Read berom Yirmiya 52 Bible Online

Yirmiya 52 - berom bible

Yirmiya 52

¹Zɛdɛkiya á vɔk neshey kuru baba na hɛ hining (21) jeng de a hwo re negwɔm, ko a re negwɔm o e Yɛrusalɛm neshey kuru na hɛ hining. Neng-gwɔ mɛ a Hamutal, hwông Yirmiya yi e Libna.

²Zɛdɛkiya á ra a Dagwi Darwey banɛn, tyɛng sede Yɛhɔyakim a ra.

³Pyɛ mo ya ga vey a Dagwi Darwey ano. Shom mɛ ya sogo ding-ding na bemât Yɛrusalɛm na BeYuda. Yaga ano, a ro ɛn, a gas ɛn na yɛ. Ko Zɛdɛkiya a sogo a Da vwel Babilɔn nehywɛ.

⁴E shey he shanetat hê negwɔm Zɛdɛkiya, Nɛbukadnɛzar gbɔng gwɔ̀m Babilɔn a tula bemat como mɛ mwa. E pɔlɔ̂ pwɛl he kuru e pwɛl gwo kuru, a vey hwo e ra Yɛrusalɛm. Ba rɔnɔ gbɔng repomo mo ko ba lɔkɔs nekwɔn kweres wɔ tut e ra jwa-pomo mo.

⁵Bama shey hining na bit o, pyɛ̂ re e Yɛrusalɛm ya ga tala hɛ. Ko e pwɛl gwo naas e pɔlɔ he shatat,

⁷bemat como Babilɔn ba kulu jwa-pomo, ba yel e gbɔng repomo mo. E turuk hane mo, Gbɔng Gwɔ̀m Zɛdɛkiya tanga bemat como mɛ ba tele, ba nu ɛn e rwi de gwa sé e tê bejwâ-pomo beba bagat na bwi lɔ gwɔ̀m, mwa ano de bemat como Babilɔn ba ga rɔnɔ Yɛrusalɛm. Yɛn a tele wɔ e gwong vɔk e Nɛk Yɔrdan.

⁸BeBabilɔn ba raa hɛn, ba vo gbɔng gwɔ̀m o e Tyɛl Yeriko. Ko bemat como mɛ ba shara hɛn kpɛɛ.

⁹Ba kyè na Zɛdɛkiya vɔk na Nɛbukadnɛzar e Ribla. Ba ra a yɛ shɔt e hwomo, ba sɛ̀ ɛ na renɛn.

¹⁰Ba mɔbɔs nèy mɛ bewen o e hwomo e bayis mɛ.

¹¹Ba to paa a yɛ yéneng bayis arɔng, ba rɔgɔs hɛ na ngyang dyam pama, ko ba kyè mɛ vɔk e gbɔng repomo Babilɔn. Ko a tɛ̀ ɛ e lɔ ngyang pere vɔk e tuk reku mɛ.

¹²E tuk kuru hê pwɛl gwo netungun, e shey hê kuru na hɛ shatat hê negwɔm Nɛbukadnɛzar wo Babilɔn, Nebuzaradan, gbɔng o wo bemat gyeng Da vwel Babilɔn a yel e Yɛrusalɛm.

¹³A dak kya e Gbɔng Duk Re Fongol, na lɔ gwɔ̀m, na mwa nelɔ Yɛrusalɛm, a dak kya e kahɛ lɔ rey o.

¹⁴Mwa bemat como BeBabilɔn, de bá sè na yɛ, á nɔng ɛn nu be gangas mwa bejwâ-pomo de ba gwɔrɔ Yɛrusalɛm.

¹⁵Ano arɔng, Nebuzaradan, gbɔng o wo bemat gyeng Da Vwel a hashe behak e ji bepɛng na bwang bemat de ba nàra e gbɔng repomo mo, na vemo de ba kana tele wɛrɛn na gbɔng gwɔ̀m Babilɔn, tanga bwang bemat fwom vwɔ, ko a kyè na yɛn vɔk e de sesam.

¹⁶Ko Nebuzaradan, gbɔng o wo bemat gyeng Da Vwel a hala behak e ji bepɛng bemat vwel o na be ra fwom e bě anap tanga how cāp.

¹⁷Bemat como BeBabilɔn ba mɔbɔs bègbɔng bebirik dyam pama beba de ba tɛ̀ e nuyel Gbɔng Duk Re Fongol Dagwi Darwey, na pyɛ̂ tikis gwogbɔng gwopey pama de ba tang gwɛ a Gworep, mwa na Gworep o, de yá se e Gbɔng Duk Re Fongol Dagwi Darwey, ko ba hashe dyam pama mo vɔk e Babilɔn.

¹⁸Yɛn a hashe nerwey, na becebut, na pyɛ̂ rimis bekywa-kya, na bapey, na neshǐ rangas pyɛ̂ nesang hyɔɔlɔl tanga mwa pyɛ̂ fwom Gbɔng Duk Re Fongol de ba yong na dyam pama.

¹⁹Nebuzaradan o a hashe mwa pyɛ̂ dyam shinang na dyam pyɛng, yɛ à, neshǐ nesɛl o, na nekywa vɛ́sɛ cila kya, na bèkɛt sɛrɛs nemi, na nerwey, na pyɛ̂ tikis bekywa-kya, na neshǐ rangas pyɛ̂ nesang hyɔɔlɔl, tanga neshǐ de be shusha mɛ nɔrɔ nshi anap.

²⁰Nedirik dyam pama yi e bègbɔng bebirik beba mo, na gwogbɔng gwopey o tanga bemus kuru na vɛ beba de ba tik gwɛ e ra vɛ, mwa na bahara, yemo de Gbɔng Gwɔ̀m Sɔlɔmɔn á kana yong yaga Gbɔng Duk Re Fongol Dagwi Darwey nà dal gap mara.

²¹Ko bègbɔng bebirik dyam pama mo, nelis kagwɛ mo na sé mita rwit vɔk e rak o, rɔnɔ̂ kagwɛ mo e gèy o ha sé mita betungun na jɔ̄t tyat (5:3), bà sé fong e tē mo, ko neting dyam o na sé besɛntimita betaama na jɔ̄t tyungun (7:5).

²²E ra rak kagwɛ gwobirik o, ba tɛ̀ to mo na dyam pama arɔng, ko ha sé mita beba na jɔ̄t bya (2:2) vɔk e rak o, ko ba rɔnɔ rɛ na fwom de ba kyě kyɔrɔk gwɛ, ba tɛ̀sɛ a kyɔ́rɔk o nèy pomigiranet de ba yong mwa na dyam pama.

²³Ba vɔk nèy pomigiranet kuru shabatat na nɛ netyiimin (96) e bahagat o, mwa nèy o de na rɔnɔ fwom de ba kyɔrɔk o na sé naga gwining (100).

²⁴Nebuzaradan gbɔng o wo bemat gyeng Da Vwel a tɛ̀ be jut Seraya, darwey bepiris, na Tsefanya de e raa hɛ, tanga bepiris betat de be gyenges rwi Gbɔng Duk Re Fongol o.

²⁵Yi e gbɔng repomo mo, a jut mwat nuyel bemat como hwak, na bemat betungun de be vos a gwɔ̀m badu, na mwat-jɛk mwat nuyel bemat como de e vos bemat vɔk e de como, tanga bemat kuru batyiimin vê vwel o de ba rɔngɔl e Yɛrusalɛm.

²⁶Ko Nebuzaradan, gbɔng o wo bemat gyeng Da Vwel a jut ɛn, a vey na yɛn na gbɔng gwɔ̀m Babilɔn e Ribla.

²⁷Ko gbɔng gwɔ̀m Babilɔn a tɛ̀ be mɔbɔs hɛn e Ribla e sevwel Hamat. Ko ba hashe BeYuda yi e sevwel mɛn vɔk e de sesam.

²⁸Nepyak bemat de Nɛbukadnɛzar a hashe vɔk e de sesam à nemo: E shey he netaama he negwɔm mɛ a hashe BeYuda gu batat, na kuru baba na vɛ betat (3,023).

²⁹E shey mɛ hê kuru na hɛ rwit, a kyè na bemat naga rwit, kuru batat na vɛ beba (832) yi e Yɛrusalɛm.

³⁰Ko e shey mɛ he kuru baba na hɛ tat, Nebuzaradan gbɔng o wo bemat gyeng Da Vwel, a hashe BeYuda naga betaama, kuru banaas na vɛ betungun (745) vɔk e de sesam. Nepyak bemat o mwa na sé gu banaas, na naga betyiimin viisis (4,600).

³¹Yɛhɔyakin gbɔng gwɔ̀m Yuda a kana sè e rɔgɔs e duk ngyang e gbɔng repomo Babilɔn neshey kuru batat na nɛ netaama (37). E bama mo Ɛvil-Mɛrɔdak a tɛ́ ɛ Da vwel Babilɔn, ko e shey mɛsɛng hê negwɔm mɛ, e tuk hê kuru baba na hɛ taama (27), e pwɛl gwô kuru na vɛ ba, a pat Yɛhɔyakin yi e duk ngyang o.

³²Ɛvil-Mɛrɔdak a ra a yɛ pyɛ́ ryat, ko a nɔng ɛ nerey de na dal ne kawɛ gbɔng gwɔ̀m de ba vey mɛ e Babilɔn arɔng.

³³Ba simo a Yɛhɔyakin a pat berugu duk ngyang na a tɛ̀sɛ bemɛ, na a to re pyɛ́ tanga Da Vwel o vɔk e yɛnɛ̂ neken mɛ.

³⁴Da Vwel o a tɛ̀, be nɔngɔs Yɛhɔyakin pyɛ́ de ya jam a ye kahɛ tuk mwa jeng de a sé kwen. Ba sǎ e de ra a yɛ ano vɔk e jeng reku mɛ.