔndɔng, na ngyang negwɔm mɛ.

⁶Yaga ano, gukum yi e rehwot wô mɔbɔs hɛn, bwá yi e hey gbingiring wô hama hɛn, ko cwey yê kyě gyenges bemat e bapomo mɛn, kawɛ mwat de a nusu e jey, yê hama hɛ cɛk o cɛk o, yaga banɛn mɛn ba sé pyak, yɛn a ga sǎ e de doyo a Dagwi ma.

⁷Dagwi Darwey a rangal, a ye, “Yaga sɛ́ de mê hala a bemat hom banɛn mɛn ɛ? Yɛn a ga kyini me, ko yɛn a re a pyɛ̂ sekwit de ya sé dagwi wɛt fongol. Sede ma nɔng ɛn pyɛ̂ re ba sirik, ko yɛn a wɔ̀ ra nejwang, yɛn a dɔng vɔk e nelɔ bedebeves.

⁸Yɛn a sé sede beras bedwa de ba siris naka, ko kawɛ e ji mɛn e mara yis hwâ mwat vwara mɛ.

⁹A sé naka na me tabak hɛn yaga pyɛ́ yemo wɛt a? Na me tala yere bemat jey yemo pyɔlɔ̂ neves mɛn wɛt a? Me Dagwi Darwey ma ha ano.

¹⁰Mê tomo vê repugu na be yɛt bě anap bemat hom o, ko yɛn a wey na vɛ hywiri wɛt. Yɛn ê kwɛrɛng nelang o zɔng, yaga na sé nenang wɛt.

¹¹Yére Israyɛl na yê Yuda ya ga row me vit. Me Dagwi Darwey ma ha ano.”

¹²Bemat Dagwi Darwey ba ga tono na yɛ, ba ye, “Ê ra pyɛ wɛt. Wot ê di reyɔm rehak wɛt, wot ê di como kɛ wot wok vyong wɛt.”

¹³Yɛn a ga ye, “Bezarap Dagwi ba sé pyɛ wɛt, yɛn a sé sede gul zɔng ko yɛn a vɔk hâ Dagwi wɛt. Tik na pyɛ́ yemo ye té na yɛn pyɛ mɛn!”

¹⁴Yaga ano, Dagwi Darwey, Da Jey Mwa a ye, “À remo de yɛn a ha ano, Mê tɛ̀ neha hom e nu mō ne tɛ́ ɛn kya, bemat o bê se sede cɔgɔt, ko kya hê re ɛn.”

¹⁵À yin BeIsrayɛl, Dagwi Darwey ê vey a yin na yere bemat jey yè yikyik na ye hwo e ra yin. Yere mo ya vɔk gap ko ya ga ros, yere de yin a tɔk lem yɛ wɛt, ko yin ê tɔk pyɛ de ye ha wɛt.

¹⁶Bemat como begbang mɛn bê wey na bemat pyak, mwa hɛn ba sé bemat como hyiw.

¹⁷Yɛn ê re pyɛ̂ bwal min na yê re min, yɛn ê re nèy min bewen na behwong, yɛn ê re kara vyēl na berɔndɔng min, yɛn ê re nèy batin anap na nèy batin regwi min, yɛn ê wey na bapomo de yin a gwɔrɔ na jwa e como, bapomo de yin a tɛ̀ gap min e ra vɛ.

¹⁸Dagwi Darwey a ye, “Mwa ano, e nepɔlɔ nane mo, mê wey na bemat hom hywiri wɛt.

¹⁹Jeng de bwang mɛn ba rangal pyɛ de ya tɛ̀ ma ra pyɛ́ yemo mwa, ko hwo Yirmiya hwô yang ɛn, ‘Sede remo de yin a ye waa a Dagwi, ko yin a ra a bedagwi beduk fwom e vwel min, ano yin ê ra a yere dyuk fwom e vwel de ha sé min wɛt.’ ”

²⁰Dagwi Darwey a ye: “Ha a yére Yakɔp, ha a BeYuda ngan:

²¹Wok in, à yin betɔn, sana netsitsɛng, yin a vɔk bayis, ko yin e bɛrɛng wɛt, yin a vɔk betong, ko yin e wokos wɛt.”

²²Dagwi Darwey a ye: “Yin e wok bengyip hom wɛt a? Yin e vow e nuyel hom wɛt a? Ma tɛ̀ bazɛk be sè yɛnɛ̂ gworep, yɛnɛ̂ vwel de nshi mo ne tɔk ye dɔ wɛt. Mwa ano de bagun nshi bê tɛs vara mo ko bê gyili yɛnɛ mo wɛt. Mwa ano de bagun o bê lulum, bê tɔk kwey yɛnɛ mo wɛt.

²³Ko di bemat vemo ba vɔk yey kashalang na hê sogo nehywɛ, yɛn a ga doyo e hagat, ko yɛn a ga kyè yi na me.

²⁴Yɛn e tē e neyey mɛn wɛt wɔgɔ, ‘Tik na wot a wok bengyip Dagwi Darwey, Dagwi mot, yɛ de e nɔngɔs hot rwak e jeng wɛ, rwak naswigi na wo nahywɛp ko e tikis a wot, jeng de a tɛ̀ yaga bwal.’

²⁵Neburu min na ga gang pyɛ́ yemo e jey, ko banɛn min ba ga dul in nà di pyɛ ryat yemo.

²⁶Ey, bemat beves ba sé e ji bemat hom, yɛn e seres ɛ pyɛ̂ behak, yɛn e tɛ̀sɛ bagun sede bemat jama, yɛn e vos mɛ bemat.

²⁷Sede mwat jàma de a sila nenon e rɛngɛ mo, ano de nelɔ mɛn na sila na pyɛ̂ jugu. Yɛn a ga tɛ́ ɛn bedaberey, vê reto pyak yi na ra ano.

²⁸Yɛn a mɔsɔ, ko ba sé ferep, yɛn a vɔk yɛnɛ̂ ragas neves wɛt, yɛn e ra shɔt na tsak o wɛt. Yɛn e nɔ̂ng nehyɛn pyɛ́ de ya sé myɛn wɛt, ko yɛn e gas a vemo de be mɔt ɛn shɔt e tē wɛt.”

²⁹Dagwi Darwey a ye: “Mê tabak hɛn yaga pyɛ́ de yɛn e ra wɛt a? Na me tala pyɔ̌n neves yere nemo e ra yere bemat jey yemo wɛt a?

³⁰Pyɛ vyes na pyɛ byɛm-byɛm sizɔng ya ga té e vwel o.

³¹Bezarap Dagwi be ha hâ bɔs zɔng, ko be nɔ̂ng bepiris nû bɔs arɔng. Bemat hom be simo be ra a yɛn ano tyɔng wɛt. Ko sɛ̌ yɛn ê ba ra sɛ́ e jeng yɛnɛ mo ɛ?”