Read berom Yirmiya 50 Bible Online

Yirmiya 50 - berom bible

Yirmiya 50

¹Ha ma hemo de Dagwi Darwey a nɔng Yirmiya, zarap mɛ e ra gbɔng repomo Babilɔn na mwa sevwel BeBabilɔn:

²“Ha a yére bemat jey yɛgɛt o! Shara yɛ! Nára pyɛ dura e gwi na hwo ha yɛgɛt o! Hwo lɛrɛ yɛ wɛt, ye ngan: ‘Babilɔn wa ga gaba! Ba ga tɛ̀ a Bɛl rekyen. Ba ga shara Marduk dagwi wɛ! Ba ga tɛ̀ a pyɛ̂ sekwit Babilɔn rekyen arɔng. Marduk wa ga gaba, ko cī wɛ ya ga tɛ́ ɛ cɛk o cɛk o!’

³Yere bemat jey ya sé kyè vey e ra yɛ yi e rwa bato, na ye tɛ̀ vwel o hey gbingiring. Vit a mwat de ê to sangal e hɛ, bemat na ngyāma ya ga tele yi e hɛ.

⁴E nepɔlɔ nane, tanga e jeng o, BeIsrayɛl bê toyo, yɛn na BeYuda. Yɛn ê vey na sesin, yɛn ê se jama Dagwi Darwey, Dagwi mɛn.

⁵Yɛn ê rangal gwong vɔk e Siyɔn, ko bê doyo bayis mɛn vɔk e hwomo, be tē: Vey in na wot bana hot na Dagwi Darwey, na wuna-na-sira gbak-gbak de bê sang ye bam wɛt!

⁶Bemat hom ba sé sede tyīmit de ya vuru hɛ, belek mɛn ba tɛ̀ be ye rɛng, ba kwɛlɛng hɛn e beraku. Yɛn a kyè yi e raku vɔk e rahwol, ba ye bam a kwara mɛn.

⁷Kawɛ de a man na yɛn a wey na yɛn, vê repugu mɛn ba ye, ‘E nɛn mot wɛt.’ A remo de yɛn a ra a Dagwi Darwey banɛn, yɛ de a sé tin tsak o. Yɛ Dagwi Darwey, yɛ de bedabeda mot bá sɛt yey mɛn e ra yɛ.

⁸Tele hin yi e Babilɔn, nusu hin yi e vwel BeBabilɔn. Sè in sede begam, de be kyè e nuyel tyīmit!

⁹Di in, mê tɔgɔs begbɔng yére bemat jey yi e rwa bato, bê hwo e ra Babilɔn na como. Yɛn ê tɛ̀ dura como e ra wɛ, na be re wɛ. Ket mɛn ba sé yere ve bemat sekwɛl, vemo de be to ɛn hal wɛt.

¹⁰Bê jugu BeBabilɔn, mwa vemo de be jugu hɛn o bê siris. Me Dagwi Darwey ma ha ano.

¹¹À yin vê jugu pyɛ̂ nedanerey hom, mwa ano de yin e feng, yin a shɛgɛsh. Mwa ano de yin e bwat sede shêp ngyi e ra sehwey, ko yin e tosho sede bedwa.

¹²Ko rekyen rê kyiri neng min Babilɔn, yɛ de a tɔ o ê sè pyɛ byɛs. Di, vwel o hê se hê yɛnɛ mo e ji yere bemat jey, hê se hey, vwel hwogot, na hey gbingiring arɔng.

¹³Yaga shom Dagwi Darwey e ra hɛ, bê sangal e ji hɛ wɛt, hê se barin hal, kawɛ mwat de a kwey e Babilɔn o, ê yang ɛ yɔɔt, ê ye cwɛ̀ɛp yaga ha ga lashe hɛ tyɔng wɛt.

¹⁴À yin mwa bemat begbang, ngyɛrɛ hin na yin a rɔnɔ Babilɔn. Tabas hin ket min mwa e ra hɛ, yaga ha ga ra a Dagwi Darwey banɛn.

¹⁵Dak in sekun e ra hɛ yi e kawɛ bak! A remo ha ga tosho gabɔk. Nekwɔn dul hɛ na ga gabsa, ba ga gangas jwa-pomo mo. Dagwi Darwey a sé tala hɛ pyɔ̌n neves hɛ, yaga ano, tala hin hɛ pyɔ̌n hɛ, ra in a hɛ pyɛ de ha ga ra arɔng.

¹⁶Dul in mwat tus pyɛ́ e Babilɔn, na mwat de e nása bwǎ bwal nahywɛp. Yaga wal como de wo wey na bemat, kawɛ e ji mɛn e toyo vɔk na bemat mɛ, ko mwa hɛn bê tele vɔk e vwel mɛn.”

¹⁷Dagwi Darwey a ye, “BeIsrayɛl ba sé sede tyīmit de begukum be ro yɛ, be kyě shara yɛ. E mɛsɛng o gbɔng gwɔ̀m Asirya a hwo e ra yɛn, e bama mɛ Gbɔng Gwɔ̀m Nɛbukadnɛzar wo Babilɔn a kyě shɛk bekup mɛn.

¹⁸Yaga ano, me Dagwi Darwey, Da Jey Mwa, Dagwi Israyɛl, mê tabak Gbɔng Gwɔ̀m Nɛbukadnɛzar na sevwel mɛ, tyɛng sede ma tabak gbɔng gwɔ̀m Asirya.

¹⁹Mê toyo na BeIsrayɛl e sevwel mɛn. Yɛn a rɔda re pyɛ́ de ye tabas e ra Raku Karmɛl na e yɛnɛ sevwel Bashan, ko yɛn ê re kayɛ pyɛ de yɛn e simo de ye ras e berahwol Ɛfrayim na Gileyat, ko yɛn ê siris.

²⁰Sede jeng o ya vey, bê to sɛ banɛn e Israyɛl kɛ neves e Yuda wɛt, yaga mê hala a bwang vane de ma tɛ̀ be tik ɛn beken banɛn mɛn. Me Dagwi Darwey ma ha ano.”

²¹“Tút in vɔk e vwel Meratayim, vwel sogo nehywɛ zang ba, yin wɔ̀ hwo e ra bemat Pekot, vwel tabak arɔng, na yin wey na yɛn mwa hywiri, ra in pyɛ de ma ha a yin. Me Dagwi Darwey ma ha ano.

²²Wus como ha sé e vwel o, ko ba sé wey na kayɛ pyɛ!

²³Di in remos mwa jey, ba ga kwɔrɔ rɛ be bugut rɛ hywiri! Di in de Babilɔn wa ga tɛ́ ɛ, pyɛ byɛm-byɛm e bayis yere bemat jey!

²⁴À Babilɔn, hwà tɛ̀ a to mo segun, ko sa ga vo o, ko hwà ka tɔk wɛt. Ba sɛ o ko ba ga sey ɛ hwo, yaga hwà ra repugu na Dagwi Darwey.

²⁵Dagwi Darwey a ga wunta gban pyɛ̂ como mɛ, ko a paa ɛ pyɛ̂ como shom mɛ, yaga Darwey Dagwi Darwey, Da Jey Mwa a vɔk fwom de ê ra e vwel BeBabilɔn.

²⁶Vèy hwo in hɛ yi e kawɛ bak, wuma hin hɛ sede begban pyɛ̂ yéneng, tula hin hɛ sede bagwɔt pyɛ̂ yéneng, na yin wey na hɛ vit, be tɛt a hɛ pyɛ cak wɛt.

²⁷Mɔbɔs hin bemat o mwa sede bemus, kyè in mɛ vɔk e dem yɛt yas. Gawey e ra yɛn, jeng mɛn ya ga vey, jeng tabak mɛn a yemo!

²⁸Wet in betong, bemat tele kpɛɛ ba ga hywit ɛn yi e Babilɔn, yɛn a ga wul Siyɔn na yɛn a ha, talâ pyɔ̌n Dagwi Darwey, Dagwi mot, yaga pyɛ́ vyes de yɛn a ra e ra Gbɔng Duk Re Fongol mɛ!

²⁹Yila hin bemat begbang na be hwo e ra Babilɔn, tomo hin mwa bemat tabas na begbang. Rɔnɔ hin gbɔng repomo mo, be tik mwat hwak a hywit ɛ wɛt. Tala hin rɛ tyɛng na tom rɛ, ra in a rɛ sede ra ra a behak, yaga ra ga byɛs Dagwi Darwey, Wo Jɛrɛ, wo Israyɛl.

³⁰Ano de bê mɔbɔs mwa bebot bemat mɛn e nehyok gbɔng repomo mo, ko be wey na mwa bemat como rɛ tuk hane mo arɔng. Me Dagwi Darwey ma ha ano.

³¹Me Darwey Dagwi Darwey, Da Jey Mwa ma ye: À hwo Babilɔn, me ra repugu na hwo yaga dak kaa mo. Tuk tala mo ha ga pom, jeng de mê tabak hwo.

³²Wò dak kaa ê tiri bwol a gaba, vit a mwat de ê yang ɛ cik. Mê dak kya e bagbɔng bapomo mɛ, ko he re buruk kayɛ pyɛ de ya rɔnɔ hɛ.”

³³Dagwi Darwey, Da Jey Mwa a ye: “Ba sé mɔt BeIsrayɛl, ano na vê Yuda arɔng. Mwa vemo de ba vos ɛn be gyenges hɛn gak, ko be tik ɛn be kyè wɛt.

³⁴Wo Viri hɛn a vɔk gap, Dagwi Darwey, Da Jey Mwa à reza mɛ. Yɛ pyɛ mɛ e jut ha mɛn mwin, ko ê vey na netyang e ra jey, na reyɔm e ra bemat sangal e Babilɔn.”

³⁵Dagwi Darwey a ye: “Como yê hwo e ra BeBabilɔn, na e ra ve sangal e Babilɔn na e ra bemat fwom hɛ na bemat netsitsɛng hɛ!

³⁶Como yê hwo e ra bevwoshon hɛ, yaga na yɛn a tɛ́ ɛn betɔn! Como yê hwo e ra bemat como hɛ, yaga na be bin wey na yɛn!

³⁷Como yê hwo e ra bedwa hɛ, na e ra bekyɛkyɛ bedwa hɛ, na e ra bemat como byɛ e tē mɛn, na yɛn a tɛ́ ɛn sede beha! Como yê hwo e ra pyɛ̂ nedenerey hɛ, na be bin jugu yɛ!

³⁸Vey in na nehwogot e ra vwel o, na bègwɔrɔt hɛ be ye jɔng! Yaga ha sé vwel pyɛ̂ sekwit ye bengyip, ko bemat o bê ra kaa na cī mɛn.

³⁹Yaga ano, ngyāma yê sangal na bemurum e Babilɔn, ko bengyuwa bê sangal e vwel o. Bemat bê to sangal e hɛ wɛt, ko hê to vɔk bemat e ji hɛ wɛt mwa nezamang.

⁴⁰Sede jeng de Dagwi a wey na Sɔdɔm tanga Gɔmɔra na bapomo de ba gwɔrɔ vɛ, ano vit a mwat de ê sangal e hwomo, vit a mwasi de ê tɛ̀ tɔ mɛ e hwomo. Me Dagwi Darwey ma ha ano.

⁴¹Di in, bemat behak ba sé kyè vey yi e rwa bato, gbɔng yere bemat jey na begwɔ̀m pyak, ba sé yong ɛn yi e bebak jey ve yikyik.

⁴²Yɛn a ga hashe begbang na bebara, yɛn a sé beves, vit a tosho reyɔm. Wus mɛn ha sé sede lulum gworep, yɛn a lagsa bedwa. Yɛn a yong ɛn gyat yaga como, e ra yin BeBabilɔn!

⁴³Gbɔng gwɔ̀m Babilɔn a wok reha mɛn, ko vɔ mɛ ba tɛ́ ɛn gbɛrɛk. Reyɔm na rezot ra kaba hɛ, na nepep sede ne hwā de e rus tɔ.

⁴⁴“Me Dagwi Darwey ma sé kyè vey sede gukum de wa sé nusu yi e rehwot Rɔt Yɔrdan pere vɔk e tyɛl sehwey vyēl rat, ano de mê vey na me tɛ̀ BeBabilɔn be tele dey-dey yi e sevwel mɛn ko mwat nuyel de ma kasa ê re negwɔm e ra yére bemat jey o. Bê tɔk tyɛngrɛ me na wa ɛ? E wa de ê kyɛm a hwo me ɛ? E wɛ̌ lwek bemat mɛ de ê kyɛm a ra repugu na me ɛ?

⁴⁵Yaga ano, wet in betong, na yin a wok gwong de me Dagwi Darwey ma yong a repomo Babilɔn, na pyɛ de ma tɛ̀ e yey na me ra a bemat vwel BeBabilɔn. Mwin, bê hwɔlɔ nèy tyīmit e ji kwara mo ko a rɔda sè a kawɛ mɛn pyɛ vyes sizɔng.

⁴⁶Jeng de Babilɔn wô gaba, rewɔng o rê se tyɔng wɛt, ko jey mwa yê digis, ko be wok fwɔ sesin mɛn e bwang yére bemat jey.”