Read berom Yirmiya 51 Bible Online

Yirmiya 51 - berom bible

Yirmiya 51

¹Dagwi Darwey a ye: “Mê vey na gûl wey na kayɛ pyɛ e ra vwel Babilɔn na e ra vê sangal e vwel Babilɔnya.

²Mê vey na bemat na be wolom Babilɔn, ko yɛn ê wolom vwel o. Bê hala vwel o wiin, jeng de yɛn ê hwo hɛ e kawɛ bak, e tuk reyɔm o.

³Bê tik mwat tabas a ta gbang mɛ wɛt, bê tik ɛ a tɛ̀ yɔ̀m como mɛ wɛt. Bê tɛt ɛ bebot bemat mɛn wɛt, bê wéy in na mwa bemat como mɛn hywiri.

⁴Bê gabsa bavin o e vwel BeBabilɔn, bê mǎ hɛn e nehyok mɛn.

⁵Dagwi Israyɛl na Yuda, Dagwi Darwey, Da Jey Mwa a ga kyini bemat mɛ wɛt. Mwa ano de vwel o ha sila na banɛn, e nuyel Wo Jɛrɛ, wo Israyɛl.

⁶Tele hin yi e Babilɔn, kawɛ e ji min a sey neken mɛ! Yin wey yaga neves mɛn wɛt, yaga jeng talâ pyɔ̌n Dagwi Darwey a yemo, a sé tala hɛ pyɛ de a ga ra.

⁷Babilɔn wa sé sede keshi dyam shinang e vwɔ Dagwi Darwey, wa tɛ̀ jey mwa ye feng siring, yére bemat jey ya sɔ nshi anap wɛ, yi ano, yére bemat o ya hwo lolong.

⁸Babilɔn wa ga gaba dey-dey ko wa ga shara hɛ, dak in sekun yaga wɛ! Jama hin bèhal yaga baram o, gyeng rɔ̌ bê tɔk tɛ̀ wɛ tyang.

⁹Wot a ye ngyɛ́k na wot a tɛ̀ Babilɔn o tyang, ko wa tɔk tɛ̀ tyang wɛt. Ye in waa a wɛ, ko yin, kawɛ mo a kyè wɔ e vwel mɛ. Yaga shɔt wɛ ya ga wul lagwi, ba ga jut yɛ e rak o e larwak.

¹⁰Dagwi Darwey a ga dura necik pyɛ de wot a ra. Vey in na wot wɔ̀ ha e Siyɔn, pyɛ de Dagwi Darwey, Dagwi mot a ga ra.

¹¹Lɔ̌ hin ket min! Sila hin bezing ket o! “Dagwi Darwey a ga shina gabik begwɔ̀m BeMedya, yaga a ga yong gwong e ra Babilɔn na a wey na wɛ. Talâ pyɔ̌n Dagwi Darwey à hane, talâ pyɔ̌n yaga wey na Gbɔng Duk Re Fongol mɛ.

¹²“Nára hin pyɛ dura na be hwo e ra bejwa-repomo Babilɔn, gwɛ̌ hin nepyak bemat gyeng! Gas in bemat bɛɛ̀ nekanang! Tɛ̀ in bemat e waba! Yaga Dagwi Darwey a ga yong ko a ga ra, pyɛ de a ga ha e ra bemat sangal e Babilɔn.

¹³Yin vê sangal e vwel nerɔt pyak, hê pyɛ̂ nedanerey sizɔng, yɛnɛ min ha ga pom, ba ga tut neken vwel o ano.”

¹⁴Dagwi Darwey, Da Jey Mwa a ga sira na to mɛ, a ye: “Mwin, mê sila hin na bemat como sede rewuk rawal, ko yɛn ê gbɔ na wɛng de ba sɛ e ra yin.

¹⁵E yɛ de a yong sevwel na reto mɛ, a tɛ̀ yey tɛk na netsitsɛng mɛ, ko yi na tɔk mɛ, a shara belagwi mwa.

¹⁶Jeng de e lumla ko nshî lagwi ne wɔs, ko e tɛ̀ bale be yi e neyɛnɛ jey. E tɛ̀ gbara wo tē dɛbɛt e ji rwak, ko e tomsal na gul yi e gban mɛ.

¹⁷Ano kawɛ mwat ê tɛ́ ɛ tɔn sana netsitsɛng, kawɛ zu dyam shinang ê vo rekyen cī mɛ, yaga pyɛ́ de yɛn e yongos o ya sé bɔs, vit a yɛ na nesong.

¹⁸Ya sé yapyi zɔng, fwom kwɛlɛng bemat zɔng, e jeng tabak mɛn, yɛn ê weres.

¹⁹Dagwi Darwey wo Yakɔp a sé sede yɛn wɛt, yaga e yɛ de a yong pyɛ̂ mwa. Ko Israyɛl a sé nap mɛ, reza me a Dagwi Darwey, Da Jey Mwa.”

²⁰Darwey Dagwi a ye: “Hwo wɛ à remos hom, pyɛ tô como hom, na hwo de me bugut mɛ yére bemat jey, na hwo de me wey na segwɔm detidetu.

²¹Na hwo de me bunut dwa na mwat laga mo, na hwo de me bunut kyɛkyɛ bedwa na mwat kyé na wɛ.

²²Na hwo de me bunut rwas na hwā, na hwo de me bunut mwakuk na hwey, na hwo de me bunut bwot mwat na hwong.

²³Na hwo de me bunut lwek vyēl na kwara mo, na hwo de me bunut bemat cap na yas how cap o, na hwo de me bunut begwɔmna na bemat nuyel bemat como mɛn.”

²⁴Dagwi Darwey a ye: “Mê tala Babilɔn na mwa ve sangal e sevwel BeBabilɔn e bayis min yaga mwa neves de yɛn a ga ra e Siyɔn.

²⁵“À Babilɔn sede rakû wey na pyɛ, me Dagwi Darwey me ra repugu na hwo, de hwà ga wey na jey mwa! Mê nára vwɔ hom e ra hwo, ko mê biring hwo vey e vwel yi e rak o, ko hwô se raku de kya ha ga re.

²⁶Bê to jut gwofwa to-kwɔng yi na hwo wɛt, ko vit a gwofwa retis arɔng, ko hwô se sede hey gbingiring nesheneshey. Me Dagwi Darwey ma ha ano.

²⁷Nára hin pyɛ dura e gwi e neyɛnɛ jey, pɛl in a yére bemat jey durum como! Yong in yere bemat jey na yɛn a hwo como na wɛ, yila hin begwɔ̀m Ararat, na Mini tanga Ashkenas na be hwo como. Tɛ̀ in gwɔ̀m como e ra wɛ, vey in na bedwa sede rewuk rawal.

²⁸Yong in yere bemat jey yaga como na Babilɔn, yɛn begwɔ̀m BeMedya, na begwɔmna mɛn tanga bemat nuyel mɛn, na kasɛ̌ sevwel de sa sé e nɛn mɛn.

²⁹Jey ye vow ko ye ririm, yaga pyɛ de Dagwi Darwey a yong e ra Babilɔn ya sé té, na be tɛ̀ vwel Babilɔn gbingiring, vit a bemat sangal e hɛ.

³⁰Bemat como Babilɔn ba ga tik tô como, ko ba nàra e nekwɔn dal mɛn, gap mɛn ha ga tala hɛ, ba ga tɛ́ ɛn sede beha. Ba ga dak kya e nelɔ mɛn, ruhup mɛn ba ga gabsa.

³¹Bemat tele be raa bemɛn na tele, tom e raa mumwɛ ano arɔng, na be wɔ̀ ha a gbɔng gwɔ̀m Babilɔn, ba ga re repomo mo e kawɛ bak.

³²Ba ga sey ɛ nekwɔn yé dɔ, ba ga dak kya e nekwɔn dál, ko bemat como ba sé lingsit.”

³³Dagwi Darwey, Da Jey Mwa, Dagwi Israyɛl a ye: “BeBabilɔn ba ga tɛ́ ɛn sede gazu de ba lolom, e jeng de ba sé dak ɛ pyɛ́, mwa ano e ji jeng tyɔng, ko jeng bwal mɛn yê pom.

³⁴Gbɔng Gwɔ̀m Nɛbukadnɛzar wo Babilɔn a ga re Yɛrusalɛm, a ga bugut wɛ, a ga paa pyɛ́ mo mwa a hala wɛ sede shǐ hal, a wɔlɔk wɛ sede gwopyɛ-ji-nshi, a ga sila jim mɛ na pyɛ́ ryat sizɔng, ko a tulus bwang o e jey.

³⁵Tik na bemat Siyɔn be ye, ‘Gwi gwô tala BeBabilɔn yol de yɛn a ra a wot.’ Ko bemat Yɛrusalɛm be ye, ‘Gwi gwô tala BeBabilɔn nemi mot de yɛn a lusha.’ ”

³⁶Dagwi Darwey a ye: “Mê jut ha min, ko mê tɛ̀ be tala pyɛ de ba ra a yin. Mê tɛ̀ gworep mɛn gwo hworok, ko mê tɛ̀ lwel nshi mɛn gwo ye jɔng.

³⁷Ano Babilɔn wô tɛ́ ɛ bagwɔt barin, kwɔn sangal nevu-hey, wô se pyɛ byɛm-byɛm, pyɛ byɛs, vit a bemat e ji wɛ.

³⁸BeBabilɔn bê lulum sede begukum, bê tosho sede nèy gukum.

³⁹Yɛn a kat cwey pyɛ́ bɛ? Mê yong a yɛn nshi sɔ, mê tɛ̀ yɛn a sɔ, sɛ̌ yɛn a hwo feng. Yɛn ê wɔ̂ nevwa sana yɛnɛ, ko yɛn ê sang sene wɛt.

⁴⁰Mê hwɔlɔ hɛn wɔ̀ yɛ́t ɛn sede byot tyīmit, sede beturuk tanga begam. Me Dagwi Darwey ma ha ano.”

⁴¹“Yaa kukuuk! Ba ga sey ɛ Babilɔn, ba ga re pyɛ kaa mwa jey! Di de Babilɔn wa ga tɛ́ ɛ, pyɛ byɛm-byɛm e nuyel yére bemat jey!

⁴²Gworep gwa ga tele e ra Babilɔn, bagun nshî gwɛ de be lulum ba ga bang wɛ vit.

⁴³Bapomo wɛ ba ga tɛ́ ɛn pyɛ byɛm-byɛm, vwel nehwogot na hêy gbingiring, vwel de ha sé san vit a mwat, ko vit a mwasi de e kwey e ji hɛ.

⁴⁴Mê tabak Bɛl, ci Babilɔn, na me tɛ̀ wo hwɔs pyɛ de wa ga kana wɔlɔk. Yére bemat jey yê to dɔ́ng vɔk e hwomo wɛt, jwa-pomo Babilɔn wa ga gaba!

⁴⁵Nu in yi e hɛ, a bemat hom! Sey in bato min, kawɛ e ji min, yi e shom vyes Dagwi Darwey!

⁴⁶A sè a yin fɛgɛt, kɛ yin vo bengyip na neha gwɔrɔng de be kyě ha e vwel o wɛt. Shey hemo be yi na ha hak, ko shey het be yi na hak detu. Neha yol de yê ra e vwel o, na ne gwɔ̀m hwak de ê hwo mumwɛ na como.

⁴⁷Ko di in, jeng ye kyè vey, de mê teshe na pyɛ̂ sekwit Babilɔn. Bê tɛ̀ a mwa sevwel o rekyen, ko mwa vemo de ba mɔbɔs, bê gabsa e vwel o.

⁴⁸Ano lagwi na jey, na mwa pyɛ́ de ya sé e ji yɛ, yê gbɔ na yey pyɛng e ra Babilɔn, yaga vê wey na wɛ bê vey hwo e ra wɛ yi e rwa bato.

⁴⁹E remo Babilɔn wô gaba yaga BeIsrayɛl de wa ga mɔbɔs sede remo de mwa vemo de Babilɔn wa ga mɔbɔs e jey. Me Dagwi Darwey ma ha ano.”

⁵⁰“Yin de yin a ga hywit in wal como, kyè in, yin gyeng wɛt! Bare hin na Dagwi Darwey yi e vwel yikyik, yin to kyě bare na Yɛrusalɛm arɔng.

⁵¹Wot a vo rekyen, yaga ba ga kyě dusa hot, byɛs ha ga kyiri hot mwa, yaga yére dyuk ya ga yel e nedem jɛrɛ ne Gbɔng Duk Re Fongol Dagwi Darwey.

⁵²Yaga ano, jeng ye kyè vey mwin, de mê tabak pyɛ̂ sekwit Babilɔn, ko vemo de ba mǎ hɛn bê gwɔrɔng e mwa yɛnɛ vwel o.

⁵³Ka Babilɔn wa ka tút vɔk e lagwi, na wo lɔk na gap kwɔn dal e hwomo, Mwa ano mê tomo na vê wey na be hwo e ra wɛ. Me Dagwi Darwey ma ha ano.”

⁵⁴“Wok in lwɛ́lɛ sesin e Babilɔn, gwô gbɔng gawey yi e vwel BeBabilɔn!

⁵⁵Ey, Dagwi Darwey a sé wey na Babilɔn, a sé tɛ̀ lwɛ́lɛ wɛ gwo ye yuu. Bemat como ba yi na yol sede bagun nshi de be lulum, ba hwo como, ba gbɔ na tɔ mɛn.

⁵⁶Yaga wo wey a ga hwo e ra Babilɔn, ba ga vos bemat como mɛn, ba ga kwɔrɔs begbang mɛn. Ey, Dagwi Darwey a sé Dagwi tala pyɔ̌n neves, e sang tik nà tala wɛt.

⁵⁷Mê tɛ̀ begwɔ̀m na vê netsitsɛng wɛ be feng siring, mwa na begwɔmna wɛ, na bemat nuyel wɛ tanga bemat como wɛ. Yɛn ê wɔ nevwa gbak-gbak sana to sene. Me Gbɔng Gwɔ̀m, de reza hom a Dagwi Darwey, Da Jey Mwa ma ha ano.

⁵⁸Bejwâ-pomo Babilɔn gbɔng o bê gabsa e vwel, ko ri ruhup o de ba sé belis e rak o, kya hê re vɛ. Fwom bemat o gwa ga tɛ́ ɛ zɔng-reng. Ko yére bemat jey ba yɔ́m ɛn, ko ba sɛ̀ balem kya zɔng.”

⁵⁹Nu a hemo de Yirmiya zarap Dagwi a nɔng Seraya Neriya Maseya jeng de Seraya á sè kyè vɔk e Babilɔn tanga Zɛdɛkiya gbɔng gwɔ̀m Yuda e shey he naas hê negwɔm mɛ. Seraya mo á sè gwelê gwɔ̀m.

⁶⁰Yirmiya a jɛk e bwok-basa reha yere mwa gawey de hê hwo e ra Babilɔn, na mwa bwang pyɛ́ cak e ra sevwel o.

⁶¹A yang Seraya ngan, “Sede hwà wul Babilɔn, tik na hwo basa a bemat o gbɔ̌gbɔ kayɛ pyɛ de ba jɛk e ngamo.

⁶²E bama mo hwo ra won, hwo ye, ‘À Dagwi Darwey, hwà ga ye hwô wey na kwɔn hemo, e gwong de vit a pyɛ cen cak de yê se e hɛ, kɛ mwasi kɛ ngyama, ko ha rɔda se gbingiring nesheneshey.’

⁶³À Seraya jeng de hwà yɛnɛ basa a bemat bwok-basa mo, ko hwo rɔgɔs gwɛ tanga gwofwa, ko hwo bomo gwɛ e Gwɔrɔt Ɛifaratɛs,

⁶⁴ko hwo ye, ‘Pyɛ ma yemo de yê té na Babilɔn, wô ye pyɔp, ko wô sang to sogo wɛt, yaga gawey de Dagwi Darwey a sé kyè wɔ vey mɛ e ra wɛ.’ ” Talâ neha Yirmiya à nemo.